《陈雷文选》

 | | | 转寄

人生59

作者 陈雷 2006.09.17

Tī台中市，差不多大家拢知影，姓赖ê in是三代ê大好额人，自in an公赖铁起，tō是gâu看厝瞻（chiam）地，chit-má听讲市内四界kan-na有店面ê楼á 厝上无也有3、40间，菜市á 对面hit chōa，规排拢in ê。有一项心适ê tō是，姓赖ê，自in 阿公起，tō是三代孤kiáⁿ单传，tú好赖铁、赖钉kap赖皮拢单单生一个查甫kiáⁿ，所以财产无分散去，lú积lú chē。

另外一项大家拢知影ê，tō是in虽然钱财丰富，三代拢是ùn盐咬姜ê kiat á哥，冻霜鬼。看起来，che也是一种遗传。有人讲，tō是chiah-nih liap屎无量，才会孤láu三代bē分枝。特别是这个赖皮，岁头食到50外，chhōa一个某，生一个kiáⁿ，省kah衫m̄甘买，鞋m̄甘穿，出门tō是lan-lin-guh拖浅拖。酒koh是上盖兴，拢beh lim别人ê。罕罕a lim久pháiⁿ势，讲伊今á日beh请，拢tú好身躯边无chah钱。所以朋友交无几个，拢是不得已生理来往ê niā-niā。

这个少年家邱进行tòa tī赖皮厝边，kap伊有熟悉，tī第一产物人寿保险公司食头路卖保险。公司ê主管知影赖皮好额，kā伊讲：「你这个厝边赖先生，钱饱饱，厝规chōa，若招有伊一栋生理，khah赢招别人十栋。」进a知影赖皮作人khiap屎，he金钱有入无出，khah kiâm he卖盐ê，kā主管讲：「这个赖先生，beh thàn伊一仙钱khah thiám liàm伊一枝毛。招伊一个不如招别人10个。」主管无欢喜讲：「咱公司tī台东业务扩张，tō是欠你这款会冲ê去开发。年底以前，若是赖先生这栋生理犹作无，你tō会使去hia拍拚经营。」

这个邱进行想：「Taⁿ le̍k ah。我父母、查某朋友拢tī chia、若是派去台东，m̄-tō khah thiám hō͘人放生去！」赶紧tō去chhōe赖皮，请伊lim酒，招伊买保险。这个赖皮一年m̄知外chē人来招伊买保险，内底空头拢知影，问讲：「恁公司看头hiah大间，a̍h是有实无实？会倒bē倒？」进a讲：「阮公司旧年业积全台湾第一枝，ta̍k年thàn大钱，内面外面实实实，beh thài会倒？」赖皮讲：「恁公司ê钱拢是客户收来ê，若是公司thàn大钱，tō是客户了大钱，我ná通kā你买？」

按呢连续请伊lim 3 thoaⁿ，he赖皮若像ham-á死去sa̍h bē开嘴，一句「ok」讲bē出来，m̄买tō是m̄买。进a看破无法度，chhōe查某朋友讲：「香a，年底咱来去台东拍拚开发。」He香a雄雄听无，hoah讲：「Taⁿ你是teh讲啥？」进a kā伊说明，才知影m̄是讲sńg ê。想想leh问：「这个赖先生，钱khah爱，抑是命khah爱？」进a讲：「若是赖先生，钱比命khah有重。」香a问：「A̍h这个赖先生，性命拢总有几条？」进a讲：「Mā是kap咱仝款，一条niā-niā。」香a讲：「若是按呢，代志tō好办。」Kā进a讲，你按呢生…按呢生…。

Tō先去作一个「客户了解」，资料调查详细，一切准备妥当，koh来chhōe赖皮，请伊lim酒。赖皮讲：「咱酒bóng lim，保险ê代志免讲。」进a讲：「赖先生，你若是楼á 厝m̄保，性命mā ài保。」赖皮问：「Che是按怎讲？」你楼á 厝hiah chē间，一间烧了犹koh有。若是性命单单一条，无去tō乌有（iú） ah。」赖皮讲：「保厝保命拢仝款，公司thàn钱，客户了钱。」进a讲：「若是你，无仝款。你买人寿包thàn钱，bē了钱。」赖皮问：「按怎包thàn钱？」进a讲：「你今年买人寿，明年死，一年保险金tō领来，thàn大钱。」赖皮无欢喜：「你是teh讲啥？我一世人勇健健，m̄ bat破病，按怎明年死，领保险金？」

进a chhìn-chhìn a笑，按皮包á内抽一张纸出来，tō是一个拍字整齐，印好ê表。进a按顶koân到下面一chōa一chōa比hō͘赖皮看。「你看，这个你ê阿祖赖有。」Kā看，名ê边a一个数字59。赖皮问：「这个是啥？」「这个tō是伊人生59。」「59岁死？」进a tìm 头，koh比：「这个你ê阿公赖铁。」Kā看，边a mā是一个数字59。问：「人生59？」进a koh tìm 头。Koh读落去，下面 hit chōa tō是老pē赖钉，mā是59岁死！大惊一tiô，手phi̍h-phi̍h-chhoah，酒sa来lim。 进a知影伊心内摇hián ，m̄放伊soah，继续进攻，大声问：「赖先生，你今年外chē?」「相鼠。」「相鼠ê 58。」He赖皮人若紧张，面tō kiù筋，嘴歪一旁去。一般讲来，这lō khiap屎ê冻霜哥拢无胆，上盖惊死，sīm一时a才应：「明年59。」

进--a tìm一下头，讲：「Chit-ma阮公司特别优待，凡是无有破病记录ê，60岁以前买，m̄免身体检查。」Taⁿ thàn钱ê代志，m̄免人讲，伊真紧tō算有。Tō是按呢，赖皮一世人第一回买保险，mā顺续kā in某买一份，因为喜a mā是相鼠，今年58。

隔几工邱进行买一个时钟来送赖皮。赖皮讲：「A̍h你成实ê，未曾未tō送钟来，beh hō͘我死。」进a讲：「专工拜托人按日本the̍h转来ê，kā你说多谢lah。」The̍h tī手里看，he钟细细ê á，古锥古锥，电池充ê。进a讲：「你看。」时间choān一点正正，he钟soah会唱歌，tân「Hō͘ Alice」ê古典音乐，koh来soah有一个súi查某gín-á出来，跳艳热ê脱衣舞bang-gah。精彩跳差不多beh kah 2分钟，音乐tiāⁿ去，查某gín-á雄雄无去。赖皮koh kā choān看māi，侥幸--ah，2点也会跳，3点也ē跳，he查某gín-á见若着点tō出来跳脱衣舞ê bang-gah。

欢喜一下，时钟the̍h转来厝，khǹg tī眠床头，日时斟酌等，时间到tō来看bang-gah。暗时无看惊了电池，beh困进前电池先pak掉，透早起来才拍电话去电信局问时间，kā电池khǹg倒转去hō͘伊行。In某喜a看伊爱看脱衣舞ê bang-gah，一日tī hia chiú时间，心内无欢喜。问伊che钟是按怎来ê，才知影in翁有买人寿保险，包明年大thàn钱。想想leh，无啥tio̍h头，kā赖皮讲：「A̍h你若是成实明年beh去，mā tio̍h先去hō͘医生检查一下，看是啥病。」赖皮hō͘某讲一下，心头闷闷。人想着死，难免不安。过年了，lú想lú挡bē tiâu，去荣总大病院作检查，规身躯按头到脚，按内到外验透透。结果无一项têng-tâⁿ，kan-na大肠口hia生一粒真珠大ê零散肉á，顺续切掉。医生讲，无代志，勇健食到百二。

按呢赖皮才放心，m̄-kú也soah来失望。Taⁿ若犹未beh死，无彩买hiah chē保险。想想leh ，叫进a来问，讲beh退保。进a讲，退保会使，ài罚金。按呢teh bē-tàng决定。Ná知tú好hit日lim酒转来，路里落雨pháiⁿ行，无tú好浅拖落一脚，poa̍h一倒hō͘过路车tōng着，lòng一下m̄知人，车去病院救。医生讲内伤脑出血，紧急开刀。开了人soah顾困m̄醒。医生kā喜a说明，脑受伤siuⁿ厉害，taⁿ bē醒ah。按呢一困三工无醒，in某想无步，转去厝里the̍h hit个日本时钟来，chhāi tòa病院眠床头，choān hō͘时间tú-tú一点到，he钟tō唱歌跳bang-gah。喜a kā时钟tu tòa赖皮耳空边，大声叫：「皮a，时间到！」成实好用，he赖皮无张持目睭皮thí金来，beh看bang-gah。In 某大声kā 伊讲：「医生讲你无救ah。」赖皮听了停一时a，有一个微微ê笑容，kā某讲：「佳哉he人寿ê有买无退掉。」Koh看hit个时钟，2分钟到，「Hō͘ Alice」kap bang-gah拢无去。赖皮吐一个khùi，吩咐讲：「暗时会记得，电池无用ài pak掉。」讲了目睭kheh，隔日tō过身去，算算leh，tú好人生59，赖皮食到到，kap赖有、赖铁、赖钉仝款，财产成百亿，koh加hit个第一人寿保险3千万。

这笔钱付了，第一产物人寿保险公司ê主管无欢喜，叫进a去讲话：「Taⁿ赖皮这栋生理你也作了ah，咱公司台东欠人经营。你少年会冲，年底去hia拍拚开发，上有前途。」