《陈雷文选》

 | | | 转寄

作罪lah

作者 陈雷 2006.11.12

(1)

无想着昨暗雨落hiah大，像teh piàⁿ面桶水，相连续落几nā点钟。透早天soah清起来，云也无a。雄雄雨拢停去，大路洗kah金金，上好tō是这条大沟，pùn-sò châng kah清气清气，chhun几位积沟á土ê所在，因为已经有发长草，无hō͘水châng去。落大雨了tō是按呢，连大沟ê臭味mā无去。

这tah离学校犹hn̄g，普通时无啥人。这日透早大沟边已经围一阵人，kheh来kheh去bē输teh看戏。“死狗á lah！”“死狗！？你目睭thoah-thang。死猪á kiáⁿ khah有影lah！”“死猪á!？你目睭屎糊着！”Hit二个学生kheh tī后面，看bē啥会着，nè脚尾teh相chèⁿ。下面大沟底，一个挂乌仁目镜ê查甫人khiā tī沟á土积koân起来ê所在，gia̍h一枝竹篙lā来lā去，teh钩(kau)水里ê死猪á｡“着a！钩着a！”头前ê人按呢hoah。He死猪á tú好khê tī大沟oat角hit tah，hit个挂乌仁目镜ê查甫人双手kā竹篙liâu-liâu-á liú过来。这时虽然水势已经退一半a，犹是kòng-kòng流，差一sut á koh hō͘ châng去。

Hit个挂乌目镜ê查甫人kā婴á ko͘起来，khǹg入去ka-chù内面，索á pa̍k好拍一个结，沟á顶另外一个查甫人kā ka-chù liū起来。大家作一下围óa来，相争beh看。“婴á lah！一个红婴á lah！紧！紧！”头前有人hoah，后面ê作一下chhîⁿ作前去，差一sut á e e落去大沟底。大路hit头一阵流浪狗五、六只，m̄知是鼻着婴á味抑是学人斗闹热，也拢chông-chông来，跳来跳去直直吠。Tú好当teh闹热，有人去叫警察来a。Ka-chù拍开看，成实内底一个婴á，光光规身躯，chhun一条破布á tîⁿ tī ām-kún，头毛长长长，头壳kap面拢掩leh，像m̄ bat剃过。“侥幸a，查某婴á lah！”chiⁿ tī上头前hit个大kho͘查某人穿一领大kho͘花裙按呢hoah。“死ê lah！死ê lah！”赶紧头壳顶hit条红巾á giú来掩hit个大鼻。“Che婴á啥人ê?”警察问，大家恬恬。“Khong ê ê!Hit个khong ê ê!”一手掩鼻，一手比大沟khah koân hit头，ná比ná行。警察tòe伊行，大家tòe警察行。Hit阵狗作一下chông作前去chhōa路。

He狗nǹg过pōng空，走去到peh-kiā起lih hit头大沟顶等。Hn̄g-hn̄g大沟底óa壁有a-iân-phiáⁿ搭ê寮á，二间相tú-óa，beh倒beh倒。“Ti hia lah！Tī hia lah！”大kho͘查某人比hō͘警察看，he掩鼻á ê巾á the̍h掉大声hoah。

警察ka-chù kōaⁿ leh，ùi路旁hit chōa kiā-kiā ê石gīm-á 行落去。He沟á底普通时lah-sap lī-lô，死狗死niau拢有，热人时臭kah连狗mā m̄落去。Chit-má虽然大雨了，mā无人beh tòe落去，khiā tòa沟á顶hn̄g-hn̄g看，he狗tiàm gîm-á顶吠。

警察落来到沟á底，雄雄一个阿婆ùi寮á内面探头出来，规头壳ê白头鬃，散iā-iā，phòng sai-sai，无看着面tō koh kiu入去a。“M̄是伊lah！koh过hit个！”大kho͘查某tī沟á顶hiu。

警察tī hia探来探去，一晡才chhōe着寮á入去ê所在。头àⁿ leh入去。一时á久，雄雄寮á内一声足大声，像teh哀koh像teh吱。雄雄kā听，无sêng人声，概sêng狗起siáu teh叫。Liâm-mih hit个警察出来，一手拖一个查某，双手手扣扣leh。He查某头鬃长长长，散iā-iā，moa一领退kah无色ê衫，破kê-kê，阔lòng-lòng，bē输布袋。沟á顶ê人拢会认得：“Khong ê lah！ Hit个khong ê lah！，也有人hoah：“Siáu ê lah！Hit个siáu ê lah！”

来到大沟顶，大家围leh看。这个khong ê也kā in看，二蕾目睭m̄知是惊抑是欢喜，chha̍uh-chha̍uh nih。Hit个面圆圆扁扁，khàm一iân土，嘴唇翘翘，顶koân有一个khî。看起来m̄知是20岁抑是40！学生gín-á kā伊phùi-nōa，警察kā伊ah入去车里，tō载走去。Hia ê看闹热ê犹无够khùi，m̄ 愿soah戏，khiā tī路边一人一句：“夭寿lah！一个婴á犹未满月，活活淹hō͘死！”“生生beh创啥？会晓生bē晓饲，作罪lah ！” 路口踏三轮车ê按呢讲。Hit个大kho͘查某上大声，红巾á pa̍k倒转去头壳顶，hàiⁿ 头：“Khong mā无人khong kah这款！”另外一个无头毛ê阿公á 拐á thuh leh ná行：“可怜lah，khong-khong敢会知影一个啥？”大家才散散去。

(2)

M̄知tòa tī沟á底外久a，大概是阿婆来以后。这个所在地势khah koân起来，m̄ bat淹着水。代先是箱á纸khàm ê，落雨tō pháiⁿ去。尾a用a-iân-phiáⁿ kēng，tō加真好势a。Tú来hit chām，ta̍k日phāiⁿ一个大个竹láng，kap阿婆出去khioh字纸。尾a字纸无khioh，家己一个四界se̍h，主要是khioh食ê，m̄ bat去kāng人，人也m̄ bat去kāng伊，所以无人知影伊ê名。若是有名，大概kan-na阿婆知影。大家拢chhìn-chhái叫伊“Khong ê”。

拢先去上帝庙hia，因为庙口有人卖食，pùn-sò拢tún tī庙边巷á头。M̄-kú有时siuⁿ早去，pùn-sò犹未tàn出来，tō khioh无食。有时siuⁿ òaⁿ到，pùn-sò piaⁿ出来，狗已经先食了a。这日tú好一大包tī hia，伊赶紧kā pùn-sò iah开，khioh丸á kap菜枝食。Tú-chiah péng二下，he狗来a，一阵七、八只，作头ê一只狗母，乌色lām土色，正旁无目睭，ná吠ná冲来。伊gia̍h khioh字纸ê铁钩kòng狗，he狗拢m̄惊伊，颠倒受气，lú吠lú雄。He狗母上pháiⁿ，冲来咬，差一sut á nauh着脚。惊一下，丸á that tòa嘴里赶紧走。

Ùi hia se̍h一大liàn ，ná行ná chhōe，来到车头圆环hia，四、五个踏三轮车ê teh排pān。这个春福排tī头pān，50外，作公a，咬一枝薰吹tō叫：“兰a beh坐车？”这个“兰a”tō是in踏三轮车ê kā伊号ê名。水a轮tī后pān，少年家20外犹未娶，上盖爱kā凌治。一粒粽the̍h出来tháu，咬一嘴食hō͘伊看。兰a看人食粽，停脚落来，khiā tiàm hia看m̄走。看kah pak肚iau，嘴nōa直直吞。水a看兰a一领破衫阔lòng-lòng若布袋，内面二粒奶有掩若无掩，siâⁿ kah手ngiau。粽食一半，问：“兰a beh食粽？”一粒粽the̍h来伊面前kā siâⁿ。兰a伸手àⁿ来the̍h粽，二粒奶tō看现现。水a手m̄放，一手粽gīm leh hō͘伊咬，一手tō伸入去衫里摸伊ê奶。兰a pak肚iau顾食粽，奶顾在水a摸，一时á半粒粽食了a，oat leh tō行。水a骂：“干！恁父犹未烧lō leh，作你走！”Hia ê踏车ê，春福a、阿西a kap良朋a笑kah hī-hā叫，良朋a讲：“明á chài、恁父教你一步。”

隔转日兰a来，春福a叫：“兰a来坐车。”kā良朋a nih一个目。良朋a the̍h粽出来peh，兰a óa来看伊食粽。良朋a刁古董，假仙m̄ chhap伊，粽作伊家己食。兰a pak肚iau，挡bē tiâu，伸手来the̍h粽，衫掀开beh hō͘伊摸奶。良朋a伸手摸伊ê奶，粽也m̄ hō͘伊，顾家己食，ná食ná摸奶。兰a顾看粽，等beh食，奶顾在伊去摸，khiā tī hia等。良朋a粽liâu-liâu-á食，奶liâu-liâu-á摸，阿西a看bē作得，讲：“Mā m̄通chiah夭寿，一粒粽niâ。”良朋a粽食了，兰a khiā tī hia等，犹m̄走。良朋a kā hat：“粽食了a犹teh等啥？走！走！走！”Hia ê踏车ê，春福--a、水--a kap阿西--a又koh笑kah hī-hā叫。Sńg了犹无够khùi，春福--a讲：“Che无啥！明á chài看我，包你八马（pat-má）！”“八马？！老岁á m̄认输，让少年ê khah有影lah！”水a按呢kā tu̍h。“干！m̄甘愿？kap你插！”“插来lah！”“插啥？”“一包薰lah！”结果水a、阿西a kap良朋a一人拢插春福a一包新乐园ê。

Hit日暗头á兰a来，春福a叫：“兰a来坐车。”The̍h二粒粽出来hō͘ 伊看，兰a óa来beh the̍h 粽，春福a粽gīm tī手里m̄ hō͘伊。兰a衫掀开beh hō͘伊摸奶，春福a讲：“兰a坐车才食粽。”兰a听有，大脚竹láng á phāiⁿ leh，peh起lih三轮车坐。春福a薰吹嘴收起来，一条巾á hàiⁿ tī肩头，车踏leh sù-sù走。

过有一晡á久，踏车转来，无看兰a。“按怎？！有输赢无？”Hit几个围leh问。春福a gī-gī笑m̄应 in。水a骂：“干！a̍h是有抑无？kan-na笑he giàn头ê。”春福a phùi 一嘴槟榔，比二枝指头á:“八马lah！二粒粽八马lah！”“干! a̍h成实khong ê也会晓?!”“会晓？koh m̄是kan-na会晓niâ！”大家笑kah东倒西歪，“Khong ê mā会晓！”按呢hoah，一人输一包新乐园hō͘春福a。

Tō是按呢兰a若khioh无食tō来车头hia讨粽。He踏三轮车ê有时有hō͘伊粽，有时无，m̄-kú拢有kā摸奶，有时载伊去别位“八马”。附近thàn食人拢知影这项代志，一句话传来传去，“干，he khong ê mā会晓。”

(3)

生hit暗落规暝ê sap-sap雨，chit-má kā想起来，有人讲tō是天公伯a替婴á teh流目屎。He婴á生出来细细汉m̄成物，有皮无肉，jiâu-jiâu 若一只niau-á kiáⁿ，也bē晓háu。阿婆kā伊斗生，用嘴咬kā转脐，一tè破布包leh hō͘老母抱。老母kā婴á áⁿ leh，寮á内面暗暗，kan-na大沟顶一pha路灯hn̄g-hn̄g照入来，婴á生作啥款也看bē出来，也bē晓饲乳。婴á恬chiuh-chiuh，kan-na有时á ngia̍uh一下，才知影犹活leh，m̄是死ê。

隔转日昼昼才出门，来到上帝庙口，he狗看伊脚脊āiⁿ一个láng-á，胸前phāiⁿ一个婴á，又koh鼻着婴á味，拢足受气，凄惨吠。Hit只乌色lam土色ê狗母，家己mā chhōa一阵狗á kiáⁿ，上盖雄，jiok来beh咬。兰a m̄敢óa去，oa̍t头tō走。

又koh se̍h一大liàn来到车头圆环hia，春福a叫：“兰a来坐车。”一kā看，这日兰a脚脊phāiⁿ 一个竹láng，胸前āiⁿ一个袋á，奶á遮leh无看着。奇怪m̄知he袋á内面是啥物，掀起来看，ai-ioh-ōe，内面一个婴á，头毛长长长，脚手若柴枝á，ngia̍uh leh ngia̍uh leh。“侥幸--a，che是啥物？！”水a、阿西a拢来看。“Taⁿ是狗á kiáⁿ抑是niau-á kiáⁿ？”伸手kā摸，一粒头nńg-nńg若椪柑，头毛póe开看he面，koh鼻目嘴拢有。“一个婴á lah！”He婴á hō͘人吵醒，hiⁿ一下想beh háu，háu bē出声。He面liap作一球，sêng一只猴，ná有sêng 婴á?大家看kah起爱笑，水a讲：“福a，che婴á有sêng你！”春福a骂：“乌白讲，你看che鼻kap嘴，khah sêng阿西a。”阿西a讲：“干！你看che目睭，一蕾大一蕾小，水a ê无m̄-tio̍h lah！”Tī hia ná笑ná chèⁿ，无人beh认。兰a khiā hia等beh食粽，衫掀开beh hō͘ in摸奶。水a比福a，讲：“Kā老父á讨。”春福a比阿西a：“老父tī hia。”无人beh粽hō͘伊。Liâm-mih人客来beh坐车，“走！走！”tō kā伊hoah hoah走。

Se̍h去到兴南客运头前，路边阿婆teh煎粿，khiā tòa hia看m̄走。阿婆看伊一身躯thái-ko nōa-lô，āiⁿ一个婴á可怜无通食，thuh一tè粿hō͘伊。兰a粿the̍h leh食，衫掀开beh hō͘阿婆摸奶。“紧去！紧去！”阿婆kā iat手，嘴内念：“实在有够pháiⁿ积德o͘h！Hia ê踏三轮á车ê!”

(4)

Tī chia热人若落大雨，定定tō会淹水。不过hit tah地势koân起来，犹m̄ bat淹过水。这暗实在落了太雄，水bē赴流，大沟若溪á lòng-long叫。He水ká入来koh ká出去，婴á困tī土脚tòe水流出去，也无哀，也bē赴khàu。隔转早起来，水退a，兰a chhōe无婴á｡雄雄一个戴帽á ê查甫人kōaⁿ一脚ka-chù入来。拍开hō͘伊看，婴á tī hin内面。伊欢喜kā婴á抱起来，婴á冷ki-ki，nńg siô-siô，衫掀开kā婴á饲乳。婴á m̄食乳，也m̄ khàu…。戴帽á ê查甫人kā婴á抱去，伊m̄ hō͘伊抱，双手lám leh抢hit个婴á，抢输大声哀。查甫人kā婴á tàn入去ka-chù内面，用手扣双手扣leh，kā伊拖出来。外面天已经清彩，日头mā出来a，风mā停a，一大阵人tī沟á顶kheh来kheh去，有人指头á kā伊指（kí)，“作罪o͘h！一个婴á活活淹hō͘死！”“可怜lah！khong-khong敢会知影一个啥？！”“夭寿lah！kan-na会晓beh生……”