《陈雷文选》

 | | | 转寄

拍

作者 陈雷 2007.01.21

讲着这个『拍』，有大拍、小拍，有用chhôe-á拍、chhìn-chhái用手拍，有罕罕一时á拍，有三不五时拍，----种种无仝款ê拍法。若是阮厝边hit个阿惠，大家拢知影，大拍小拍，不管时teh拍，tō是按呢真正食力lah。

阿惠嫁来beh二冬，头a hit个月无拍，用骂ê niā-niā。过来差不多ta̍k礼拜拍，有时拍二、三摆。代先是按怎拍起势（khí-sì） ê，大概无人知影，连阿惠家己mā bē记得。量情（liōng-chêng）是hit时阿惠tú嫁来无外久，ta̍k项生（chheⁿ）手，he鹅á大只sa̍h bē好势ê关系。Taⁿ in翁勇a tī三角窗卖鹅肉也五、六冬a，he阿勇鹅肉chíⁿ koh nńg，chhiⁿ koh幼，咱chia人人o-ló，上盖时行。Tō是阿惠嫁来了后，大只鹅伊teh sa̍h，问题出tī chia。有熟悉人客kā勇a讲：「你che鹅肉chit-má有khah老。」勇a上惊人嫌伊ê肉，应讲：「敢有影？A̍h tō仝款hia ê鹅。」Tiām-tiām liàm一tè来哺，ai-ioh，成实tēng kah若鸡母肉，半pak火lún leh，转来厝掠in某tō骂：「使恁né!连一个鹅肉bē晓sa̍h!----」阿惠惊勇a恶，无应伊。又koh骂：「干！读国中ê有khah choa̍h!----」有人讲，tō是勇a家己无读册，怨度in某读国中，刁治故beh kā伊phih-siùⁿ凌治。Che我看也无tú-tú是。不过阿惠虽然有读国中，pō͘-pīⁿ tī厝里m̄-bat sa̍h鸡煮鸭，灶脚ê代志khah han-bān是有影。所以家己知影，tiām-tiām无应声，据在勇--a hat，骂pháiⁿ嘴。

侥幸过来人客kā勇a讲：「你ê鹅taⁿ也sa̍h无熟。」勇a应：「Ná有影！A̍h to仝hia ê火teh sa̍h。」Kā看，成实he肉红hóaⁿ红hóaⁿ，血水sa̍h无透！Taⁿ piàng a，一pak火放leh to̍h，转来 厝入门tō骂：「使恁né!Kap恁pē tèⁿ死tèⁿ活----」一tè鹅肉tō kā khian去。「叫你mài sa̍h老，你tō kā sa̍h hō͘无熟！----」tú-tú he肉khian着阿惠ê面。阿惠m̄敢应声，也m̄敢走，khiā hia据在伊tìm。等候伊tìm soah，头chhih-chhih，ku落去khioh鹅肉，嘴内才细声应讲：「明á chài sa̍h khah熟。」勇a半khaⁿ鹅肉khian了，一pak火犹未消，听伊应话，chhîⁿ来出手tō pa。Siàn一下阿惠phiāng tī土脚，鹅肉chhia规身躯。「明á chài!明á chài!人客走了了--」鹅肉sa来对阿惠ê嘴直直chiⁿ：「你会tèⁿ siáu!Kā恁pē食看māi----」

这个以后，tō用拍ê，无用骂ê。有时小拍，有时大拍，有时有代志拍，有时无代志也拍。勇a拍了chiâu匀顺手，阿惠mā hông拍惯势去。不而过有时拍了厉害，人实在艰苦bē堪得，tō走转去chhōe老母chiù惨。老母讲：「khah忍leh。查甫人拢按呢lah。」看查某kiáⁿ hia̍h-á一bong青一bong红，一lûi phòng一lûi nah，心内m̄甘，骂：「你thài chiah gōng?人若拍，m̄ tio̍h头壳顾leh，脚手hō͘伊拍。」A̍h tō双手mo͘h头壳，身躯áu一球，学hō͘查某kiáⁿ看，kā伊教。Che阿惠，chēng细汉老母hō͘老pē拍，也m̄是m̄-bat看过。代先关tī房间内底拍，阿惠kap阿姊看bē着，听老母tī房间内大声哀，叫m̄敢。二人tī房间外kan-na会晓惊，tòe人哀，mè-mè-khàu。

Hit日拍kah房间门lòng破，才看着老母teh hō͘人拍，拍kah衫拆拆破。He好a双手头壳mo͘h leh，身躯kiu作一球，跪tī土脚叫m̄敢----。阿惠kap阿姊óa去卫老母，顺续食拍。过来见若老pē拍人，房间门m̄免关，阿惠kap阿丽m̄敢óa去卫，也m̄敢tī hia khàu，拢走去bih。二个姊妹á lám作一伙，学老母头壳mo͘h leh惊。

阿惠听老母吩咐，「头壳顾leh，身躯据在伊拍。」结果拍kah脚手乌青结血，出门穿长裤，长ńg衫，掩leh无人看。一回手tê á拍折去，一手肿歪歪。隔壁陈太太看着，问伊啥代志。阿惠chhìn-chhái应：「Poa̍h倒lòng着。」陈太太伊tī国中teh教册，目睭lāi，这款拍某ê代志也m̄是m̄-bat，鸡婆tō kā伊讲：「你知影，chit-má查甫人拍某，若是去报警察，法律会制裁。」阿惠听讲报警察，惊一tiô，紧应：「M̄通报！M̄通报！若去报，我会hō͘拍死。」陈太太替伊不平，讲：「恁勇a é koh so͘腰，sán猴兼无尾，比你khah细汉，你是teh惊啥？！Chit-má若koh拍，作你kap伊hut！我chhōa你去学空手道。」阿惠a惊，讲：「你tō m̄知影伊外恶leh。」「外恶？！Soah bē kā恶倒转去！」阿惠a摇头：「伊若mài kā咱拍tō好a，咱koh beh拍伊！」想想leh，问陈太太：「恁翁若拍你，你敢拢有teh回手？」陈太太起爱笑：「阮翁拍我？！To m̄是kā in公a借胆ko̍h。」阿惠才知影，世间也有人in翁m̄-bat拍某ê，也有人in某m̄免hō͘翁拍ê。

Taⁿ咱讲翁á某冤家，kiáⁿ mā是ài bóng 生。阿惠有身了后，烦恼pak肚内婴á会拍伤着，转去问老母。老母教伊：「Khah早阿母有恁ê时，pak肚hâ巾á，衫裤拢穿双iân。」Koh再讲：「你厝里若是有棍á、chhôe-á，拢kā收收起来。」阿惠转去厝，衫裤双iân穿kāu-kāu，pak肚tîⁿ围巾á。厝--里棍á、chhôe-á拢藏起来。又koh惊勇a beh拍临时sa无物，乌白hut，另外chhoân一枝草pīⁿ ê扫手头，khǹg tòa壁边通hō͘伊用。按呢准备好势，koh bē放心，去请教对面张太太，问伊：「你有身ê时，穿按呢敢有够？」张太太无了解阿惠ê意思，笑讲：「Ai-ioh，你成实m̄-bat生过kiáⁿ！按呢会热死lah。」摸伊ê pak肚讲：「Che婴á tī pak肚内烧hut-hut，bē去冷着lah。」才知影张太 太有身ê时无hâ围巾á，也无穿kāu衫，in翁m̄-bat kā拍。 半信m̄信，厝边隔壁ta̍k个太太拢去探听，结果拢无人穿kāu衫，hâ巾á，咱chia四kho͘ liàn转tō是kan-na伊一个。这时才明白知转（chai-tńg），m̄是像老母讲ê『查甫人拢按呢。』明明阿母kā伊教m̄-tio̍h。Lú想lú m̄愿。Hit日勇a koh拍人，阿惠勇敢走，转去chhōe老母，kā老母讲：「我m̄转去a。」老母劝伊：「咱查某人为着kiáⁿ，khah lún leh。查甫人拢按呢lah。」阿惠雄雄明白，心内叫：「阿母a，你tō是teh讲你家己，为着阮姊妹á lún一世人。」

勇a等阿惠无转去，放tiau若koh m̄转来，tō beh拍hō͘死。过来háⁿ bē行，用姑成ê，chiù-chōa m̄ koh拍人，若koh拍，雷公kòng hō͘死。阿惠bē堪得老母苦劝、勇a姑成，包袱á款leh koh转去。

成实无拍也无骂，平安成礼拜。Hit日暗勇a lim酒，bē记得『雷公kòng hō͘死』，mā是koh拍人，拳头母cheng kah鼻á歪哥嘴chhi̍h-chhoah。阿惠透暝走，老母koh kā劝：「查甫人lim酒pháiⁿ性癖，拢会lah。」这回阿惠下决心，据在老母姑成也m̄转去，kā老母讲：「我若生一个查某kiáⁿ，koh学像我按呢惯势hō͘人拍，a̍h tō害。」拜托作老师ê陈太太斗相仝，去法院告离缘。 成半冬过了，勇a têng koh chhōa，tō是咱菜市á hit个『大pù-a』，听讲是死翁ê。这个大pù-a人大仙，生作kau-chhiâng koh粗phoh，真是大丈夫气概。若是khiā tī猪tiam斩骨tok猪肉，bē输贺伯风台扫过海，连查甫人mā闪伊。勇a tō是chhōa这款ê pù-a。Taⁿ也tio̍h暗时卖鹅，早时菜市á斗tok肉，ná有pù-a hit个扮！所以不时hō͘人骂hō͘人嚷。He大pù-a手里一枝thâi猪á刀，pin-pin piàng-piàng斩猪tok肉，勇a ná敢应一声，头chhîⁿ-chhîⁿ据在伊hat。所以终归hit日勇a hō͘人拍，无人想意外，拢讲：「知知leh lah。」厝边头尾大家拢有看着，勇a ùi厝内chông出来，巷á底一领裤làu-làu直直走。大pù-a手里gia̍h一枝扫手头tī后面jiok，ná嚷：「---M̄信恁pē kòng你bē惊----，koh走！转来你tō知死----」人讲咱作人好事有好报，其实无tú-tú。若是讲pháiⁿ事有phiáⁿ报，che我想是犹khah有实在。