《陈雷文选》

 | | | 转寄

赤查某

作者 陈雷 2006.12.24

咱现代社会文明发达，生活紧张，致使到时常有人会有神经衰弱ê症头。Che我作医生30外冬a，差不多ta̍k日拢会遇着。Kan-na看病人ê面色表情，m̄免问tō差不多会tàng断定。亲像这个曾小姐这日家己一个tī hia，坐也坐bē tiâu，khiā也khiā bē好势，一枝薰直直pok。看起来30外外a，嘴á pok-pok，一个面niau-niau-phok-phok，若pó͘去ê柚á皮，生成tō m̄是súi 当当ê仙女，又koh忧头结面，规身躯穿乌ê，bē输in tau teh出山办丧事。我一看tō知影是这个症头。

问落去到底，siàⁿ-siàⁿ是困bē好势，食无胃口，不时头壳hîn头壳痛ê症头。我问伊teh作啥代志，伊讲tī英美家专teh教册。“医生，che敢是着癌haⁿh？”伊按呢问。我kā伊安慰：“Che m̄是癌，kan-na神经khah衰弱。Chit-má社会生活紧张，khang-khòe压力大，真chē人有这个问题。”我开几粒镇定剂hō͘伊，“无要紧，放khah轻松leh，过几日tō会好。”

三日后伊koh来。讲he药á食落tō khah会困，无食tō困bē去，一枝薰the̍h tī手里phi̍h-phi̍h-chhoah。看起来规身躯穿乌ê，一个面青sún-sún，概成几偌日无食koh无困。我问伊学校敢有啥物代志？伊起先m̄爱讲。我kā伊解说：“若无讲出来，khǹg tī心内无tàng tháu，压力会koh-khah大。”尾a伊才讲：“拢是hit个主任lah。”“主任按怎？”“专工对付我一个，不时chhōe我ê空phāng。Ta̍k项代志tu-tu来hō͘我，连tī学生面头前mā kā我骂，…”讲kah beh khàu出来。“我m̄知tī tó得失着伊？！…”问khah真leh，这个主任姓陈，作代志无半撇，kan-na会晓pháiⁿ人，人拢叫伊赤查某。校长爱这个陈主任提早退休，叫伊接这个主任ê缺。我讲：“Tō是按呢lah！莫怪伊专工beh chhōe你ê麻烦。”伊讲伊无爱作主任。伊hia ê同事知影陈主任人bái，拢kā伊留，叫伊m̄通辞职。讲khah忍耐一下，等主任退休。伊ná讲ná jôe目睭，鼻水直直sńg。雄雄话讲一半，人soah gōng-gōng去，现to目睭金金，koh概成拢无看见。Taⁿ害a，照我ê经验，这款神经衰弱ê症头已经chiâⁿ严重，若无紧医，进一步mā有变作精神分裂神经病ê可能。心内不止烦恼担心，问伊：“恁tau敢有人有精神无tú好ê?”佳哉伊讲无。“医生，我敢是神经病？”我赶紧kā伊安慰：“你一定ài tiàm厝里安静hioh困，bē使koh去学校。”伊m̄肯请假hioh困：“学校khang-khòe hiah chē，教儿童心理ê kan-na我一个，hia ê学生beh按怎？！”我讲身体要紧，坚持伊bē使去上班，koh马上写一张医生证明，叫伊the̍h去hō͘校长。“工作压力siuⁿ大，精神衰弱。需要绝对安静休息二礼拜。”koh开「恼来tō pháiⁿ」hit种上强ê镇定剂hō͘伊。

二礼拜了后伊koh转来，看起来加真好a。Hit个面原在一liap一liap，一phok一nah，m̄-kú hia̍h -á无koh拍结，手也bē chhoah a。伊讲伊决心beh koh试看māi，无beh辞头路。我替伊欢喜，吩咐讲：“你 转去上班了后，若是koh有问题，m̄通家己khǹg tī心内，ài马上来我看。”

过来二个外月无koh看着曾老师，想讲大概转去学校了代志顺是a。Hit一日，阿喜a来hō͘我看，无彩一个súi面忧结结，讲伊困bē去，食bē落，头壳hîn，头壳痛…。Taⁿ 又koh一个神经衰弱ê?！He tō怪a，我这个查某孙á普通时人人好，不时笑gī-gī，若厝角鸟kī-kia̍t叫，thái会雄雄变按呢？问伊啥物代志，代先tī hia tùn-teⁿ m̄讲。“厝里kap煌a冤家？”Bē堪得我问，尾a讲：“拢是hit个主任lah！”阮这个阿喜tī英美家专总务室办公食头路才六个月，to拢真顺是，m̄ bat听讲有啥问题。“主任按怎？”“我ná会知？Ta̍k日chhōe空chhōe phāng，kan-na beh对付我一个。代志拢tu-tu来hō͘我，好也骂，bái也骂，…M̄知是得失着伊啥？！”我想，taⁿ好a，又koh是hit个陈主任，人叫伊「赤查某」hit个？！“人叫伊赤查某，kap别个老师拢bē合。学生上惊伊，规日pháiⁿ死死， kan-na beh hō͘人落第无及格，…”原来又koh是伊！我真受气，讲：“来，阿舅kā你写一张医生证明，你the̍h去hō͘校长。”阿喜摇头：“无效lah。校长拢听伊ê话。上盖gâu phô͘校长，tī伊面头前乖kah若一年生á。”

我想想leh，一时也无啥好办法，bóng讲几句话安慰：“Che神经衰弱真普遍，特别是咱食头路ê。你khah忍耐leh。”koh the̍h几粒镇定剂hō͘伊：“若是困bē去，食一粒tō会khah安静。”伊讲伊无beh食药-á，伊beh辞头路。我紧kā讲：“你才去六个月niâ，tō beh辞头路？Chit-má头路chiah pháiⁿ chhōe，无要紧，你mài kap伊计较，骂作伊骂，准无听着…。”“我挡bē tiâu a。”“听讲这个主任liâm-mih beh退休，你koh lún一站a，等伊退休了…。”伊头gia̍h起来，目睭大蕾kā我看：“伊tú-chiah升起来作主任niâ，beh等到tiâng时才会退休？”“Tú-chiah升起来？”“才升起来二个月。…人khah早hit个外好leh。”“Khah早hit个？”“Hit个陈主任，人外好leh。Tō是siuⁿ古意，hō͘伊kek kah身体chàn bē tiâu,才提早退休ê。”我lú想lú m̄ tio̍h头，心肝pōng-pōng chhiáng，问伊：“这个新主任姓曾？”伊tàm头。“曾秀英老师，教儿童心理hit个？”伊目睭chiah 大蕾问：“你thài bat伊？”我hàiⁿ头：“Tō是我写医生证明hō͘伊，叫伊去chhōe校长ê。”“Tō是hit个lah！阿舅，tō是hit个lah！人拢叫伊赤查某，虎姑婆，金色母夜叉…”我听一下耳á ki-ki叫，soah m̄知beh按怎应，问伊：“按怎金色母夜叉？”“Tī学校，头鬃拢电koân-koân，金色ê koân屐-á，金色ê衫。“O͘h…o͘h…”

二礼拜后曾老师koh来，规身躯穿乌ê，一个面忧忧忧，头鬃散iā-iā，坐tī hia pok 薰 。我问伊：“敢是困bē去，食bē落？”伊tàm头。“头壳hîn，会抽koh会痛？”伊tàm头。“脚冷手冷koh phi̍h-phi̍h-chhoah？”伊头一直tàm，强beh khàu出来。我kā伊安慰，叫伊khah安静一下。问伊：“敢又koh是主任ê代志？”伊摇头：“陈主任退休a，我the̍h hit张医生证明hō͘校长，校长叫伊提早退休。”“按呢tō无问题a。”伊摇头：“医生，chit-má我teh作主任。”“按呢真好。”“医生，按呢m̄好，办公室ê查某gín-á赤pê-pê,pháiⁿ死死。看我人好，拢m̄听我ê话，代志也m̄作，规日头前后壁讲我ê pháiⁿ话…”二chōa目屎凄惨流，双手直直jôe:“医生，我敢是神经衰弱精神病koh来--a？”“Che…”“医生，你写一张医生证明hō͘我，…”