《陈雷文选》

 | | | 转寄

素花老师

作者 陈雷 2007.08.19

陈素花老师退休hit年进前，tō有五年级学生ê家长来学校chhōe伊，也有真chē去in tau拜访，请伊m̄通退休，koh再教一冬，等in kiáⁿ六年级毕业了才退休。素花老师tī成功国小教册30冬a，大家拢讲伊上gâu教，上关心学生，是台南市上盖好ê导师。有ê家长专工kā gín-á ùi别间学校转来成功国小hō伊教。连校长曾铜钟本人mā kā伊姑成，讲：“Koh再教一冬”。这句话，前a三冬ta̍k冬拢按呢讲，素花老师bē堪得伊姑成，tō koh再教一冬。不过这回，伊kā校长讲，有一项代志khǹg tī 心内，真久想beh作，bē tàng koh再chhiân迟。退休hit工，教育局特别赏伊一tè终身服务教育特优奖金牌。Mā有家长送名牌ê旅行袋、旅行箱。 因为in知影，真chē老师退休了后，第一项代志tō是去大bú世界chhit-thô观光，thàn这个身体勇勇，lak袋á钱饱饱ê时阵。

全台单亲协会黄月美会长kā伊说明，这个gín-á名明治。照登记是姓陈，m̄-kú chēng细汉tī孤儿院，无pē无母，事实无人确实伊姓啥。看--起-来11、2岁，一粒头尖尖，一个面扁扁，目睭kap鼻细细个，chhoa̍h-chhoa̍h排无四正，bē输是chhìn-chhái tàu ê。大bú嘴kâm一枝舌thó͘-thó͘ ，若像半条斤蕉，that leh吞bē落去。黄会长真自信讲：“拢会晓家己食饲。衫裤你kéng hō͘伊，家己会晓穿。”koh讲：“拢听有lah。不而过hīⁿ á有khah重，ài讲khah大声。”介绍明治，素花老师kā伊叫：“明治，我是陈素花。”明治无应，kan-na注意teh看素花ê phoa̍h链，súi-súi一kōaⁿ红色ê kap绿色ê玻璃珠á，金金iāⁿ-iāⁿ，查某kiáⁿ彩娟退休hit日送伊ê。一晡久才gia̍h头起来，讲：“橱á 。”素花老师知影伊ê意思，伊ê嘴舌kāu-kāu bē liàn转，讲bē清楚。笑笑tìm头讲：“Tio̍h lah。珠á。”Phoa̍h链pak落来hō͘伊摸。明治欢喜，伸过来牵素花ê手tê。全台湾四个月chhōe透透，今á日才chhōe着。Che tō是伊beh作ê代志，计划真久a。伊退休beh专工来照顾这个gín-á，教育伊。伊一直有特别了解关心，这个蒙古症概成生本tō kap伊有真深、真特别ê因缘。黄月美会长ê秘书张小姐讲：“Ài hâ尿phe á。有时会bē赴，挡bē-tiâu，chhōa出来。”

所以tī厝里ta̍k日家己教伊，教伊chhit-thô ī gian-muh (game)，教伊唱歌讲话，mā chhōa出去外面四界行，ta̍k项看。明治爱去菜市á看闹热。M̄是去看人。市á内面有一阵街头狗十外只，不时tī hia走chông nǹg-chǹg讨食，明治爱看狗。Mā上爱画图，家己会the̍h笔the̍h纸来画，若无人叫，坐khah久mā画去。“你teh画啥？ ”素花会kā问。有时伊会应：“狗”。He纸规张大chōa细chōa，横ê直ê，一chhok一chhok画kah tīⁿ-tīⁿ，看m̄知是teh画啥，ná有啥物狗抑是niau。“啥物款狗？”“狗…狗…”伊用笔比he图。

素花特别去拜托学校教美术ê洪老师，来厝里教明治画图。洪老师教伊画铅笔、画腊笔、画水彩。认真教二个月，khah画mā是大笔细笔乌白chō，mā知teh画啥。洪老师客气kā素花讲：“这个gín-á有伊家己特别ê天份，画图ê代志上好hō͘伊家己发展，将来画出来ê才是头壳内、目睭内家己ê物件。”这个教育giá-á ê原则素花上会理解、ài鼓励个人能力、随伊去发展。所以hō͘洪老师辞掉无koh来教。放据在伊去画，爱画啥tō画啥，爱按怎画tō按怎画，拢无去kā干涉。M̄-kú khah画tō是仝款大chōa细chōa，chō kah乱糟糟，像大面kiáu幼面。“狗…狗…”画了tō欢喜the̍h hō͘素花看。犹一项龟怪，拢画乌ê，m̄ bat用别色。 特别去买一盒36色ê彩色笔，画红ê绿ê hō͘伊看，mā是拢m̄用。烦恼讲是色盲bē晓分色，chhōa去医生检查，好势好势，也无têng-tâⁿ。大概是gín-á心智未开，头脑犹未发展到hia。Mā是放据在伊。

蒙古症ê gín-á khah常身体bē勇，明治真gâu着感冒，hīⁿ á、鼻á发炎，不时teh看医生。Hit cham雨季，着急性肺炎，入院几lōa工才转来，差一sut á无去。彩娟看老母bú kah thiám-thiám，惊伊家己身体bē堪得，劝讲：“阿母，你家己身体也tio̍h顾。稍hioh一下。我来替你顾几工。”难免有时chiù-chhàm，人退休是êng-êng来去运动peh 山，旅行chhit-thô。你专工chhōe这个kê来giâ。

Bú到尾a成实bē堪得。无代无志雄雄头壳hîn，心脏chhiáng，强强beh晕去。赶紧去入院，to也查无啥物要紧ê症头。医生劝伊，tiàm病院加hioh几工。素花烦恼明治，tī病院chhiâu-chhe̍k，kā彩娟七吩咐八交代：尿chū á khah chia̍p巡leh，若tâm tio̍h随换。…有掺牛奶ê物件m̄通hō͘食，pak肚bē堪得，会漏屎。…。心内想beh看gín-á，又koh惊病院传染病chē，若来传染着bai-khin tō费气。吩咐娟a m̄通hō͘来。按呢tú好tī病院tòa一礼拜，人有khah爽a，tō出院转来。

伊家己乖乖坐tī hia teh画图。桌顶一大张纸，画kah chia一chōa hia一chōa，chō-chō一大遍。素花才放心，问伊：“明治a，你teh画大只狗？”明治gia̍h头起来，目睭仁m̄ tin动，真真kā看，摇头kah比手，叫：“阿母，阿母。”素花起先m̄知伊ê意思，叫是看着伊转来，欢喜teh叫，讲：“阿母转来a。”koh看he图，chia一撇hia一撇，一堆大面kiáu幼面，mā是看无是狗抑是niau。才无张持注意看，上盖下面hia有画几粒细细ê圆kho͘ á，歪歪排一chōa。侥幸a，koh这几粒chhat红ê，hit几粒chhat绿ê!惊一tiô ，第一摆伊画有色ê，红色koh绿色！敢有可能hahN？！“阿母！阿母！”明治直直kā giú手，雄雄…雄雄才去想着，tō是teh画伊，tō是teh画伊ê阿母！敢有可能hahN？！He红ê绿ê圆kho͘ á tō是伊不时挂tī ām-kún ê hit kōaⁿ phoa̍h链，大粒红玻璃珠á lām大粒绿ê。无料想ê十分意外，欢喜kā明治抱起来âⁿ，lám leh hit粒尖尖ê头壳直直kā chim，tòe伊讲：“阿母，…是lah！是阿母lah！…”

咱欢喜ê脚步行过敢拢tio̍h留伤心ê脚号？世间事tō是按呢hahN？为啥物neh？因为欢喜抑是伤心拢bē使siuⁿ久。In 这二项tio̍h ài相并对比，咱才会心受深tah，ah无会惯势bē记得？明治入院khah无二礼拜，tō无救来过身离开--去。医生讲是超急性白血病，蒙古症ê gín-á生成bē勇，gâu tio̍h这款病。

花月ê头家娘thîn sa-kheh来敬in三个人，讲：“恭喜退休一周年”詹安铭老师、朱静水老师kap陈素花老师三人仝hit年退休，约束一年后tī花月见面。“詹老师，你气色lú来lú好，ah退休拢teh创啥？”花月头家娘kap大家干。“无lah。Ah to食饱êng-êng，peh山运动，四界去旅行chhit-thô，ta̍k位看看leh。”詹老师应。“阮顶个月mā chhiah ùi埃及转来。”“埃及o͘h！我一直拢想beh去。”“一定爱去一chōa。有价值lah。He金字塔、石像chiah大身、he 尼罗河…，你看，国王ê珠宝，连棺材mā金á作ê。”The̍h相片出来hō͘大家看，成实规khū棺材珠宝镶kah满满。头家娘讲：“Ai-ioh，chiah-nih súi!若是会tàng tâi tī chin，死mā值lah。”Kan-na素花tiām-tiām，静水问伊：“ Ah你去tó chhit-thô?”素花应：“无lah。Ah to拢无êng teh顾gín-á。”“顾gín-á?作妈a nih？”素花摇头：“我认ê lah。”“有影nih？ah无chhōa来大家看māi｡”素花讲：“来阮tau坐一下。我报恁看。”

Chhōa詹老师kap朱老师转来厝里。桌头排四张大张纸，拢画kah花花花，大chōa细chōa，大面幼面，chō kah一chhok一chhok，m̄知teh画啥。Kā看，ta̍k张上盖下面拢画几lōa个细粒圆kho͘ á，歪歪排作一chōa，有ê chhat红色，chhun ê chhat绿色。“你ê gín-á画ê?”“Hioh lah”“Gâu a。ah是几岁lah？”“12 a”“o͘h。”“恁看，画我这条phoa̍h链。”比挂tī ām-kún ê phoa̍h链，大粒红色koh绿色ê玻璃珠á。“有影tō tio̍h，画你ê phoa̍h链。”詹老师kap朱老师二人拢有同意。这时厝里电话giang，彩娟欢喜teh叫：“阿母，你紧来！我有一个好消息。”“啥物好消息？ah chín 电话先讲hō͘我知。”“我有身a，阿母。”In彩娟今年34，结婚5冬a，chit-má才beh生。莫怪大欢喜好消息。一时一粒大tè石头ùi koân-koân ê山崁poa̍h落来，teh tī心肝头，重重ián bē起来，也无想beh kā ián走。伊思想明治，思想30几冬前结婚了第一摆有身，医生检查讲婴á无正常，有蒙古症。上好是人工漏胎mài生。犹少年，才koh重生，…。伊无啥知影蒙古症是啥，总是无正常lah。

才koh重生，重生in彩娟。出世3公斤外，佳哉犹少年，重生了有好势，这个无蒙古症。总是拢会想m̄甘，蒙古症、无蒙古症拢会lah。Che tō是女性生成固执ê母性，kap in ê性命仝一条根、一条脉。漏胎才koh重生，亲像家己割一tè肉，teh挽根。留一个khî chiah大chōa，有tâng时á会giâ起来痛，khah chē冬mā犹会giâ起来痛。等退休了，io一个chit款ê gín-á来顾，想讲这个khî会khah bē koh giâ。“恭喜lah。彩娟，阿母kā你恭喜。”伊电话中kā查某kiáⁿ叫。“Teh beh作妈a？”詹老师、朱老师mā欢喜，讲：“恭喜lah。素花…后回阮beh去苏联chhit-thô才来招你。Thàn chit-má孙犹未出世，出去行行看看leh。”