《陈雷文选》

 | | | 转寄

万峦槟榔女

作者 陈雷 2007.04.28

你若是来阮万峦食猪脚，tī beh peh上高速公路交流道前，tō会看着hit chōa街á，双旁一间一间ê玻璃厝，槟榔担排kah tīⁿ-tīⁿ，五彩ê ne-ong灯闪闪熠熠。不管好天pháiⁿ天，凡若是寒流无来ê日子，（ah，阮万峦óa恒春，四季如春。）he槟榔担ê西施一担拚一担，lú穿lú少koh lú té。遇着生理khah无ka-ia̍h ê时机，（ah，罕罕也会有。）he西施小姐mā会大胆ùi玻璃橱á行出来，一个一个若芹蕉pak皮peh光光，tī街á cha̍h人客，卖槟榔。我ta̍k日学校转来ùi chia过，自然o͘-to͘-bái拢会慢落来，加减ná驶ná看。Ah，闹热ê仙境花市，爽快ê khi-mo͘-chih m̄是外地人客会tàng完全理解ê。

第一工我tō有注意着，这个新来ê西施，bē输暗头第一粒出世ê星光，会siâⁿ人oa̍t头koh kā看一摆。伊头鬃尾pa̍k翘翘，染kah红hóaⁿ 红hóaⁿ ，moa一领献献ê纱á，koân-koân坐tī玻璃橱á内，裙té kah差不多无看见。我kan-na有看着he肉感、肉色ê脚腿。

第二工，伊看我ùi hia过teh kā看，笑一下kā我ia̍t手。第三工，我挡bē tiâu a，停落来买槟榔。Taⁿ 我槟榔西施ta̍k日看，m̄-kú koh bē晓食槟榔。Chhìn-chhái the̍h一包tō是。找钱ê时，紧koh kā看khah真leh，he目睭仁大粒koh乌水，bē输乌钻石ê莲雾。嘴唇抹粉红，翘翘kap法国明星B.B.仝款。伊又koh笑一下，我m̄知按怎，无张持紧张家己漏嘴讲：“我明á chài koh来。”

隔转日koh来，伊讲：“阮ê槟榔上盖赞。”事实che槟榔cha-hng我有刁治kā试过，苦koh涩，实在晡bē落去。“晡久会甘，有够khùi力。”我按呢kā pûn:“别担ê我拢食bē合。”

过来ta̍k日来买槟榔，有时一日来二摆。才知影伊名作香水。不时芳水hiù kah芳芳，话ta̍uh-ta̍uh讲。Hit日我专工候kah òaⁿ-òaⁿ，等伊下班，招伊去食阮万峦猪脚。“你犹未kā我讲你ê名。”“失礼，失礼，我叫正雄。阮tau人叫我Masa。”“我叫月娟。”“你m̄是叫作香水？”“玻璃橱á内底叫作香水，玻璃橱á外面叫作月娟。”伊笑笑á讲。原来「香水」是伊卖槟榔ê「艺名」。 伊厝里有三个小弟，拢teh读册，伊是上序大。国中毕业tō无koh读a。“你是按怎来卖槟榔？”我关心问伊。“阮老pē kā我讲“去卖槟榔好lah！”，我tō来卖槟榔。”“你实在真乖koh听话。…恁老pē teh作啥？”“伊tī工厂。”我心内同情伊。咱chia台湾真chē卖槟榔ê查某gín-á拢是厝里散赤，无法度通读册，ài卖槟榔斗thàn钱饲家庭，hō͘小弟á去读册。“A̍h你leh？犹teh读册？”“我？我tī义守读第二年。”伊二粒目睭liô 过来kā我chîn:“读册上好，thàn钱无简单。你看阮卖槟榔，一个月ài卖外chē你敢知？”Che我知。In卖槟榔ê mā是ài算业绩，才tio̍h穿少少装súi súi，hō͘人客食冰枝，看作o͘-lin-gio chhit-thô，……我心内感觉pháiⁿ势，真正关心，想beh了解伊…。

了后定定招伊出去。Ta̍k摆beh用o͘-to͘-bái载伊转去，伊拢m̄。我想in tau大概tòa tī真破散ê所在，m̄爱人知。Hit回去土鸡城食土鸡，经过月世界，一棱一棱ê山崁直直尖尖，hō͘月光照kah秃秃。阮坐tī山崁下脚，月tī山后，近kah若像伸手tō摸会着。我会记得电视顶bat看过，美国Armstrong登陆月球ê时，he月面是平坦ê沙地，无尖尾ê山崁。虽然tī che无半枝草、无半只虫ê月世界，表面完全无生命，暗眠若男女二人来，应该会感觉kap月顶面仝款完全ê孤单稀微，不过爱情ê花欉发了上盖ām。

“你敢有查甫朋友？”这句话我心内khǹg真久beh问伊。伊面oa̍t 一旁，停一时á才应：“有若无leh。”“按怎讲？”“Khah早有，chit-má无--a。”伊ê声概成会chùn，像chhe-lo͘h（cello）teh奏Ba-hah（Bach）ê音乐，苦苦甘甘。当这时，尖利（lāi)ê山棱一chōa一chōa暗去，天里ê乌云sóa来cha̍h着月。“恁查甫ê拢仝款。”“O͘h？…”“有目睭无心肝。Kan-na爱看查某gín-á súi脚súi面，拢无要紧chin内面有啥。”伊拳头母tah家己ê心肝头。我了解伊ê意思，伊是感情ê受伤者，mā是环境ê受害者。我一时替伊不平。

爱情hō͘我勇气，我去chhōe阮老pē讨一个头路。阮老pē tī高雄开一间广告公司，员工几nā十个。“你这个朋友会晓创啥？”伊问我。“拢会晓。听电话、写字、泡茶…”“啥物学历？”学历有啥路用？会作代志上要紧。“伊--伊国中毕业。”“Bat作啥头路？”Taⁿ害a，“伊…伊teh卖槟榔。”“卖槟榔？！”阮老pē目睭chiah大kòng:“你敢知影卖槟榔一个月thàn几万？”“无外chē--lah。”“无外chē?咱chia查某gín-á无一个kap he会比--得。”“Che…che m̄是钱ê关系，…头路ê品质ê问题。”拜托一晡，了一碗公nōa，讨一个助理秘书ê头路，接电话、khioh批、泡茶…，一个月万六kho͘ …“作了若会用得，三个月后加薪。”

我走去chhōe阿娟报好消息，已经玻璃橱á内面换一个小姐teh顾。头毛换染金色，仝款moa献胸ê纱á，一领迷你热裤té kah bē输老阿婆á ê内底裤。“香水leh？”“无作a，in老pē叫伊转去。”我惊一tiô，是m̄是in老pē chhōe着khah好thàn ê头路叫伊去？听讲KTV陪人唱歌、舞厅陪人lim酒拢比卖槟榔khah好thàn。“你敢知影in老pē工厂tī tó?”我紧张问。“Ùi chia直直去，到hia oat正旁，koh直直去，到hia koh倒旁直直去…，上尾á间tō是。”“你敢知影in老pē叫作啥？”“陈顺益。”

O͘-to͘-bái chhui leh紧走。Chhōe着hit间「荣光纺染公司」，koân墙á围leh，铁门有人teh顾。我问顾门ê:“恁chia员工敢有一个陈顺益？”“你chhōe伊beh创啥？”“我有要紧ê话beh kā伊通知。”伊入去内面，liâm-mih出来开门chhōa我入去。机房lìn -lòng叫，伊戴一顶安全帽khiā tī hia teh看，人koân-koân乌乌，概成是工头？“啥物代志？”伊问。“月娟ê代志…”“阮月娟按怎？！”“伊ê头路，…我替伊chhōe着一个好头路。”伊掠我看一下，问：“你啥人？”

伊chhōa我去一间办公室坐。我kā伊请求：“阿伯，这个头路无像卖槟榔hiah好thàn，m̄-kú品质加真好。”伊tàm头：“Hm̄h，品质，品质真要紧。”概成家己teh kā家己讲。“阮老pē家己ê广告公司，一个月万六kho͘。三个月后加薪。”伊the̍h薰出来pok，一个小姐入来，讲：“日本电话。”伊电话gia̍h起来，mo͘h-si mo͘h-si日本话直直lù。讲soah，kā小姐讲：“叫阿发a这张订单后礼拜tio̍h-ài出货。”Liâm-mih小姐转来：“头家，发a讲拜一tō出货。”Taⁿ苦a，我敢有听m̄ tio̍h?伊tō是公司ê大头家？…A̍h thài 叫in查某kiáⁿ去卖槟榔？A̍h thài m̄ hō͘ in查某kiáⁿ读大学？…A̍h thài会…

“你阮娟a bat外久a？”伊才koh问。“3个月、4个月a…”我心内受气，问：“阿伯，你thài 叫伊去卖槟榔？”伊koh the̍h一枝薰来pok：“阮娟a ho͘ⁿh，kap阿旭a冤家，a̍h tō tiuⁿ m̄读册，chia头路便便也m̄食，m̄才会人受气kā骂“A̍h无你去卖槟榔好lah？”成实tiuⁿ leh tō去卖槟榔……Ai-ioh，穿穿he敢成实会看得？这个gín-á ho͘ⁿh，chēng细汉hō͘ in老母sēng pháiⁿ去。”“伊…伊khah重感情lah。”我替伊辩解。“讲阿旭a有目睭无心肝，kan-na爱伊ê身躯，无惜伊ê感情，连in熟悉ê啥物animal也bē 记得。”“熟悉ê animal？”“Hioh lah。旧年娟a去日本chhit-thô，东京地下铁遇着阿旭a，讲按呢相bat熟悉一周年纪念。”“O͘h，‘按呢mā 会使得’(anniversary)。”“Ai-ioh，我kap in母a tī阮番á寮熟悉30外冬a，mā m̄ bat teh计较啥物‘按呢mā 会使得’。Chín ê gín-á实在kāu头路。”“Tō是按呢冤家？”“Tō是m̄，khàu kah m̄食m̄困，据在阿旭a姑成也m̄ chhap人。Hō͘我骂一句，a̍h tō tiuⁿ去卖槟榔。”

小姐又koh入来叫：“头家，美国电话。”我kā伊相辞，伊吩咐讲：“据在伊lah。我公司chia mā几nā个头路随在伊kéng。”出来到大门口，tú好一只BMW乌头á车hu̍t一下chông到位。一个少年家跳出来，走过来这旁开车门。Ôa!代先ùi车内伸出来是一双尖尖ê红皮鞋，屐á三寸koân，koh来是二枝长长thiau-lāng、肉感、肉色ê脚腿。我一看tō认出来是阿娟ê。伊穿一su干乌té裙ê洋装，戴一顶大顶白帽，圆圆ê面khàm一半。看着我，欢喜chông来kā我lám leh：“你thài 会来tī chia？”粉味芳贡贡。Hit个少年tòe tī伊后面óa来，穿一领有le-suh ê sia-chuh，一领e̍h-e̍h-e̍h ê长裤，头鬃loah koân金siak-siak，像Elves Presley ê飞龙机头。双手kōaⁿ 4、5脚大细脚ê商品袋。“这个阿旭lah。”原来有目睭无心肝ê tō是伊！“你看，我ê生日阿旭a拢会记得。”伊指hia ê商品袋，原来是月娟ê生日。佳哉，佳哉，这个有目睭无心肝ê阿旭a，佳哉这回会记得。“Bai-bai！”娟a kā我ia̍t手。In二个人ùi铁门入去。我O͘-to͘-bái pho̍k-pho̍k-pho̍k踏hō͘发，m̄甘愿，hit只金tap-tap ê乌色BMW se̍h一liàn，骑转来到阮万峦ê街á。暗头á当闹热，一间一间ê玻璃厝，仙境花市，五彩ê ne-ong灯闪闪熠熠。我O͘-to͘-bái liâu-liâu-á驶，chhîⁿ he恒春吹来ê南风，店里teh放送烧lō siâⁿ人ê歌声：

恁kā我号真súi ê名，
叫我穿真té ê裙，献领ê衫，
hō͘我踏koân屐坐koân椅，
讲按呢才bē cha̍h着
我二枝肉感ê大腿。

用细间ê玻璃厝kā我té leh，
包装作a̍p-á内底ê『洋娃娃』，
外口点五彩ê ne-ong灯，
hō͘过路人目睭chha̍uh-chha̍uh nih，
四围ê pùn-sò看作仙境花市。

人客a，「欢迎光临」，
来lah，来lah，
嘴哺槟榔，
目睭食冰枝，
无爽m̄免钱。
来lah，人客免细字，
阮chia有上赞ê万峦槟榔，
规街á路ê槟榔西施。