《陈雷文选》

 | | | 转寄

无彩hiah gâu

作者 陈雷 2006.12.10

咱人大部份ùi生到死渺渺茫茫，一生过beh了a也无啥物通好kā人展风神ê成就。不过有时罕罕a也会无张持遇着「一生伟大ê时刻」，亲像Niu-tong（Newton）头壳hō͘苹果kòng着，亲像Ah-khi-mih-to͘h（Archimedes）洗身躯hō͘水淹着，雄雄得着一个一世人瞬间ê灵感启示，ùi hia致使到伟大ê发明，贡献人类，hō͘后来ê人o-ló数念感谢伊。咱chia布袋偏僻ê草地，人口小koh散赤，kan-na有通pha̍k盐，chhun ê无半项。不过近来有一位廖先生大栽，tī伊五十岁hit冬，有kap Niu-tong头壳hō͘ 苹果tìm着仝hit款ê经验，得着灵感，soah一时变作出名ê发明家，到taⁿ大家若讲起，拢犹十分ê尊敬数念。

这个「一生伟大ê时刻」其实也有伊ê因缘原故，tio̍h-ài ùi头讲起，请恁理解。廖先生大栽19岁ê时tī一间汉药店食薪hô作伙记。大概人khiáu koh认真，无几冬tō bat几偌款药草ê名，也会晓学人chat脉，讲脾火、肾寒、大肠气…种种ê道理。自按呢家己出来开一间汉生堂中药店，兼kā人chat脉看病，lī筋络…。因为伊人khiáu，又koh肯kā人说明脾火、肾寒、大肠气种种ê道理，所以不止á生理ka-ia̍h，渐渐tī布袋变作有头有面ê人。

近来咱台湾社会上有teh讨论救母语ê代志，这点廖先生真有理解注重。所以布袋社区成人大学开第一期台语班ê时，伊tō去参加。Hit个曾美丽老师tú-chiah师范毕业，先教in台语罗马字，写he tō͘-kún-á字。廖大栽问老师：“Che tō͘-kún-á字ná是字？”老师讲：“Che tō是咱台湾话ê英文字。”若是英文字这个物件，世界一流伊无计较，旧年tī成人大学伊也有学过，所以tō认真学罗马字，liām-mih tō学会晓读会晓写。

无外久班里一个朋友蔡先生知，伊三个后生拢读大学毕业，大家真尊重伊。Hit日kā廖大栽讲：“这个罗马字无够好。”大栽问：“按怎无够好？”蔡知讲：“我已经发明一套比che koh-khah好ê!”“你家己发明ê?”“叫作蔡氏新世纪文书法。”大栽惊一tiô问：“啥物叫作蔡氏新世纪文书法？”蔡知先生讲：“你若是英语小khóa有基础，你tō知影。这个k应该是g，这个t应该是d，a̍h这个b应该是v，按呢才有道理。”koh讲：“Che tō是蔡氏新世纪文书法。”Taⁿ这个廖大栽旧年有学英语，自认英语小khóa也有基础，hō͘伊讲一下，lú想lú有理，tō开始学蔡氏新世纪文书法。班里陈先生文艺kap黄先生乌鱼tī农会作过代志，头壳teh转mā是紧，拢也来学这套新文书法。

Ná知二礼拜后，hit个郑明理先生，in kiáⁿ是一个相命仙，概成真有学问，英语mā有基础，kā廖大栽讲：“这个蔡氏新世纪文书法无够好，我有一套koh khah新ê。”大栽问：“你家己发明ê?”“叫作明理台文，成大ê教授已经有试过a，赞koh好用！”大栽问：“啥物是明理台文？”郑先生讲：“你英语敢是bat学过？若是小khóa有基础你tō知影。这字ch应该是j，这字chh咱英语无，应该是q，a̍h这字kh才是c，…”廖大栽用伊有基础ê英语一下kā想，mā是有理，tō也来学明理台文。

因为这个关系，成人大学台语班分作二派。文婶a、风琴a、张文艺、远东黄ê kap蔡先生用蔡氏新世纪文书法。Chhun ê大日a、明月a、深井a、中和仙、豆花清a、kap郑先生用明理台文式。Kan-na廖大栽本人m̄知tó一式khah好，bē-tàng决定，有时用蔡氏，有时用郑氏。无外久庄里ê人知影蔡先生kap郑先生拢发明一套新字，大家讲：“实在有够gâu lah，学生比老师khah厉害！”廖大栽听人按呢讲，心内无自在，亲像人teh讲伊无gâu，平平一个老师教ê，人会晓发明，伊thái bē晓!”

心内tō闷闷，ta̍k日恬恬kek头脑，决心beh来发明一套khah赞ê字。暝无食，日无困，坐leh也想，倒leh也想，真久想无一个办法。Hit日tú好菜头嫂a来看血压，一个面红膏赤（chhiah）-chhih，大栽chat伊ê脉，phi̍h-phi̍h pho̍k-pho̍k跳，讲：“菜头嫂，你肝火冲着大肠，气that tiâu leh，我kā你针针leh，开一帖药á kā你通。”Tō kā伊chhak针炙(chiu)，一枝tu̍h tī手里，针大肠经，一枝tu̍h tī面里，针膀胱经，koh一枝chha̍k tī脚尖tu̍h肾经…。He针ná chha̍k ná念，亲像和尚早时teh念经，一时无细字，he针chha̍k ùi家己ê大-pū-ong，雄雄soah恬去，定定khiā tī hia。菜头嫂kā看，taⁿ害a，嘴开开，目睭也无teh nih，一kho͘人gāng-gāng，bē输身魂hō͘摸（mo͘）siūⁿ-á摸去。大力kā chhoah二下，才精神过来，大声hoah：“我知a！我知a！”ùi店里chông出去，tī街á路liù-liù走，直直hiu：“我知a！我知a！”Tú好chông来到庙口，碰着蔡知，双手chang leh问：“大栽，你知啥？”大栽hī-hā笑，嚷讲：“比你ê khah赞！比你ê khah赞！”一枝大pū-ong比hō͘伊看，he针犹插tī hia，to也无teh痛。Tō是tī hit个当时，kap Niu-tong头壳hō͘苹果kòng着仝款，伊大pū-ong hō͘针tu̍h--着，身魂脱壳，得着一世人瞬间ê灵感启示，ùi hia致使到伟大ê 科经」发明。

伊kā宇宙天地万物ê内容分作十四系，tú好kap人体14条经脉相对配，叫作天人合一。每一个字属一个系，亲像「人」 这字属tī膀胱系，kap膀胱经相对，写ê时字尾加一个khô͘-á，表示膀胱。亲像「地」属tī大肠系，kap大肠经相配，字尾画一条长长若腌肠，表示大肠。按呢一字一系，一系一经，清清楚楚，一看tō知影hit个字tī天人合一「科经网」ê地位。关于字母ê部份，有参考蔡氏kap郑氏ê好处，koh再改进，K改作x，v改作w，c改作y，完成一套上盖新ê文字，tō͘-kún-á字lām科经，无人看有，叫作廖氏大栽科经法。

按hit时起，全力奉献台文。病人无看，店里生理放hō͘ in某去hōaⁿ，家己关tiàm楼顶房间内，暝日拍拚。经过六个外月，才完成一本五万字ê辞典，叫作廖氏大栽科经台华英大辞典。家己koh出钱去印，寄hō͘全国各地图书馆。辞典内面有一节感心ê自序：“大栽无惊苦心，经过五十年人生无停考验，将宇宙亿万ê时、空、物、象、能、理、事、念ê概念整理归类，拢总14系60科，完成完整全新ê科学经路网…。大栽科经是咱台湾人家己发明ê新世纪文字，尖端科学ê武器，台湾人文化ê原子弹。…” 辞典完成了后，tī布袋开成人台语班，免费教大栽科经法。虽然bē输传教福音ê心情热心拍拚，总是m̄知啥物原因，一班开落，免一、二礼拜，学生走了了，chhun无半个。廖大栽想，这款好物无人了解，按呢教m̄是办法。若是beh救文化，tio̍h-ài ùi学校内ê学生开始。所以tō去chhōe布袋国小孙校长先进，也tō是伊ê goe̍h- sun -á。孙校长听伊说明科经，概成听有koh听无，概成有理koh sa无niau-á毛，问伊讲：“阿舅，像这个科经法敢有khah简单ê入门？”一时m̄敢决定，kā大栽讲：“你che chiha-nih好ê物件，留tī布袋无彩。我kā你推荐去教育部，全国落去教，大大来发展。”大栽大欢喜，吐一个khùi讲：“你才是第一个真正了解科经ê人。” 孙校长kā科经推荐hō͘教育部国语推行委员会委员董小梅。这个董委员是政治大学中文系教授，对母语教育自来有真感冒ê意见。看着这个科经法，lú看lú花，lú读lú无，欢喜一下讲：“这款好物！教落去到底，学生、老师包你土土土！”马上去chhōe教育部主任秘书容先生包心，tō是伊ê好朋友，母语感冒ê仝路亲家。容主任秘书看了，满面春风，讲：“实在好物！你放心，这项代志我包心kā你包办！”

Tō去联络报纸、电视界ê记者，大大宣传，“创世纪ê大发明，教育部全力推荐！”又koh替伊走chông,争取国际十大发明奖。Hit年八月总统召见，tī总统府hip相。廖大栽人é，khiā tī后壁排边a，无啥看着。去kā相片放大，chah一个放大镜四界报人看：“你看，这个我lah！”菜市á ê查某人看有，拢真感动，问伊讲：“A̍h你kap咱总统thái chiah熟lah？”大栽讲：“登辉仙我古早tō bat a。”卖蚵á te ê阿银a问伊：“A̍h你是发明啥？连总统也叫你去hip相。”Siah甘蔗ê Tiⁿ a khah bat代志，应讲：“Soah m̄知影，发明科学lah。”“科学o͘h，chi-má ta̍k-项mā拢靠科学。”按呢规布袋ê人拢知影大栽发明科学，总统召见，换嘴叫伊大栽仙ê。

咱讲gâu人té命，hit年12月大栽仙破病，诊断肝癌尾期，车转去厝里家己医。食中药秘方，无二个月tō死翘翘。死了in某照伊ê吩咐，墓牌顶刻科经ê字：“大栽科经台文法发明人廖大栽…”Ta̍k个tō͘-kún-á字尾有科经ê大肠、小肠、膀胱…ê符号，无人读有。菜市á查某人拢kā伊可惜，讲：“Tō是siuⁿ gâu，天teh怨妒。”“无彩chiah-nih gâu，写kah无人看有。”死hit年tú好51岁出头niā-niā，实在有影，无彩hiah-nih gâu lah。