《陈雷文选》

 | | | 转寄

悲心

作者 陈雷 2007.10.14

白头毛ê仙童子讲过ê hit几句话，许月真相信，我是感觉chiâⁿ实古怪。不而过，chit-má kā想起来，若像自hia ê话以后，伊就hē一个决心teh等待。

Chēng细汉就是这款，医生讲是天生悲忧ê心理病，看伊ê目神就知影，像日月潭ê水，乌乌深深 看bē到底。听讲伊另外一个阿姨也是仝款，che症头chē少有遗传ê性质。不而过，许月ê病症一冬比一冬khah重去，二、三年前就有teh食药á ，旧年真食力ê时mā有去入院，tī台大精神科tòa三、四礼拜，电疗了后，出院来若像就加真好势ah。

Hit chām，我想减彩也会使讲，许月是一个快乐ê人。在我看来，tī伊ê悲忧症离开伊ê时，实在kap咱普通人仝款仝款，有koh转去学校读书，成绩mā无输人。热人，伊ê阿母听精神科医生ê意思，抱一只khiû毛ê贵宾狗hō͘伊做伴，号做阿白。这只古锥ê狗akiaN2会听人话，不时tòe tī伊身边，目神乌乌深深， 像湖水看bē到底。我有teh怀疑，是m̄ 是狗á也会有悲忧ê症头leh？

Tō是tī年尾人teh闹热ê时，che狗chông出去大路hō͘车kauh死。许月tī房间内bih一礼拜，无出来见人。了后去照明寺chhōe缘结大师，tō是伊ê阿母学拜佛ê师父。师父请教寺里ê仙童子，伊会晓看往生观来世，师父问伊：「Che狗为何来？」仙童子规头壳发白头毛，身躯像一丛老 khok-khok ê chhêng-á树，hit早起大概茶犹未lim，无啥精神，目睭kheh-kheh就应伊：「来还债」。 师父问：「还何债？」仙童子应：「往生杀人」。师父念一句阿弥陀佛，叫许月点一束香拜，koh问：「Che狗为何去？」Hit时仙童子差不多beh tuh-ku去，应伊：「往去轮回受难池，来世做猪hō͘人thâi。」tú好寺工phâng茶来，仙童子lim一嘴茶，师父念一句阿弥陀佛，许月koh点一束香。
许月转去厝了后，安静过三日，koh来chhōe师父。Hit工寺里teh做闹热，前埕吊一大堆红纸灯，双边插一chōa中华民国在台北ê国旗，kap学校内用ê hit牌仝款。许月求师父，hō͘阿白出世做人，mài做猪hō͘人thâi。师父听了欢喜，心内thàng pak内，双手合十，念三遍阿弥陀佛，一chōa仙人踏云ê脚步，chhōa许月去见净云师姊，tō是大尼姑剃光头化装 ê。净云师姊ê办公室有一块大块办公桌，桌顶有一枝大哥大随动电话，mā有chhāi一枝中华民国在台北ê国旗。不过，chēng早净云师姊tō有kā人讲过，伊是无党无派ê，in拜佛ê拢是无党无派。伊the̍h一张粉红色ê传单hō͘许月，纸面印乌字：「中国佛教会台北分会。照明寺启建水陆大法会报名登记表。」正旁有印报名登记ê种类kap价数：「总水陆功德主，捌拾万kho͘。正水陆功德主，五拾万kho͘，胜水陆功德主，参拾万kho͘。副水陆功德主，贰拾万kho͘。内坛功德主，壹拾万kho͘。内坛副功德主，贰万kho͘。以上可以入内坛礼拜。」倒旁有印：「梁皇大坛主，壹拾万kho͘。长生禄位大牌，五仟kho͘。往生莲位大牌，五仟kho͘。往生莲位小牌，贰仟kho͘。冤亲债主，壹仟kho͘。以上限外坛礼拜。」许月请教净云师姊：「Tó一项khah好？」师姊讲：「阿白杀人大罪大孽，三回不得超生，只求正功德主，副功德主无效。」放冷气ê办公室四面壁比hō͘许月看，壁顶tah kah tīⁿ-tīⁿ，一排一排齐齐ê红纸条á ，tō是报名功德主捐钱ê结缘单，「佛海有缘，苦海无边。Chia ê拢是正功德 主ê名字。」伊讲。

许月了解师姊ê话，转去kā阿母讲，正功德主才有效，副功德主无效。阿母听了心不安，m̄ 是为着钱，却是恐惊许月ê悲忧症koh再来发作，专工去请教伊学拜佛ê师父，是m̄是先chhōa许月去台大精神科看māi?师父无欢喜，心内thàng pak内，目睭神闭，双手合十讲：「阿弥陀佛，许月童心无病，只有我 佛大慈悲，将来会有应果。」许月ê阿母听了师父ê话训，点香归心，替许月报名登记照明寺水陆大法会，交现金五拾万kho͘，作一个正水陆功德主，许月会使入内坛礼拜。 另外koh捐一个往生莲花大牌，tī 外坛礼拜。Tī办公室交钱ê所在，空气中有放录音ê the-phuh，劝世兼卖药ê话语：「世间ê道理是圆ê，人ê身魂是恶ê ....人有七情六欲才会破病，m̄是念经就会好，照明寺有设五大中医诊所，大家有问题多多去参考。坐船坐车头会hîn，就是欠血小板，欠叶绿素；腰骨会酸会痛，就ài调肝血，食福禄寿调血丸.......」手续办好，净云师姊讲：「真周至」，师父讲：「善哉，救人就是救家己。」许月老母ê心才安静落来。

许月十八岁生日hit日，伊ê阿母koh买一只khiû毛ê狗á kiáⁿ hō͘伊，mā是白色ê贵宾狗，bē晓听话。M̄-kú到hit-chām，许月ê悲忧症已经深重过度，变做一粒纯粹ê悲心kap完全无理由ê绝望，无法度koh再回头倒转来。隔转日早起，厝里ê人听狗á kiáⁿ teh pūi，发见许月穿一领白雪新衫，面向窗á 口，吊死tī四楼房间内面，算岁寿足足十八岁过一日。虽然许月无留最后ê话字，我知影其中ê缘故，因为伊bat听念经ê人讲起，凡是十八岁以前未成年去阴间者，先落地狱去受罪，所以伊有忍耐一段时间，勉强一直等，到十八岁生日hit日。

葬礼真闹热，做七kap百日总是有尼姑来厝里念经，m̄许月in tau有钱ê关系，che成百万开落去，mā是一thoaⁿ ê负担。但是，中国佛教会台北分会照明寺ê师父有吩咐，就是因为许月过身去ê状况kap普通人无仝，而且年岁这方面也有问题，一切ài特别慎重。许月ê父母年岁khah有，koh是孤单查某kiáⁿ 一 个，事实bē堪得食老失去许月ê悲哀，为着伊，钱无计较，一切拢照师父ê意思。

结果真chē朋友讲，若是一个十八岁gín-á，这款ê做法是真周至ah。我想，che当然是因为in无听着白头毛ê仙童子讲ê hit几句话，mā koh m̄知影许月过身去ê背景ê缘故。