《陈雷文选》

 | | | 转寄

暗杀者

作者 陈雷 2006.11.26

阿明半暝转来到厝，老母犹未困teh等伊，入门tō问：“敢有影？美国á kap咱断交”“有影lah，新闻teh报。”“是按怎beh kap咱断？”阿明无想着老母thàn食人卖蚵te，也会问这款kap美国á外交ê问题，chhìn-chhái tō应：“Khi-mo͘-chih bái tō断。”
“Ah有要紧无？”这日有人客买蚵te，kā伊tâu:“Taⁿ台湾知惨a。”所以这暗葱命犹m̄困，专工等阿明转来，beh问伊有要紧无。“阿母，你ta̍k日tī巷á头煎蚵te，我tī市á卖虱目鱼丸汤，hit个美国á总统脚踏，敢成实bat来交关一摆？断无断，生理照作，有啥关系？…作你去困lah，免烦恼che有ê无ê。”葱命坐hia想，这个美国á总统mā是真无情，hoah断tō断。

太平境教会作礼拜ê时，拢有这个生份人坐sòa尾排，无teh听道，也无teh读经，祈祷ê时目尾sut来sut去。便衣ê装作会友teh监视，大家拢tèⁿ m̄知。信坚牧师ùi台南神学院出来到taⁿ，牧会已经30外冬，kā in某讲：“伊来chia听我讲道理，tī这间圣堂ê十字架下底，听会着ê拢是主叫我讲ê话。”所以也tō无计较伊。这个礼拜，美国宣布，新年正月初一起断交台湾。伊tī台á顶向众人念：“…上帝a，你bat弃sak阮，破坏阮，你bat受气阮。求你hō͘我兴起。…你用旗赏赐敬畏你ê人，thang为真理gia̍h起来ia̍t。求你拯救阮，用正手牵救阮，thang hō͘敬畏你ê人得着救。…”阿明坐tī头前排，bē输牧师目睭掠伊看，嘴对伊讲。敬拜soah，会友拢tiām-tiām，大概kap巷á口买蚵te ê人客仝款心情沈重：“Taⁿ台湾知惨a。” Hit日以后，ta̍k暗beh困进前，阿明读诗篇六十篇：“…你bat弃sak阮，破坏阮，你bat受气阮。求你hō͘阮兴起。…”M̄-kú一个问题khê tī心khut，bē tàng解决。过来二礼拜，暗静去chhōe牧师。

请教伊：“有人beh伤害我，我kā伊ê手骨掠leh，m̄ hō͘伊伤害。Che敢是基督ê教示？”牧师应：“有人beh kā咱tìm石头，咱kā伊ê手骨掠leh，m̄ hō͘伊tìm石头。有人beh kā咱车落古井，咱kā伊ê手骨掠leh，m̄ hō͘伊车。有人beh伤害咱，咱kā伊手骨掠leh，m̄ hō͘伊伤害。因为咱敬畏主，伊tio̍h kā咱保护，hō͘咱无受伤害。”阿明ta̍k暗生理作soah，转去厝祈祷：“有人伤害我ê土地，我beh kā伊手骨掠leh，m̄ hō͘伊伤害。有人kā阮ê百姓tìm石头，我beh kā伊ê手骨掠leh，m̄ hō͘伊tìm石头。有人kā阮ê国家车落古井，我beh kā伊ê手骨掠leh，m̄ hō͘伊车。…主a，请你用旗赏赐敬畏你ê人，thang为真理gia̍h起来ia̍t。”经过二个月，koh去请教牧师：“我ta̍k日请求主，用旗赏赐敬畏伊ê人，thang为真理gia̍h起来ia̍t伊拢无听着。”牧师牵阿明ê手，chhōa伊祈祷：“主a，tī阮无看见ê时，请你hō͘阮有目睭；tī阮无听着ê时，请你hō͘阮有hīⁿ空；tī阮踌躇惊惶ê时，请你hō͘阮勇气kap智慧。”Kā阿明讲：“你tio̍h耐心等候主ê安排。”

受难节前一工，规日乌阴，雨sap-sap滴，bē输这年天顶ê怜悯早一日到位，提早落受难日ê雨。人讲che雨水是天teh流同情ê目屎，thang洗食苦人ê苦心。暗头á，牧师暗静叫阿明去，kā伊讲：“明á chài耶稣受难日，主beh用旗赏赐敬畏伊ê人，thang为真理gia̍h去起来ia̍t。”阿明了解牧师ê意思，应：“我等候真久，已经准备好a。Thang为真理gia̍h旗á起来ia̍t。”牧师讲：“感谢主，伊叫你担这个重担。”Ùi thoah á底the̍h一个塑胶袋á出来，交hō͘阿明，讲：“拢tī chin。”Koh讲：“Tōaⁿ二枪，tōaⁿ chia。”比家己ê胸坎。Koh吩咐：“药á先吞落，tōaⁿ了m̄ thang走。”阿明知影，若是活活掠去，受苦刑，秘密会漏泄出卖---。“拢总几分钟？”阿明问。牧师应：“有够lah，---15分。”He药á已经hō͘猪á试验过，吞落去15分钟，药气才会到。所以牧师讲，有够lah，15分。阿明kā塑胶袋藏好，o͘-to͘-bái驶leh转来。老母已经困a。袋á tháu开，内面一本厚册，基督山恩仇记，中央ó͘一空，内面khǹg一枝枪，另外一个细包纸，内面一粒药片。Té枪the̍h出来巡好势，枪chí入好a，the̍h一张纸来写：“Mn̂g-á-chài I iōng bah-thé thè chē-chē lâng siū-lān。”亲像伊这时人peh上koân山瞻kún-iāⁿ ê大海，目睭看真明白，hīⁿ á听足清楚。

小北á无牌ê贩á听着风声，警察总出动，上大粒ê beh来，早tō先走lī-lī。未中昼，警察大队tō先到，巷á头、大路口封起来，市á内面人客赶了了。He警察齐齐khiā规排，一个óa一个ùi大路排入去到市á内面，拢胸前mo͘h棍á,kha-chhng头phāiⁿ té枪。阿明已经计算好势，猪哥嘴ê ùi这旁大门入来，行到‘阿香鳝鱼面’，伊tō冲出去，tōaⁿ二枪，tōaⁿ胸坎。牧师讲，时间有够，拢总15分钟。

“总统万岁！---总统万岁！---”外面人teh hoah，续落一阵人e-e sak-sak ùi这旁大门入来。一个中年查甫人é-é tǹg-tǹg，围tī中央，戴一顶野球帽，有一个猪哥á面斗猪哥á嘴，挂一副乌框目镜。“总统万岁！---总统万岁！---”Hia ê贩á tòe人hoah，猪哥嘴ê kā大家ia̍t手。阿明也tòe人hoah，看he猪哥嘴ê向‘阿秀鳝鱼面’这旁行来，赶紧药á that入去嘴内，ku̍t一下吞落去。Tú-tú这时，无代无志oat一个头，注死看着一个查某gín-á tī大门口路边teh卖衫，he面皮若桃á日头pha̍k熟去，水红赤红；he目神若真珠月光洗过，乌金光通，soah一个猪哥á身魂若魔神á掠去天顶飞，双脚钉死m̄进前，雄雄hoan一个身，se̍h一liàn-tńg，又koh向大门口oat倒出来。

这头月光看一群人来，叫是生理到，hoah：“人客买衫来，俗ê lah。”The̍h一领大花ê香港衫tī手里lāng。猪哥嘴tìm一个头，便衣ê chhîⁿ óa去，kā月光e过来伊身边。二粒niau鼠目chhuh-chhuh，笑微微讲：“好，好。”Koh iⁿ-iⁿ ò͘ⁿ-ò͘ⁿ 问月光，月光听无，学伊讲：“好，好。”猪哥嘴欢喜，the̍h香港衫来穿，一手moa月光ê肩胛。随tō有人chhih-chhih chhia̍k-chhia̍k hip相。便衣ê chhōa头拍phok-á，贩á也拍phok-á，当teh闹热koh烧lō。真是万事人teh作，天teh chhiâu，tō是准准这时，雄雄雷公sih-nà ，头壳顶乌天暗地，lin-lin lòng-lòng，phi-phi phia̍k-phia̍k，bē输天pit--开，soah teh青狂siàng大雨。若像是雷公kòng 着，sih-nà chim着，he猪哥嘴ê一个面反青，惊kah神神hāⁿ-hāⁿ chhāi tī hia，双脚直直chùn。便衣ê惊出代志，作一下chhîⁿ óa来，一siū狗hia kng大饼，e-e车车sak上车，hu̍t一下拚死逃命，走kah无看去。

Taⁿ m̄知是thái chiah龟怪，即时大雨停，云无去，天也清起来，日头又koh大出。警察pi-á pi-pi叫，大声细声直直pûn，冲来大路顶赶人。市á内ê贩á hoah：“去a！去a！”阿明tòe人chông出来看，害a，车kap人拢无去a！惊一tiô，拚死jiok mā bē赴a。赶紧chông倒入去，hit堆虱目鱼丸thia̍p尖尖，一chhok koân-koân内底藏一枝té枪，kâⁿ起来，规个piàⁿ落去ka-chù，kōaⁿ leh tō走。Chông入去便所，挂枪挂丸á拢总倒落去屎ha̍k。Tú好15分钟时间到，药气发作，头壳hîn一下，phiāng一下倒tī土脚m̄知人去。

太平境教会hit暗受难节敬拜，阿明kap葱命无来，信坚牧师有注意着。电视报告，蒋总统巡视台南府城，专工去小北á慰问thàn食人，慈祥关怀，亲民爱民。Mā有一手moa一个súi查某gín-á kap伊hip相。无讲惊一下面青sún-sún，bih青狂雨ê代志。隔日早起，葱命来chhōe牧师，tàm头敬礼，问伊：“敢m̄是主放sak咱？”牧师知影，暗杀失败，阿明牺牲。Hit阵青狂雨kap hit个súi查某gín-á救着一条猪哥命。葱命the̍h一张纸念：“明á chài伊用肉体替chē-chē人受难。”Tō是阿明用罗马字写ê最后ê话。原来暗杀ê计谋葱命早tō知影，tiām-tiām无讲也无问，tèⁿ m̄知。目屎lún--leh，双手抱tī心头，牧师应：“主无放sak伊。亲像主耶稣钉十字架ê时，伊叫主a，你thái会放sak你ê亲生kiáⁿ？M̄-kú主无放sak伊。”Kā葱命行礼。

告别式hit时，牧师tī台á顶讲：“…主a，请你拯救阮，用正手牵阮，thang hō͘敬畏你ê人得着救。…”告别式soah，葱命来chhōe牧师，the̍h一个塑胶袋á交hō͘伊，内面一本厚册，基督山恩仇记，无khǹg枪也无药á，问牧师：“主用正手牵伊，thang为真理gia̍h旗á起来ia̍t，hō͘敬畏主ê人得着救。…为啥物失败？”牧师tiām-tiām kā塑胶袋kap册收起来。伊知影，这个thàn食ê老人葱命，tī chia失去伊ê kiáⁿ，mā失去信主ê心。伊为伊恳求痛心艰苦。

1979年正月初一，美国kap台湾断绝外交。买蚵á te ê人客又koh kā葱命tâu:“台湾taⁿ知惨a。”Tēⁿ饭丸ê勇a受气，骂人客：“知啥物惨？！家己soah拢无半撇？！”Hit年受难节警备总司令部并无暗杀蒋经国ê案件记录。Kan-na hit日小北á派出所派人调查，卖虱目鱼汤ê贩á郑恩明4月初9 tī公共便所暴死，讲是pháiⁿ gín-á食毒，记录是按呢写。

1984年，「台湾独立革命军第5小组案 」破案。掠吕清波、赖信坚kap蔡水火三人。吕清波来往日本，主动联络台湾独立革命军总部，阴谋暴力推翻政府，算是主犯，判无期徒刑。从犯赖信坚、蔡水火二人，拢判25年。M̄-kú这个前后拢无查着1979年受难节暗杀蒋经国ê代志。

1987年蒋经国过身前6个月，台湾39冬戒严令解除。葱命hit年74岁，专工陪牧师娘去泰源监狱探监，看信坚牧师。牧师已经头毛拢反白a，葱命kā伊讲：“咱解严a。”牧师欢喜，应：“我知影。”葱命koh问：“敢是原来主无放sak咱？”牧师知影伊ê意思，应讲：“咱信心永远，伊无放sak咱。”葱命想起八冬前，受难节暗杀失败，失去伊ê kiáⁿ ê时，牧师讲ê话：亲像耶稣钉十字架，伊叫主a，你敢放sak你ê亲生子？M̄-kú主并无放sak--伊。这时葱命koh再念阿明写ê话：明á chài伊用肉体替chē-chē人受难。牧师tìm头，用目光牵牧师娘kap葱命，kā这二个一世人葱á命ê老查某人讲：“Tio̍h照顾，靠家己。”牧师娘真自信讲：“有人beh kā咱tìm石头，咱kā伊ê手掠leh，m̄ hō͘ 伊tìm石头。Thang gia̍h旗á为真理起来ia̍t。阿们。”