《陈雷文选》

 | | | 转寄

恺悦公主

作者 陈雷 2007.06.10

"Chi̍tpah bān! chi̍tpah bān! chi̍tpah bān! …"Hōng'a tōa siaⁿ hiu, siang chhiú gia̍h koân kàisêng teh hoah bānsòe."chi̍tpah bān! chi̍tpah bān! …"Chùn'a tòe i hán, kā Hōng'a kui sengkhu mo͘h khílâi se̍h. Chùn'a lâng sè hiuⁿ, Hōng'a sin pûi thún, tian chi̍t ē chhe chi̍t sut á siaktó. Putkò sūsi̍t chóngsò͘ sī 99 bān, sǹg nn̄g pái a, kah bô chi̍tpah bān. Hoah chi̍tpah bān ke chin sóng tō sī.

"lâi! góa chhōa lí lâikhì Soho bé súi saⁿ! kìchāi lí kéng, khòaⁿ beh kúi cha̍p niá …"kā Hōng'a kûi leh chim, chim kah Hōng'a ngiau, gī-gī chhiò. He chîⁿ nā kimchóa chi̍t pé chi̍t pé la̍k-la̍k iā,"chi̍t bān, nn̄gbān, saⁿbān …", kui thô͘kha lóng sī.

"lí khòaⁿ! Chùn'a!"Hōng'a hoah tōa siaⁿ, chí hit tâi tiānsī."lí khòaⁿ! lí lah! sī lí lah!"Chùn'a kiaⁿ chi̍t tiô, siang chhiú kā Hōng'a ê io pàng khì."Koh lâi te̍kpia̍t pòkò, kin'áji̍t ēpo͘, thiⁿ bó tang lō͘ Gio̍ksan gînhâng chhiúⁿkiap àn …"Koh pàng chhiúⁿkiap hiāntiûⁿ ê lo̍kiáⁿ."iùsut'á, 20 thóng hòe, 155 konghun, phīⁿ thâu chi̍t lia̍p o͘ kì …"Taⁿ hāi a, hit ê chìnchêng, i ū khì Gio̍ksan gînhâng khòaⁿ kúinā pái, bêngbêng bô khòaⁿ tio̍h ū kàmsī ê hipsiòngki. Iausiū oh, m̄ chai tī tóūi khì hō͘ hip khì? kóaⁿkín hia ê chîⁿ khioh-khioh leh, ūntōng tē'á tē chi̍t tē, anchoân bō tì leh, sái o͘-to͘-bái cháu khì éng hô Hōng'a in bó a hia bih.

Keh choán ji̍t chiâⁿsi̍t chài Hōng'a khì Soho bé súi saⁿ. Chùn'a kiaⁿ hō͘ lâng jīn tio̍h, anchoân bō tì tiâu-tiâu, m̄ káⁿ thǹg lo̍hlâi. O͘-to͘-bái thêng tiàm Soho thâuchêng, kā Hōng'a kóng,"lí ji̍pkhì tō hó. Góa tòa chia tán."Hōng'a phêpauá kōaⁿ leh, kakī chi̍tê lâng ji̍pkhì, chi̍t lâu kàu gō͘ lâu, se̍h nn̄g tiám gōa cheng chiah chhutlâi. Siang chhiú kōaⁿ saⁿê tē'á chiah tōa ê.

Seng chhēng chi̍t su pâng kim hoekan o͘ ê lého̍k hō͘ Chùn'a khòaⁿ, tn̂gtn̂g thoa kàu thô͘kha. Koh lâi ōaⁿ chi̍t thò pe̍h pho pho ê iûⁿ chng, kah chi̍t niá té-té-té ê bê lí kûn. Sòa lo̍hlâi thǹg kah kngkng, moa chi̍t su húnâng á pòaⁿ thangkng ê lāité saⁿ kûn, lāibīn chi̍t niá ū le-suh ê sèsè e̍h-e̍h ê saⁿkak khò͘,"lí khòaⁿ! Kháiia̍t kongchú Tân Kimhōng!"chi̍tsiang saⁿ chhùn koân kia̍h'á se̍h chi̍t liàn, chhe chi̍t sut á oaihN chi̍t tò. Chùn'a khòaⁿ kah chē bē tiâu, khí kông peh khílâi kha lâi chhiú lâi, ngia̍uh-ngia̍uh bong. Hōng'a m̄ hō͘ i bong."lí kakī kóng ê, thànchîⁿ hoat pōng, beh chhōa góa khì Kháiia̍t, tòa kongchú thò pâng ""bêng á chài, bêng á chài lâikhì tòa."Tō beh kap Hōng'a sńg. Hōng'a kā sak cháu, m̄ kap i sńg."bêng á chài, bêng á chài chiah phah sǹg."Súi saⁿ súi khò͘ siu siu khí lâi. Kìchāi Chùn'a chhit ko͘ chiâⁿ peh ko͘ chiâⁿ, m̄ tō sī m̄.

Hit kúi ji̍t tiānsī bô sinbûn, thiⁿ bó tang lō͘ Gio̍ksan gînhâng chhiúⁿkiap àn pò kúi 偌 pái. Ta̍k pái hipsiōng chhutlâi, phīⁿ thâu chi̍t lia̍p kì, chiàⁿbīn, piⁿ'á bīn lóng ū, chhengchheng chhóchhó. Chùn'a bih tī Hōng'a in bó a hia, kui ji̍t m̄ káⁿ chhutmn̂g, ná káⁿ khì tòa Kháiia̍t?! Kan-na chásî o͘-to͘-bái chài Hōng'a ùi éng hô khì Tāipak siōngpan, anchoân bō khàm ba̍tba̍t, m̄ káⁿ thǹg khílâi. Ánne kòe saⁿ lépài, ji̍tsî koaiⁿ chhù lāi, àmsî hō͘ Hōng'a 刁 kó͘tóng chhòng tī, ōaⁿ súi saⁿ súi khò͘ hō͘ i khòaⁿ, hiâu-hoe sái ba̍kbé, bî bîchhiò, kā i siâⁿ,"Kháiia̍t kongchú Tân Kimhōng."Tō sī kan-na m̄ hō͘ i bong.

Ánne ta-sò koh chheⁿiau, tī hia siūkhó͘ siūⁿ bô pō͘. Túhó bô gōa kú hôpêng pēⁿīⁿ pēⁿ àn po̍khoat, Tâipak Chhī"satsí （SARS）"tōa liûhêng. Chùn'a khòaⁿ tiānsī teh pò, keálō͘, tiàm ni̍h sìkè lóng sûi lâng tah chi̍tê ma-su-khuh, bīn am kah bā-bā, m̄ káⁿ chhoán khùi, kiaⁿ hō͘ lâng òe tio̍h"satsí". Chi̍t sî siūⁿtio̍h chi̍tê hó pō͘, thiàu khí lâi hiu,"Hōng'a, góa chhōa lí lâikhì Kháiia̍t."

Kòa chi̍tê N95 ma-su-khuh, koh lēnggōa ēng sepò͘ choh chi̍tê tōa chhùi am, túhó tōabīn khàm bā-bā, chhun hia̍h-á kap ba̍kchiu. O͘-to͘-bái sái leh, lâi kàu Soho, tōa 扮tō ji̍pkhì. Bé chi̍t su nâ hái ê sechong, kim tauh-liú-á ê sia-chuh, Italíah si á ne-khu-tái, koh chi̍tsiang satba̍k'á hî thâu chiamchiam ê o͘ phôeê.

Nn̄g kòjîn chhēng chhēng hósè, he chapo͘ ê suibóng bô sèng kám lâm chheⁿ Gary Cooper ê phàithâu, lâng kóng saⁿ phiat lâng tō ian, mā ū saⁿ, sì pun chhengchhun lâm chheⁿ Koa Chùnhiông ê pānsè. He chhâ bó͘ ê suibóng bô kongchú bêngseng Grace Kelly ê hongtō͘, lâng kóng koân屐 saⁿ chhùn io̍h, kha-chhng thâu tō ū hong, mā ū sì, gō͘ pun tōatáⁿ gējîn X Hiáutan ê chusè. Nn̄g lâng N95 kiam sepò͘ ê ma-su-kuh tah leh, tha-khu-sih chē leh, sáng-sáng sèsè lâi kàu Kháiia̍t.

Tòa gō͘ chheⁿ Kháiia̍t tōa pn̄g tiàm kongchú thò pâng, chia̍h ê sī Hoatkok sek sai chhan, gû iû chhi-suh, gia̍h to gia̍h chhiám, lim ê sī n̂gkim kam tiⁿ ê siang-phéng, phih-phih pho̍k-pho̍k pù-phok-á, khin-khin khiang-khiang chiúpoeá; chhēng ê sī pòaⁿ thangkng ê sebāng kòa le-suh, khòaⁿ khílâi iⁿ-iⁿ iáⁿ-iáⁿ, khah siông sī bong bong so-so, thǹg kah kngkng; khùn ê sī tah báng-tà ê hônghō͘ bînchhn̂g, tó lo̍hkhì nńg-nńg sìm-sìm, iô iô chhe̍k-chhe̍k, hoaⁿhoaⁿ híhí, kui mê bián khùn.

Nn̄g mê nn̄g ji̍tthâu kàu bóe choântêng lum sa-bi-suh（room service）, chi̍t pō͘ bián ta̍h chhut kongchú pângkeng ê mn̂g. Hit ji̍t tiongtàu līkhui gō͘ chheⁿ Kháiia̍t, he siàuliân bo͘-i（boy） chhēng chi̍t sin âng jiông khan kim si chèho̍k, tì chi̍t téng keⁿ̄g ko koân bō, khàm chi̍tê N95 ma-su-khuh, khiā chiàⁿchiàⁿ tī tōamn̂g kháu tán. Bō'á thǹg khílâi, kā in tàm tōa lé, kóng,"Thank yo͘, tosiā kng lîm."Chùn'a thêng chi̍t khapō͘, kiâⁿ óa khì, tu chi̍t tiuⁿ chi̍t chheng kho͘ ê chih-puh hō͘ i, kóng,"Very good. "He bo͘-i koh áu chi̍tê tōa lé, ia̍t chi̍t hēchhiú, hut chi̍t ē tha-khu-sih tú lâi kàu bīnthâuchêng.

Chi̍tlō͘ hi-hi haha, chhiò tńglâi kàu éng hô. Hāngá kháu khiā nn̄g ê kéngchhat á teh tán. Hâ té chhiuⁿ, chhēng tòng chhèngchí ê saⁿ, kòa ' khòng satsí ' ê ma-su-khuh, chhun chhiú cha̍h leh m̄ hō͘ in kòe."chhiáⁿ lín chit-má chiāmsî m̄ thongkòe.""Ai-ioh, sī siáⁿmi̍h tāichì?"Hōng'a késian mn̄g."hāngá lāi teh lia̍h lâng.""chinchiàⁿ ê? lia̍h siáⁿmi̍h lâng?"Hōng'a késian kiaⁿ."chhiúⁿ gînhâng ê, ū chhiuⁿ gûihiám.""Ôa, beh kiaⁿ sílâng!"nn̄g ê kóaⁿkín liu soan.

Kòelâi pài it Chùn'a chài Hōng'a lâi kàu Kháiia̍t tōamn̂g kháu, túhó chi̍t tùi a-tok-á chhiú khan chhiú ùi lāibīn chhutlâi. Chapo͘ ê thì kngthâu, kòa hīⁿkau, chhâ bó͘ ê chhēng gû'á khò͘, moa tésaⁿ, hiān tō͘châi. Hit ê chhēng âng jiông khan kim si ê bo͘-i khiā ti̍tti̍t, keⁿ̄g ko bō'á thuh khí lâi kiâⁿ tōa lé, kóng,"Thank yo͘! Come again."He a-tok-á kàisêng bô khòaⁿ tio̍h iā bô thiaⁿ tio̍h, ma-su-khu kòa tiâu leh, tī tōamn̂g kháu lám leh siochim, teh kóng bye-bye. Hōng'a ùi Kháiia̍t oânkang chhutji̍p ê āupiah mn̂g ji̍pkhì. Che ji̍t siōngpan, chiàusiông sàu thô͘kha chheng pângkeng, kàu àm sî cha̍p tiám hāpan, kui ji̍t bi-bi-á chhiò. Khoán hit keng kongchú thò pâng ê sî, bong he bînchhn̂g nńg-nńg sìm-sìm, iô iô chhe̍k-chhe̍k, chhùi ná liām,"Kháiia̍t kongchú Tân Kimhōng …, Bóng hihán lah."


「一百万！一百万！一百万！…」凤a大声hiu，双手gia̍h koân概成teh hoah万岁。「一百万！一百万！…」俊a tòe伊hán，kā凤a规身躯mo͘h起来se̍h。俊a人细hiuⁿ，凤a身肥thún，颠一下差一sut á siak倒。不过事实总数是99万，算二摆a，kah无一百万。Hoah一百万加真爽tō是。

「来！我chhōa你来去Soho买súi衫！据在你kéng，看beh几十领…」kā凤a kûi leh chim，chim kah 凤a ngiau，gī-gī笑。He钱若金纸一把一把la̍k-la̍k iā，「一万，二万，三万…」，规土脚拢是。

「你看！俊a！」凤a hoah大声，指hit台电视。「你看！你lah！是你lah！」俊a惊一tiô，双手kā凤a ê腰放去。「Koh来特别报告，今á日下晡，天母东路玉山银行抢劫案…」Koh放抢劫现场ê录影。「查甫人，20 thóng岁，155公分，鼻头一粒乌痣…」Taⁿ害a，hit个进前，伊有去玉山银行看几nā摆，明明无看着有监视ê hip相机。夭寿oh，m̄知tī tó位去hō͘ hip去？赶紧hia ê钱khioh-khioh--leh，运动袋á袋一袋，安全帽tì leh，驶o͘-to͘-bái走去永和凤a in母a hia bih。

隔转日成实载凤a去Soho买súi衫。俊a惊hō͘人认着，安全帽tì tiâu-tiâu，m̄敢thǹg落来。O͘-to͘-bái停tiàm Soho头前，kā凤a讲：「你入去tō好。我tòa chia等。」凤a皮包á kōaⁿ leh，家己一个人入去，一楼到五楼，se̍h二点外钟才出来。双手kōaⁿ三个袋á chiah大ê。

先穿一su pâng金花干乌ê礼服hō͘俊a看，长长拖到土脚。Koh来换一套白波波ê洋装，kah一领té-té-té ê迷你裙。续落来thǹg kah光光，moa一su粉红á半通光ê内底衫裙，内面一领有le-suh ê细细e̍h-e̍h ê三角裤，「你看！恺悦公主陈金凤！」一双三寸koân屐á se̍h一liàn，差一sut á oaihN一倒。俊a看kah坐bē tiâu，起狂peh起来脚来手来，ngia̍uh-ngia̍uh摸。凤a m̄ hō͘伊摸。「你家己讲ê ，thàn钱发pōng，beh chhōa我去恺悦，tòa公主套房 」「明á chài，明á chài来去tòa。」Tō beh kap凤a sńg。凤a kā sak走，m̄ kap伊sńg。「明á chài，明á chài才拍算。」Súi衫súi裤收收起来。据在俊a七姑成八姑成，m̄ tō是m̄。

Hit几日电视无新闻，天母东路玉山银行抢劫案报几偌摆。Ta̍k摆hip相出来，鼻头一粒痣，正面、边á面拢有，清清楚楚。俊a bih tī凤a in母a hia，规日m̄敢出门，ná敢去tòa恺悦？！Kan-na早时o͘-to͘-bái载凤a ùi永和去台北上班，安全帽khàm密密，m̄敢thǹg起来。按呢过三礼拜，日时关厝内，暗时hō͘凤a刁古董创治，换súi衫súi裤hō͘伊看，hiâu-hoe使目尾，微微笑，kā伊siâⁿ：「恺悦公主陈金凤。」Tō是kan-na m̄ hō͘伊摸。

按呢ta-sò koh生iau，tī hia受苦想无步。Tú好无外久和平病院病案爆发，台北市「杀死（SARS）」大流行。俊a看电视teh报，街á路、店里四界拢随人tah一个ma-su-khuh，面掩kah bā-bā，m̄敢喘khùi，惊hō͘人òe着「杀死」。一时想着一个好步，跳起来hiu：「凤a，我chhōa你来去恺悦。」

挂一个N95 ma-su-khuh，koh另外用纱布作一个大嘴掩，tú好大面khàm bā-bā，chhun hia̍h-á kap目睭。O͘-to͘-bái驶leh，来到Soho，大扮tō入去。买一su蓝海ê西装，金tauh-liú-á ê sia-chuh，意大利丝á ne-khu-tái，koh一双虱目á鱼头尖尖ê乌皮鞋。

二个人穿穿好势，he查甫ê虽罔无性感男星Gary Cooper ê派头，人讲衫撇人tō ian，mā有三、四分青春男星柯俊雄ê扮势。He查某ê虽罔无公主明星Grace Kelly ê风度，人讲koân屐三寸io̍h，kha-chhng头tō有风，mā有四、五分大胆艺人X晓丹ê姿势。二人N95兼纱布ê ma-su-kuh tah leh，tha-khu-sih坐leh，sáng-sáng势势来到恺悦。

Tòa五星恺悦大饭店公主套房，食ê是法国式西餐，牛油chhi-suh，gia̍h刀gia̍h chhiám，lim ê是黄金甘tiⁿ ê siang-phéng，phih-phih pho̍k-pho̍k pù-phok-á，khin-khin khiang-khiang 酒杯á;穿ê是半通光ê纱网挂le-suh，看起来iⁿ-iⁿ iáⁿ-iáⁿ，khah常是摸摸so-so，thǹg kah光光；困ê是tah báng-tà ê皇后眠床，倒落去nńg-nńg sìm -sìm，摇摇chhe̍k-chhe̍k，欢欢喜喜，规暝免困。

二暝二日头到尾全程lum sa-bi-suh（room service），一步免踏出公主房间ê门。Hit日中昼离开五星恺悦，he少年bo͘-i（boy）穿一身红绒牵金丝制服，tì一顶鸡卵糕koân帽，khàm一个N95 ma-su-khuh，khiā正正tī大门口等。帽á thǹg起来，kā in tàm大礼，讲：「Thank yo͘，多谢光临。」俊a停一脚步，行óa去，tu一张一千kho͘ ê chih-puh hō͘伊，讲：「Very good。 」He bo͘-i koh áu一个大礼，ia̍t一下手，hut一下 tha-khu-sih tú来到面头前。

一路hi-hi哈哈，笑转来到永和。巷á口khiā二个警察á teh等。Hâ短枪、穿挡枪chí ê衫，挂『抗杀死』ê ma-su-khuh，伸手遮leh m̄ hō͘ in过。「请恁chit-má暂时m̄通过。」「Ai-ioh，是啥物代志？」凤a假仙问。「巷á内teh掠人。」「真正ê?掠啥物人？」凤a假仙惊。「抢银行ê，有枪危险。」「Ôa，beh惊死人！」二个赶紧溜soan。

过来拜一俊a载凤a来到恺悦大门口，tú好一对a-tok-á手牵手ùi内面出来。查甫ê剃光头、挂耳钩，查某ê穿牛á裤、moa短衫、现肚脐。Hit个穿红绒牵金丝ê bo͘-i khiā直直，鸡卵糕帽á thuh起来行大礼，讲：「Thank yo͘！Come again。」He a-tok-á概成无看着也无听着，ma-su-khu挂tiâu leh，tī大门口lám leh相chim，teh讲bye-bye。凤a ùi恺悦员工出入ê后壁门入去。这日上班，照常扫土脚清房间，到暗时十点下班，规日bi-bi-á笑。款hit间公主套房ê时，摸he眠床nńg-nńg sìm-sìm，摇摇chhe̍k-chhe̍k，嘴ná念：「恺悦公主陈金凤…，Bóng稀罕lah。」