《陈雷文选》

 | | | 转寄

为啥物háu a？雾社

作者 陈雷 2007.07.29

(1)

汤银花9岁hit年，生作kap伊老母9岁ê时仝款，sán-sán thiu-thiu，足gâu走pio。10月27日hit工，老母第一摆chhōa伊去社外hit个墓á埔，óa tī东旁ê山phiâⁿ，头前一chōa lò-lò长浅行ê山谷，无发树á，全是一人koân ê长草，一大片thàng去到山脚ê溪头。拢总无几个墓，mā无墓牌，kan-na óa内底hit个有一枝koân-koân直直，koh是乌石á磨金金刻ê。

达雅牵银花ê手去摸hit枝乌石á ê墓牌，嘴念：“阮为你háu，m̄-kú你无悲伤流目屎。”银花也tòe 伊念。了后，山尖ê日头ùi后山出来，照着土脚顶ê白雾，若像有人伸一枝长手，kā khàm tī山谷ê大领báng-tà掀起来，一时规枝山光iàⁿ-iàⁿ青piàng-piàng。已经7冬a，ta̍k冬这日伊拢来chia，摸这tè乌石á刻ê墓牌，念这句话，tō是马太福音内底也有按呢写。这日，头一摆chhōa银花来，也教伊念，因为银花已经9岁a，kap伊hit一年平大汉。

“咱为啥物为伊háu?”银花问。达雅chhōa伊转去厝，kā伊讲：“因为伊叫作宾踏。”“伊是啥人？”“Tō是我ê阿母。”The̍h一张有印súi字ê纸hō͘银花看。银花m̄ bat字，问：“Che是啥？”达雅坐ku t„土脚，讲昭和5年雾社公学校运动会ê代志。这时，雾社ê母á kiáⁿ拢犹讲in泰雅ê话，he声音kē-kē若手teh 拍战鼓，若山水sù-sù流…。“Hit阵我kap你仝款，足gâu走pio。…”这日，银花mā háu，为伊ê阿妈悲伤流目屎。

美凤9岁hit年，仁爱乡仁爱国小ê老师chhōa in去拜乡里一个新起ê大墓，规个白石á thia̍p ê，墓牌有刻大字：“莫那鲁道烈士之墓”。墓头前有几lōa chàn ê gîm-kîⁿ，上头前一个三节ê大门thiāu，顶面又koh刻大字：“碧血英风”。老师kā in讲，日本人kā莫那鲁道烈士ê骨头khǹg tī台湾大学医学院43冬，hō͘人作解剖实习。Chit-má政府特别kā伊sóa转来雾社，koh起chiah大个墓hō͘伊。美凤转来kā老母讲，莫那鲁道是中华民族ê英雄，伊有thâi死真chē日本人。

银花the̍h一张有印súi字ê纸hō͘查某kiáⁿ美凤看，嘴念：“咱为伊háu，m̄-kú伊无悲伤流目屎。” Hit时，雾社ê gín-á已经拢bē晓听in泰雅ê话，像拍战鼓ê声，若山水sù-sù流…。美凤听无老母ê话，银花用中国话koh念一遍。美凤看he纸，日本字读无，问老母：“咱为啥物为伊háu ？”老母应：“因为伊上盖勇敢。”“伊是啥人？”“伊是我ê阿妈。”

美凤真欢喜，the̍h hit张有印súi字ê纸去学校展phóng，kā老师讲：“伊上盖勇敢，伊是民族英雄。”老师看hit张纸，日本字读无。去请教蔡旺老师。蔡老师是咱雾社ê人，bat读过日本册。才知影是昭和5年能高郡郡守发hō͘佐冢淳子ê感谢状。因为雾社事件ê时，佐冢淳子有救2个日本gín-á。老师问：“这个佐冢淳子是啥人？”美凤讲：“我ê阿母讲，tō是伊ê阿妈。伊上盖勇敢。”老师问：“伊是日本人？”美凤应：“ M̄是。伊ê名叫作宾踏 。”老师惊一tiô，受气t„ 规班同学ê面前大声骂伊：“为啥物无像莫那鲁道thâi日本人！？为啥物koh救日本gín-á?！”骂伊无廉耻、民族败类。Kā hit张感谢状没收，the̍h去交校长。

(2)

达雅tú好去tī便所放尿，雄雄听着运动埕hè-hè叫ê声，叫是运动会已经开始，紧ùi便所出来。Kā看，规个运动埕ká-ká滚，一 大阵查甫人thǹg-pak-theh，hâ头巾，gia̍h刀gia̍h枪四界chông，若像teh赶鸡á，夭寿oh，hì-hè叫teh thâi人。达雅惊，oa̍t转来便所bih，也想beh走。看着另外二个查某gín-á，kap伊平平大汉，穿真súi ê日本衫，ku tī土脚phi̍h-phi̍h-chhoah 。顺续一手牵一个，giú leh tō lōng。达雅路熟，chhōa in入去树林内bih。等到足久无声a，才bi出来小路，ná行ná走。M̄知走外久，日头当me̍h，hit二个穿日本衫ê查某gín-á走bē行，tun tī路旁háu｡这时路hit头一个查某人āiⁿ一捆柴行来，达雅hoah：“In teh thâi人！In teh thâi人！”Hit个查某十八、九岁，ka短头毛，thǹg赤脚，穿一领破破破ê布衫，惊一大tiô,才知影公学校内出大代志，teh thâi日本人。赶紧kā hit二个查某gín-á ê súi衫thǹg掉，头鬃phián hō͘散iā-iā，me土砂粉抹面kō身躯。Kā三个gín-á chhōa转来社里bih 。

10月27日hit日，马赫坡社头目莫那卢鲁道chhōa头，ham八社ê三百个战士攻击雾社公学校kap驻在所。拢总thâi死一百外个日本人，能高郡郡守kap雾社分室主任在内。走去校长宿舍bih ê妇仁人kap gín-á全部thâi死。有二个thâi无死，藏tī一堆身尸内底，三日后才走出来。佐冢和子kap近藤春子因为tú好tī便所放尿，tòe达雅走有lī。半路遇着马希巴托翁社ê少年查某宾踏，kā in救转去社--里，化装作社里ê查某gín-á藏起来，结局也无死。

经过beh二个月，雾社战事差不多结束，thâi chhun ê八社ê人bih tī山洞内，日本兵拍bē着，放毒瓦斯攻击。结果参加战事ê八社，查甫查某、大人gín-á战死、烧死、自杀ê拢总有六百外人。达雅ê pē母kap二个阿姊，in是塔罗湾社ê人，mā tī山洞内吊tāu自杀，一家chhun达雅一个。不而过，到大汉达雅拢m̄知影，in tau规家人是按怎无去ê。

事件了后三个月，代志定着落来。宾踏chhōa佐冢和子kap近藤春子去雾社分室，kā in交hō͘巡查。调查起来，知影这二个gín-á ê pē母tī运动会hit日hō͘泰雅ê战士thâi死，变作孤儿。日本人感谢宾踏救这二个日本gín-á，能高郡郡守代表政府，发一张印súi字ê感谢状hō͘宾踏，koh用gín-á pē母ê姓佐冢hō͘伊，kā伊改名作佐冢淳子。

宾踏chhōa达雅大汉，kā这个孤儿khioh作家己ê查某kiáⁿ。尾a，日本人kā八社thâi chhun ê人全部sóa去北港溪头óa khah山脚ê所在，tō是chit-má仁爱乡互助村hia。原来ê雾社叫无参加事件ê泰雅人搬入去tòa,也tō是chit-má ê仁爱乡雾社。

10冬后，昭和15年ê脚tau，宾踏过身。Hit时大东亚战争已经3年。日本人犹会记得雾社事件ê时，马希托巴翁社泰雅人宾踏救日本gín-á ê代志。特别为伊tâi tī社外东旁青翠ê蕃草岭hia，koh作一su彩色有印súi花ê和服hō͘伊穿，chhāi一枝乌石á磨金ê墓牌，刻佐冢淳子ê名。

(3)

仁爱国小ê校长the̍h着hit张印日本字ê感谢状，惊出代志，家己m̄敢处理，交去hō͘仁爱乡派出所。派出所叫汤银花去问。银花讲宾踏tī雾社事件时ê代志。警察问：“墓tī tó位？”银花chhōa警察去蕃草岭ê墓á埔。警察一看是日本字、日本名ê墓牌、受气骂伊：“真他妈的！不知廉耻！” 叫村里ê人giâ杠槌á来hám，mau-mau作四koe̍h。Hit张感谢状没收，折kah碎碎，cho̍h tòa屎ha̍k á里。

1999年9月大地动，蕃草岭山崩，墓á埔规遍tâi无看去。不而过hit个以后，hit tah原在kāu雾，若等一时a山尖ê日头ùi后山出来，照着土脚，tō亲像有人伸一枝大手，tiām-tiām-á kā这领大领báng-tà掀起来，茫雾散去。Tō看会出规个新翻ê山phiâⁿ若臭头光光秃秃，连hit chōa lò-lò长浅行ê山谷，mā hō͘崩落来ê烂土砂石thūn kah tīⁿ-tīⁿ ah。Hit个以后，雾社ê人时常有人念，阮为伊háu ，m̄-kú伊无悲伤流目屎。