《陈雷文选》

 | | | 转寄

生kiáⁿ发pōng

作者 陈雷 2007.05.27

林美娘以前对龙无啥认识。有身了后，亲身经验，才知影龙ê厉害。本来田庄人顾三顿上要紧，ná有êng工去计较che有若无ê物件？嫁来张家了后，in张家tī台中有一间大厝，tī大雅有一个大墓。Che大厝kap大墓靠风水teh运转，龙ê大志就是按hia来。

M̄-koh张家tī这方面上有研究ê犹是美娘ê ta家张李氏枝，并m̄是学历ê关系。李氏虽然无读册，m̄-koh伊有bat一位风水师父，自来深交，chē少有kā伊指点兼引示。这位师父眼看虚无界，手算渺茫事，嘴讲了然语，心想金银事，人叫伊作真眼大师。可惜十全功夫欠一点，作人有一个爱钱癖。替人看风水作好事，若是红包包无够，伊就chhìn-chhái kā你看，兔穴猫穴乌白报，he你就凄惨食力几lōa代。风水这款事ná会hō͘你滚笑得？

美娘ê ta官khioh金hit chām，师父tī大雅点指着一个好位。后面一条沟，头前一phō竹，讲是龙tòa ê所在。李氏枝hō͘师父一点开，lú看lú有影。明明土脚平平，看作一窟深深，臭沟á有龙teh siû水。包一包红包谢师父，师父嘴讲m̄免，心内想，咱法术界人士，靠这枝嘴食饭，收人chiah chē钱，无加讲几句好话mā pháiⁿ势。Ká李氏枝讲：「我实在kā你讲，这句话你m̄通讲hō͘别人知。这穴是百年穴，teh beh成果。我看恁张家无lōa久就会生龙子，龙穴添龙，一定发pōng大趁钱！」

Tú好hit年龙年李氏chhōa新妇。这新妇林美娘田庄人好性格，ta̍k项代志顺人意，bē kap人计较。有身了后，ta家chhōa新妇去看邱妇产科，问医生：「是查甫抑是查某？」医生hip超音波，the̍h相片hō͘伊看，这婴á有一枝té-té ê，正正是查甫。

李氏枝心内想，师父比医生khah高明，免照就知。掠一只chhio鸡kap一打鸡卵去谢师父，kā师父讲：「Hō͘你讲kap准准。阮新妇beh生后生。」

The̍h相片hō͘师父看：「你看这婴á，医生讲，chia这枝té-té ê tō是查甫ê。」

师父问伊：「Tâng时beh生？」

李氏枝讲：「医生算是二月十四。」

师父听了面变色，摇头讲：「今年生龙，龙穴添龙，大发pōng。明年生蛇，龙穴生蛇，m̄是好事！」

李氏枝问：「怎样m̄好？」

师父m̄讲，伸手桌顶摸一粒生鸡卵来手里，tiām-tiām出一个力，鸡卵tēⁿ破去。手拍开，拢是膏膏粘粘ê卵仁kap卵清，流kah一四界，嘴讲：「破穴！…破穴！」头一直hiàⁿ，差一sut á beh昏去，到chia来，李氏枝才知影che事ê严重，穴破去kap kòng破鸡卵相像，膏膏粘粘ê好物流了了，了大钱，bē发pōng!原来这风水kap鸡卵仝款，拢是会kòng破ê物件。着急问师父：「Taⁿ beh按怎好？Gín-á已经有a，koh是查甫ê，敢会使讲m̄生？」

师父讲：「你m̄免烦恼。Chit má医学chiah发达，tâng时beh生kù chāi咱。我kā你kéng一个好时好日，破pak生。Bē痛bē艰苦，比鸡母生鸡卵khah快活。」

李氏枝想，这师父讲了有理，难得连医学也bat！师父the̍h一本开字天书出来算，一算「十二月十二子时上大好。」

李氏枝去chhōe邱妇产科，讲in新妇beh破pak生。邱妇产科讲：「破pak tō m̄是破西瓜，hoah破就破？大人gín-á拢好好，按怎beh破pak生？…he婴á早两个月出世，早产ê问题…」m̄肯答应。

李氏枝无法度，去拜托郑妇产科。这位郑妇产科m̄知是tó一间学校毕业ê,开业几年无生理。伊讲：「He邱先生古头脑！破pak生像鸡母生鸡卵，bē痛bē艰苦。大人快活，gín-á上安全。Chit-má大家上时行，会晓ê拢mā beh破pak生。Nā是婴á早产出来，khǹg落自动保温箱，beh烧beh冷kù chāi咱调节，比tī老母pak肚内khah爽，ná有啥问题？」

林美娘惊开刀，kā翁讲伊m̄ 破pak生，伊beh家己生。In翁去kap老母参详：「美娘少年勇勇，家己生敢m̄好？」老母骂伊：「听听he草地人讲话无智识，讲着开刀像beh hō͘人割肉。…医生讲，chit-má市内人拢时行破pak生…下底m̄免ka，m̄免thīⁿ，无像古早生kah活beh艰苦死。」

真实十二月十二准子时开刀，全身麻醉，破pak生产。He婴á好好tī老母pak肚内，早产出世，soah bē晓háu，身躯反乌绿，救真久才救活起来。结果脑部受损害，变做永久性脑麻痹白痴。饲到岁外犹bē坐bē爬，身躯nńg kô-kô像无骨ê。规日目睭仁kô-kô-liàn，嘴开开，舌吐吐，m̄知是beh食抑是beh放。做老母ê时常半暝起来io婴á，抱婴á金金看，目屎流…，beh知hit时家己生，…。

李氏枝因为婴á白痴无正常，无啥爱óa去看。尤其是想起师父讲过发pōng ê事，骂婴á tú数：「你这个查某chi á，明明生来beh破格！」有时the̍h超音波相片出来看khah真leh，去厝边tâu，现现有一枝té-té tī hia，按怎生出来就无去？…难免怨叹命运bái,因为师父有明讲，无hit枝就bē发pōng。

佳哉后来师父有吩咐：「下摆beh有gín-á先来算日，查甫ê包你生。」李氏枝心情安定落来，心内有长景ê光明，坚持生一个kiáⁿ发pōng ê希望，下摆龙年才koh生。