《陈雷文选》

 | | | 转寄

学甲公

作者 陈雷 2007.06.24

Tī台南县散乡ê盐分地带，kap佳里兴相隔壁有一个小所在叫作学甲。以前以前，chia也是一个富裕ê乡庄。Taⁿ现在，若是去到hia斟酌看，mā犹看会着一寡hiàng时好额人ê物件。

有一时，学甲会使讲是姓黄ê乡里，凡是看会着踏会着ê拢是in ê土地。人讲用行ê，按透早到透暗to行bē出姓黄ê田园。Chit-má tī hia犹有真chē姓黄ê家户，大部分是学甲公ê后代。关于这个学甲公，有一寡奇巧ê传说，老大人hit辈犹有人讲会出来，khah少年ê tō无人知影lah。总是公路边hit间黄氏宗亲祠大厝内面，也有文件ê记录，应该是相当可靠才tio̍h。

Hit个cheng-piàng贼hō͘人斩头ê时才21岁，照讲在世无亲无成，单身一个。头斩了，衙门ê工a kā伊拖出去无人所到ê野地，chhìn-chhái土脚óe一空，一堆土khàm-khàm leh准是，无棺材，也无khiā牌á。

Taⁿ这个cheng-piàng贼虽然作人真雄，抢钱抢人，也bat thâi人，总是到尾来，也有一点后悔归善ê心意。He顾监（kaⁿ）ê看伊孤单一个，无人the̍h物来巴结，无油水ê好处，拢无beh chhap伊。加减也kā虐待，有时骂pháiⁿ嘴，有时拍皮肉，iau-sò也不管伊。Hin内面，单单有一个少年新来ê叫作阿余，m̄ bat衙门ê风俗规矩，无计较伊，会kā伊同情，the̍h水hō͘伊lim，mā chhōe物hō͘伊食。

讲也是真不幸，这个cheng-piàng贼beh hō͘人斩头ê前一暗，雄雄pak肚起大痛。顾监ê讲是天意teh责罚，据在伊哀，无人beh chhap伊。Kan-na这个阿余不忍心，来看伊，偷偷the̍h药hō͘伊吞。这个贼kā伊讲：「我陈直来chia监牢三个月，bē输地狱，受尽虐待，kan-na你一个掠我作人款待。Taⁿ明á chài我tō beh去ah，上无你也hō͘我知影你ê名。」顾监ê讲：「我名作庆余，人叫我阿余。」He贼讲：「我身躯顶空空无半项，尽有ê这条裤带也已经tòe我半世人，请你the̍h--去，算是我答谢你。」裤带tháu起来tō the̍h hō͘伊。阿余看伊诚意，pháiⁿ势推辞，裤带the̍h来hâ tòe家己ê裤头，tú好pa̍k二liàn。隔转日中昼，阿余koh来看he贼，人teh beh ah出去，he贼oa̍t头过来细声kā阿余讲：「Chhun ê看会着、摸会着ê拢你ê!」阿余看陈直一kho͘人，chhun ê看会着、摸会着ê tō是一身躯ê破衫破裤，心内爱笑koh同情伊。敢是beh去以前，惊了破胆，讲心虚ê话？细声kā劝：「无要紧，你taⁿ安心去。到hia kā神明chhē m̄是。」He贼无koh应，to ah出去斩头。

阿余转来厝，kā in某环a讲cheng-piàng贼ê代志。裤带tháu起来hō͘环a看。一条长长，双头拍二个结。环a讲：「我来洗清气。」一条裤带摸来摸去，摸着有位tēng-teng厚厚，m̄知啥物。用铰刀kā线剪开，内面chiⁿ一tè布条（liâu）á。抽出来灯火脚看，龟怪有一chōa乌墨字：「鹅头墓á 埔，老chhêng一百步。人去身无去，向东大风度。」m̄知啥物意思。环a问：「Che贼beh去进前，有kā你讲啥？」阿余讲：「那有，伊讲chhun ê看会着、摸会着ê拢我ê。」环a问：「Ah伊看会着、摸会着犹有啥？」阿余讲：「Thài有，一身躯ê破衫破裤niā。」环a听了龟怪，kā阿余讲:「你去看，he墓á 埔hia有啥物。」阿余想，敢是这个cheng-piàng贼teh创治我，he墓á 埔tō是人去了鬼tòa ê所在，那有啥通好看！隔日家己一个bi去墓地，tō是khah早人赶鹅ê所在，所以叫作鹅头墓á 埔。成实中央一欉ām-ām ê大chhêng，有牛车lián hia粗，lò-lò长ê chhêng须拖到土脚。阿余khiā tī chhêng头，四kho͘ liàn转kā看，零零（lân）散散（san）ê墓，chhun ê tō是草。目睭利利（lāi）koh kā瞻（chiam），远远对东一间细细ê土地公祠。向东kā行，tú tú一百步来到一个圆圆ê墓龟，长草ām-ām，koh有一支牌，顶面简单七字：「陈公直之墓」。大惊一tiô，明明这个陈直死了hō͘人choh tī野地，那会koh有一个墓tī chia？

转去讲hō͘环a听，环a问：「Ah he墓牌年月日写tiâng时？」阿余讲：「Tō是无。」环--a讲：「我听讲he cheng-piàng贼khiàn-sńg，平时pháiⁿ事作siuⁿ chē，m̄知tiang时beh hō͘人掠去斩头，恐惊身尸choh tī野地，无人收tâi，所以先问神明，拣一个所在。Taⁿ chit-má beh拜托你kā伊安tâi。」翁某二人想一暝，咱作人一件好事，khah嬴拜一世人ê佛。Tō khêng一寡钱，买一副薄板，拜托衙门ê 工á 偷偷去野地kā陈直ê身尸kap断头khioh转来，用牛车载转来学甲。

等到hit时天暗，翁某二人kā陈直车来墓á 埔。Ùi大chhêng向东一百步ê所在，照伊ê意思，he墓龟tō来深深掘一空，beh来kā伊安tâi。掘到一人深ê所在，雄雄khiang一下一声，soah掘bē落去。M̄信大力koh掘一下，又koh khiang一声，mā是掘bē落去。伸手kā摸，喝讲：「Bē活ah！」soah摸着一me石á ！环a tī土空顶用火chhio，áⁿ落去看，侥幸oh，圆圆扁扁一tè一tè，那是石á ！He阿余khioh一tè来手里看，lut清气，阿娘喂！白白sih-sih，现现一tè大龙银。M̄信koh sa一tè来身躯lù，mā是白sih-sih，又koh 一tè龙银。二个kā khok看māi，khin-khin khiang-khiang，钱teh唱歌。赶紧áⁿ落去双手ó͘，soah ó͘一个瓮á 出来，脚桶hiah大个，tīⁿ-tīⁿ拢总是khiang-khiang叫ê龙银。出力kā hia̍p，那mo͘h会tin动！环a看伊mo͘h bē赢，tī土空顶喝：「我来ah！」作一下跳跳落来，poa̍h倒tǹg tī土坐。Tǹg一下大力，kha-chhng痛，伸手去摸，规把ê龙银。 侥幸，he kha-chhng tú好tǹg tī hit瓮龙银ê顶面，喝讲 ：「余a，che钱财tòe tī我kha-chhng头。」

二人tī hia舞一晡，一个瓮a才mo͘h起来车顶。好礼kā陈直kǹg落土空tâi，厚土khàm一个墓龟，墓牌khiā好，chhòng-chhòng周至，已经天beh拍phú光。赶紧牛车驶转来，一个瓮a mo͘h入来厝内面。青狂mo͘h了làu手，soah chhia一倒。He龙银 li-li la-la，tin-tin tong-tong，chhia kah一土脚。一kā看，佛祖a，也有金，也有银，也有珠，也有玉。二个人四蕾目睭lin-lin long-long kho̍k-kho̍k liàn，thài会赴看？规土脚m̄是黄ê tō是白ê，m̄是圆ê tō是扁ê。阿余问in某：「环a，che敢拢是真ê?」环a khioh一脚金环来挂，ni一tè玉心a来摸，koh sa一kōaⁿ真珠拔链khǹg tī嘴咬，咬bē落，讲：「真ê，真ê。」紧张kah脚手chhoah，欢喜笑一下尿soah siàm出来，kā翁讲：「余a，我暝时作梦见若chhoah尿，人tō醒。Chit-má尿出来ah，人犹tī chia，物犹tī chia，che…che m̄是真ê犹是啥？！」阿余讲：「环a，ah若m̄是teh作梦，我thài会目睭hóaⁿ-hóaⁿ，头壳重重，脚手浮浮，若像无sit也会飞？」这时外面鸡啼，才知影天teh光，阿余问：「TaNbeh按怎？」in某捧一phóng龙银，大嘴笑西西：「Beh按怎？Taⁿ chia ê物…我来食好穿好，欢喜chhit-thô。」阿余讲：「Chia ê物m̄是咱ê。」环a问：「M̄是咱ê，啥人ê?」Koh讲：「你bē记得，he贼beh去进前有kā你讲，chhun ê看会着ê、摸会着ê，拢你ê。Taⁿ chia ê物件，现现看也会着摸也会着，m̄是你ê犹是啥人ê?！」阿余摇头：「Che物m̄是咱ê，也m̄是陈直ê。」in某讲：「明明tâi tī伊ê墓内面，按怎m̄是伊ê?！」阿余讲：「Che拢是作贼抢来ê，m̄是伊ê，也m̄是咱ê。」环a看hia ê金，hia ê银，hia ê玉，hia ê珠，雾雾sà-sà，听有koh听无，问in翁：「Taⁿ beh按怎？」阿余伸手去瓮a内ni三tè龙银出来，tòa衫里lù hō͘金，khǹg tī手里，讲：「这三tè龙银m̄知啥人ê，先借来用。」赶紧眠床sóa一边，土脚ó͘一空，kā瓮a tâi tòa hin。

过来衙门ê头路辞掉，转来学甲。Kā hit三tè龙银卖掉作本钱，改作卖杂货ê生理，lú作lú大。尾a兼作作糖ê买卖，thàn有钱，tī学甲hak bē少田，tō是北门ê好额人。算起来大约是日本来进前，满清hiàng时道光ê时代。后来伊ê后代尊伊作学甲公，tō是学甲黄氏宗族ê开山太祖公。不过时间久了，有人kā这项代志讲走choa̍h去，讲学甲姓黄家族原来是cheng-piàng贼ê后代，七a斗八a，并无正确，che以后我才koh另外说明。也有人讲是陈直hit tè墓地好风水，「老chhêng一百步，向东大风度」，致荫伊ê后代ê关系。不过风水che代志，我外行。若是请教有经验ê地理师，in讲咱不懂。He龙风紫气，in看会着，咱看bē着，所以bē-tàng作一个确定ê评论。

总是关于学甲公黄庆余ê传说续落犹koh有，有ê无啥人知影。等以后「台文通讯」ê页面有空位ê时，才koh写来hō͘大家参考。