《陈雷文选》

 | | | 转寄

白菜博士

作者 陈雷 2007.05.13

作sit人陈桔过身hit日，厝边ê人kap桔嫂真伤心。离in厝khah hn̄g ê所在，亲像新化菜市á内ê人，也有淡薄几分ê伤悲，m̄-koh主要是无彩、可惜ê心情，好比罕罕一时，in新化社会上失去了一位伟大ê发明家，出色ê贡献者。尤其是陈桔这款人，青暝牛无读册，完全靠伊ê辛劳kap智慧，发明这种差不多十全ê白菜，ná有输读大册ê大学生？所以tī台南县农会菜类竞赛，连续两年冠军兼一届特别奖以后，人就尊称伊作白菜博士，伊ê白菜叫作博士白菜。

Che博士白菜m̄是咱替伊pûn鸡kui，实在是人súi嫁妆chē，beh嫌chhōe无话。大欉koh幼、好看koh好食，白ê所在就是白，绿ê所在就是翠。若是洗清气排tī菜篮内，亲像是玉á刻ê排tī博物馆内面hit款，人看人爱。尤其是农会tio̍h奖了后，价数比人khah贵，mā是大家相争买。

有人看陈桔thān钱，就来学伊种菜ê方法。仝款翻土iā肥，ak水除草，就是种bē出hit种白菜。可惜陈桔有hit款ê钱，无hit款ê命，无外久就来破病。医生诊断是肝癌，三个月后，倒leh peh bē起来。陈桔病了食力，倒tī眠床想，不如kā这个方法传hō͘我ê查某kiáⁿ。叫kiáⁿ婿来，眠床边两kha塑胶桶比hō͘看，ná讲ná喘：「一份che，两份he，lām作伙iā落去…。水a kā he桶拍开，一桶白菜子，一桶好年冬。原来博士白菜就是这款ê种法，一份che，两份he，…。

转去讲hō͘ in某听，in某讲：「Che菜一份che，两份he，农药食饱饱，koh beh会食--得！？」水a讲：「你看che菜连虫tō m̄食，人ná会食得？可怜咱tia 无读册，m̄知che好年冬ê厉害，伊che肝病就是按chia来！」in某讲：「按呢这种菜ná有彩工？」水a讲：「你ná会chiah gōng? che白菜农药食饱饱，ná有要紧？人客爱就好。咱是种来beh卖ê，m̄是种来beh食ê。」

Tō 按呢规个菜园拢改落去种白菜。一份che，两份he，lām作伙iā落去，真实发出来拢是súi súi ê白菜。水a ê兄哥知影这项代志，强逼水a教伊，也改落去种白菜。过来伊ê兄哥教伊ê老pē，伊ê老pē教伊ê好朋友，一人传一个不无外久，规ê新化拢出产这款ê白菜。大家拢是种来卖，m̄是种来食ê。后来有人传谣言，新化ê白菜无清气，食农药大ê。买菜ê人ná像有注意着，he卖菜ê kap种菜ê人家己拢无啥teh食菜。渐渐che白菜就无啥人beh买，主要变作大卖，出口去大都市。

后来听讲有人改进，别种菜kap蕃麦也有这款ê种法。菜市á内ê菜，soah m̄知tó一项有清气，tó一项无清气，买菜ê人好pháiⁿ字运靠运气，食菜ê人目睭kheh kheh据在伊去，也有台大教授报纸顶按呢讲，青菜食chē会着肝病。若是厝边隔壁有时有人肝病死翘翘，hit几日就会心肝胆胆，ná喉nâ ân，青菜吞bē啥会落去。

M̄-koh新化ê作sit人对陈桔原在主要是尊重ê感情。死了后时常有人讲起伊，阮新化青暝牛无读册，实在无输读大册ê大学生。