《陈雷文选》

 | | | 转寄

亚力出头天

作者 陈雷 2007.02.18

伊khah爱人叫伊ê美国á名A-le-khu-suh(Alex)，大家拢知影，所以拢按呢叫伊 。有时无小心叫伊亚力，伊tō无欢喜，目睭gîn一下，tìⁿ无听着无beh chhap人。Kan-na tī高速公路顶koân，超速hō͘警察á掠着ê时，看伊ê驾照，叫伊ê名郑亚力，才姑不而将tìm一个头，chhìn-chhái应一下。注死44岁生日这工，驶hit只西美载一tè生日鸡卵糕，tī高速顶koân看着少年查某，挂乌仁目镜驶Bian-juh S500，青哥神kā人tòe。少年查某驶130走hō͘ jiok。结果家己技术无够，cheng着Bian-juh S500 ê kha-chhng。西美péng三liàn，人无死，pín-á骨chi̍h二枝，脚筒骨断一节。少年查某停车落来看，这个m̄成gín-á规面规su西装拢是鸡卵糕，白ê、红ê、青ê、黄ê，好气也好笑，讲：「无彩happy birthday鸡卵糕。」A-le-khu-suh tī车内装伤，大声哀细声chhan，差一sut á beh死去。少年查某有钱人惊麻烦，尾a chhìn-chhái讲讲leh，赔伊现金50万，准soah无输嬴。这tòng夭寿á大钱tō是按呢生出来ê。Ah无，一个公司职员á，一个月领无4、5万、beh去tó位生chia ê钱？若无、ùi tó侥幸，会惹chia ê khin-khin khiang-khiang ê代志来？

A-le-khu-suh有钱chhio-chhio iāⁿ-iāⁿ，kap A-le-khu-suh无啥钱扮势无仝。代先是白西装、乌皮鞋、红ne-khu-tái，过来二chhok niau鼠á嘴须，一粒hái-kat-á头，boah油loa̍h二chàn，「海洋理发」美美小姐介绍，一粒二千kho͘剃ê。同事看会出来，拢讲：「A-le-khu-suh péng车thàn大钱，行路kha-chhng会khau风。」In某爱君tī仝这间东南旅行社上班作「小姐」，替头家王东南thîn茶接电话，应付人客，解说讲：「脚骨siak pháiⁿ去，犹未好lah。」

M̄-kú「物理治疗」一个月，脚骨好去，行路也是犹会khau风。有时上班爱tō来，m̄爱tō无来。头家问in某，讲是身躯犹未tú好，bē堪得作。过来雄雄几lōa日无来，头家koh问in某，应讲是「A-le-khu-suh人无去。」惊一tiô，才想起旧年年底发奖金，了后mā是「A-le-khu-suh人无去。」家己一个溜去澳门poa̍h-kiáu，输kah空空才转来。

一礼拜无消无息，in某暝日烦恼，会食bē困。有人讲是hō͘人绑票，为着hit 50万，有人讲是溜去澳门，又koh 去poa̍h-kiáu。独身ê叶博士来公司khah无一冬，目睭大细目，办公桌kap A-le-khu-suh相隔壁，普通时tō有意思爱君。这日行来kā nih一个目，偷偷á kā讲；「A-le-khu-suh无pháng去。」爱君惊一下，问：「A-le-khu-suh tī tó?」

Hit下晡下班，kap博士去维也纳lim ka-pi，博士koh kā nih一个目，讲：「A-le-khu-suh tī 日本。」「Tī日本？！」「坐亚航ê去东京。」「去东京？！」「顶礼拜订机票二张。」「机票二张？！---kap啥人？」「一张郑亚力，一张蓝陪陪。」「蓝陪陪？…蓝陪陪是啥人？」Tō是博士办公桌tī A-le-khu-suh隔壁，顶礼拜订机票伊有看着。

巷á底这间，「脚底神仙」脚底按摩专门。A-le-khu-suh péng车了后，ta̍k日去「脚底神仙」物理治疗。Hia ê脚底小姐看爱君来，好礼相争叫：「欢迎光临」爱君问：「恁chia敢有一个陪陪？」「陪陪o͘h？伊chit-má hioh困无来。」「Tiang时会转来？」领班ê讲：「M̄知neh，顶礼拜去日本chhit-thô，m̄知tiang时才会转来。」目睭看爱君ê脚，koh讲：「人客，叫别个小姐服务，好无？阮chia红红上gâu掠。」详细kā问，才知影这个新来ê脚底小姐陪陪，生作细细汉，红红讲 ，染金头鬃红指甲，胸前phāiⁿ二粒屏东椰子，奶á有去phu-la-su-chi-khuh整容手术。生理上kài好。A-le-khu-suh若来，拢hō͘伊「物理治疗」。

到chia来知影代志大条。赶紧去玉山银行对数，数簿tǹg出来，存款零！Tiang时50万领了了，chhun无半仙。银行小姐碧瑶kap伊有熟，讲顶礼拜A-le-khu-suh kap一个查某gín-á来领去。「敢是细细汉，金头鬃红指甲，胸前phāiⁿ椰子？」「屏东ê hiah大粒。」碧瑶小姐比hō͘伊看：「Tō是伊。」Taⁿ害a，in A-le-khu-suh tòe人走，chhōa phāiⁿ椰子ê脚底神仙陪陪，tī伊18岁生日hit工，50万现金总领，坐亚航ê作伙去日本「生日快乐」。

过来4个月无消无息，公司上班，同事使目尾，kha-chiah后chhī-bú-chhī-chhā ：「Bē转来a lah。…khah讲mā是新鸡-nōa-á khah好，…」渐渐，渐渐，ùi台北市苦心ê 4月到怨叹ê 5月，ùi中山北路懊恼ê 6月到愤慨ê 7月，lú想lú 受气m̄愿；渐渐，渐渐，he老鸡母hō͘人放sak ê心情，变作「好a，作你拢mài转来！’你会，我mā会’ê决心。Hit日下班前一分钟，行来博士ê办公桌，kā伊射一枝亲蜜tah心ê目箭，讲：「来，你chhōa我来去维也纳lim ka-pi。」

总是a，终其尾a in A-le-khu-suh mā是又koh转来。「Honey，我转来a。」入门tō大声hoah，bē输hit日早起出门去上班，下晡下班tú-chiah转来 。Kā看，ai-io-ôe!beh thài会认得？规粒hái-kat-a头siah kah光光若金瓜，niau-鼠-á嘴须无去a。目睭皮肿肿kho͘一kho͘乌ê，概成一礼拜无困。拖一双运动鞋，tha̍h一领T-sia-chuh，胸前tǹg英文大字：「I love Madonna」。「转来beh创啥？…sáng叫你转来？！…拢mài转来好lah！」in某开始骂。「Honey，我ta̍k日teh想你，赶紧转来看你。」「看着鬼！…想你ê死人lah！…钱领了了作你去，放我kap两个gín-á tī chia niauh-niauh看，phōng-phōng siû，一通电话to无！你teh想，想你ê死人！…」气kah人phi̍h-phi̍h-chhoah。

奇怪a，顶回澳门poa̍h-kiáu转来，钱输kah空空，mā是欢喜koh流目油，kā伊「honey」lám leh chim：「…你转来a，我烦恼kah beh死…」Taⁿ这回怎样变siàng?无讲「honey，你转来a」。「离婚！…我beh离婚！…」爱君大声嚷，mà-mà-háu，相手giú leh khau头鬃。莫怪a，这4个月陪陪陪去chhit-thô，日本、韩国、琉球四界去。尾a tī Ha-oa-i钱开beh ta a，遇着一个泰国生理人顿巴参，kap伊仝款，niau-鼠-á嘴须koh二chàn ê hái-kat-a头，讲是tī首都Ban-kok开大家来观光大饭店，请in去chhit-thô͘。第二工，陪陪tòe伊走，也无讲一句bai-bai。「离婚？！你teh讲啥物siáu话？…那有可能！」爱君hō͘伊骂，khàu lú大声，一siū头鬃双手大力giú，khau kah若鸡母chhéng ê｡A-le-khu-suh雄雄去想着，定着是有别个查甫人…「你讲！是啥人？！…是啥人？！」一桶乌醋、一桶红醋、一桶白醋chhia-chhia hō͘倒，相手掠伊ê肩胛头大力直直hia̍p。「你讲！是啥人？！…你讲！…」「啥人？啥人是beh按怎？chhìn-chhái路边khioh一个mā比你khah嬴！」可恶a，成实这个查某chiah无情，才四个月niâ …连这句话也讲会出来。Lú想lú m̄愿，定着是hit个死博士，普通时tī办公室，不时使目尾teh看in某，…可恶a，趁伊无tī ê时kā伊拐！「chhìn-chhái路边khioh一个，…」好a，m̄知恁pē ê厉害，拍一枝hō͘你到。隔转日，拖一双运动鞋，穿hit领「I love Madonna」ê T sia-chuh，行入来办公室。博士看着，ia̍t手叫一声，「你转来a」，A-le-khu-suh行óa去，mā是笑面叫一声「我转来a。」，Té枪póe出来tō kā pōng，一枪pōng桌顶，一枪pōng椅脚。博士惊一下gāng-gāng去，嘴á开hāⁿ-hāⁿ 哀bē出声，若佛á chhāi tī hia bē tín动。雄雄hoah：「走！紧走！…」才想着peh起脚lōng。又koh一枪，tú好 tōaⁿ着脚，人tō phak落去。走过来jiok in某爱君，这二个斗一担，顺续tio̍h hō͘死！一枝枪gīm tī手里四界乌白比，办公室内底小姐phi̍h-phi̍h chùn，惊kah ki ki叫。犹是头家王东南胆在，少年ê时bat tī金门作过兵，椅头á giâ起来，相真真大大力tō kā khian去，顺势一脚 liòng koân，踢一步kha-la-teh，chàm一下A-le-khu-suh车畚斗倒头栽，倒tī土脚据在人制裁。

结果「杀人不遂」官司起诉，判6冬。关3冬了，teh beh假释，人问伊：「郑亚力，你有悔改无？」A-le-khu-suh嘴齿筋咬leh应：「我今á日踏出这个监牢，第一tō是去买一枝枪，chhōe hit二个死无去ê!」所以无假释放伊出来，koh再好礼关3冬，kap大尾鲈鳗关一间。Hō͘大尾鲈鳗欺负强奸，修理kah金金，6冬到到才放出来。这回教示了到khùi，m̄敢koh作怪，放tiau beh thâi人。狱长kā伊警告，后回若koh入来chia，m̄免想beh出去。

Hit个进前，in某爱君去法院告离婚，kap博士结婚。公司ê人听讲A-le-khu-suh放出来a，替in紧张，这回taⁿ有戏通好看。总是A-le-khu-suh出来了后，教示kah乖乖，m̄敢chhīⁿ-chhn̍gh，无去搅扰、chhōe人算数。半冬无事过了，雄雄东南旅行社同仁，人人接着一张红帖，某时某日tī国泰宾馆敬候光临，阿拉顿肉小姐kap郑亚力先生beh结婚，邀请大家来食喜酒。

Hit日白西装、乌皮鞋、红ne-khu-tái、mā是koh niau-鼠-á嘴须兼二chàn楼á hái-kat-á头，chhio-chhio iāⁿ iāⁿ 。A-le-khu-suh看着爱君kap博士，行路khau-风专工óa来介绍：「这位是阿拉顿肉小姐。」Hiàⁿ 头kā看，ai-io-ôe，牛爷马爷koân A-leh-khu-suh一个头，二个hīⁿ gia̍h-gia̍h，一个面长长，中央一枝phīⁿ若麻竹笋bē记得割。Tàm头落来，一领làu胸乌礼服，tah金闪闪sih-sih，胸前二粒肉奶若屏东椰子，chiⁿ kah cha̍t-cha̍t，强beh lak出来。「Hi，please to meet yo͘。」 阿拉顿肉小姐英语100%。爱君kā看，三kōaⁿ真珠àm-kún phāiⁿ到肚脐，ta̍k粒鸡母ôe，若美国土豆hiah大粒。「Hi，please to meet yo͘。」博士m̄认输，l¡u英语40%。「恭喜o͘h，A-le-khu-suh！恭喜o͘h，阿拉顿肉小姐。」爱君杯á gia̍h koân-koân kā in敬酒。

尾a调查出来，这位阿拉顿肉小姐是Ma-le-si-ah（马来西亚）ê律师，来台湾有缘kap A-le-khu-suh熟sāi，kap in翁离婚，tòe A-le-khu-suh走。无外久，A-le-khu-suh tī中山北路开一间「Alex旅行社」，内面chhiàⁿ几lōa个人，生理bē输东南。人讲A-le-khu-suh生作猴猴，生成有查某人缘，为着查某去落难，mā是为着查某出头天。