《陈雷文选》

 | | | 转寄

大头兵黄明良

作者 陈雷 2006.03.05

相命ê算算leh，pok一枝薰，kā切a ê老母讲，旧历五月初七是大好日子，的确亲chiâⁿ会百年久长，明年就生后生。

所以五月初七切a嫁出去hit日，伊ê老母特别欢喜，规个西庄ê人lóng 知影了了。透早陈早伯ê厝头前就围一大堆gín-á beh看新娘。

切a嫁翁出名ê原因m̄是伊真súi，也m̄是伊ê厝真有钱。陈早伯虽然tī西庄有八分外ê田，m̄-kú m̄是好田，kan-na会tàng种甘蔗，bē-tàng种稻á。总是单单查某kiáⁿ一个，食穿无烦恼，算起来，tī西庄iáu m̄是无钱人。

阿切出世ê时，伊ê老母有目屎哭kah无目屎。一来是一个查某kiáⁿ，koh一来是一个缺嘴。He缺嘴虽然无外厉害，m̄-kú后来医生chhōe去到台南，手术二、三摆，mā是bē好势。无彩一个súi查某gín-á面，嘴顶一个khî，透到鼻孔口，讲话iⁿ iⁿ o͘ⁿ o͘ⁿ，bē清楚。

切a大汉了后，伊ê老母替伊chhōe亲chiâⁿ上苦心，西庄ta̍k ê媒人拜托了了，khah看就看bē好势。后来媒人讲kah pháiⁿ势，kā切a老母讲：「等明年某某所在某人ê后生作兵了，chiah看māi。」一年拖过一年，西庄ê人lóng 讲切a嫁无翁。He chhit-thô gín-á夭寿，不时刁工拖木屐来伊ê头前散步念歌：

「切a爱嫁翁，十六、十七súi当当，面圆圆嘴破孔，亲chiâⁿ看过庄内外，khah看mā是无彩工。 西庄少年m̄娶某，东庄gín-á ài作兵，m̄是媒人无嘴súi，嫁妆lóng有照起工，若是庙里问神明，伊讲ài koh等十冬。」

所以切a五月七日坐乌头á车嫁出去子郎庙hit日，规个西庄若像王爷生日时ê菜市á，kā kā滚ê闹热。He媒人替伊抹粉抹胭脂，厚厚一iân koh一iân，缺嘴抹kah无去，明明是一个真súi ê新娘面。

He新娘车ê后壁tòe一只铁牛phoh-phoh喘，顶面一车tīⁿ tīⁿ就是切a ê嫁妆。切a ê老母为伊准备十年ê物件，一年过一年，lú来lú chē，针车、电视、洗衫机、tháng-suh…ta̍k项有，沿路pi-pi pa-pa，来到kiáⁿ婿厝。

2
黄明良娶某hit日，子郎庙无啥物闹热ê所在，也无啥物人知影阿良娶某ê代志。阿良tòa tī庄外圳边ê一间旧厝，伊ê阿姑tòa tī隔壁，透早就来tàu脚手。阿良ê老pē khah早是粗工人，替人作sit ，chit-má身体无好，bē-tàng作khang-khòe，所以厝里lóng靠阿良一个人。

阿良ê pē母虽然散赤，mā有hō͘伊读过小学四年ê册。学校ê先生看阿良tiau直，准伊作gōng呆。所以阿良十二岁hit年冬，伊ê老pē叫伊m̄免去学校，留tòa厝里tàu脚手ê时阵，学校ê先生lóng无讲一句「按呢真无彩」ê话。

阿良读册无法度，m̄-kú khang-khòe上gâu作。Tiau直ê阿良bē晓kap人计较钱ê代志，庄里ê人上爱叫伊去作工。

阿良娶某hit日，上欢喜ê是伊ê老母。He水银嫂食kah beh五十岁，mā m̄-bat摸过啥物针á车，看过啥物电á视。伊看he嫁妆，一厝内tīⁿ tīⁿ khǹg无路，看he新妇抹粉厚厚无半句话，啥物缺嘴无缺嘴mā是lóng相像。

阿良看缺嘴ê切a mā是无计较，代先切a讲ê话听无啥有，无外久就惯势了。切a看阿良tiau直勇壮，心内欢喜，规日一个嘴笑嘻嘻，亲像bē记得家己ê缺嘴。

3
阿良hō͘人抽去作兵hit日，庄里lóng总有四个这款ê大头兵入伍，所以有人keng-thé，子郎庙别物无出产，出产大头兵。阿良穿一领新衫kap一双旧ê树奶鞋，hō͘人kheh tī火车内。伊ê老母来送伊，khiā tī火车ê窗á口，大声kā伊叫，叫伊ài khah细字leh。M̄-kú火车内真吵，m̄知听有无？伊ê老母有听人讲，作大头兵上艰苦，kha̍p bē tio̍h就hō͘人修理。阿良人tiau直，beh按怎好？Koh想tio̍h阿良娶某无外久，厝内无人，beh按怎好？

He大头兵ê兵营tī林凤营koh入去ê所在，坐糖厂ê小火车接大火车才会到。头三个月无人转来，第四个月ê礼拜日才有三个大头兵转来子郎庙。水银嫂叫切a去阿贵ê厝里探听，是按怎kan-na阿良无转来？才知影阿良hō͘人关禁闭，留tī兵营洗便所，bē-tàng转来。Koh去hit个礼拜日，水银嫂叫切a chhōa伊坐小火车接大火车，去林凤营看阿良。He阿良穿一身躯ê兵á衫，一粒头壳剃光光像一粒大粒kan-lo̍k，koh乌koh ta-sán，就是正牌ê大头兵，差一sut á认bē出来。伊ê老母问伊饭有食khah chē 无？切半粒芳瓜hō͘伊食，he有khǹg鲁卵ê便当无时间食，就koh hō͘人叫去洗便所a。

阿良tī林凤营训练十二个月了，转来tī厝里。两礼拜了后，接tio̍h通知，才知影hō͘人派去金门岛，koh一礼拜就ài去高雄坐船。水银嫂a烦恼kah bē食bē困，iáu是切a khah定tio̍h，赶紧替阿良准备一kóa物件。

Hit暝 ī房间内，伊细声kā阿良讲，伊有身a，阿良kā伊giú来身边，暗暗ê中间看tio̍h in某ê目睭kap缺嘴，问伊tiang时beh生？M̄知生ê时按金门转来iáu未？两人倒tī眠床顶，m̄知是欢喜khah chē，抑是烦恼khah chē，一时soah无话讲，kan-na旧厝ê房间内，hit时有白白ê月光按外入来， 一chōa一chōa歪歪 照tī壁ê顶面。

4
阿良hō͘人派去金门一个补给单位。He单位ê王连长讲话一个外省人á腔，kap老芋á兵相像，阿良听lóng无。有一个名叫作林瑞雄ê班长，看伊新来ta̍k项bē惯势，定定来chhōe伊讲话。林班长知影阿良厝里散赤，四个人靠伊一个人，kā阿良讲，等伊ê某生ê时，beh帮忙伊请假，转去看看leh。阿良才知影，这个林班长是大冈山ê人。伊是一个大学毕业生，来金门有六个月a，无食薰，无lim酒，iáu未娶某。

Hit时是一九五八年ê八月，阿良来金门二礼拜，开始lòng大炮，就是八二三炮战开始。作sit人ê阿良，雷公bat听过，大炮koh一世人m̄ bat听过hiah chē。连续一礼拜，无暝无日lòng无停。He补给单位ê人，bih ti碉堡内面，m̄敢出来。有一个老芋á兵beh放屎，禁bē tiâu，tī hia操干kiāu：「他妈的！共产党，国民党，什么鸡巴党，都是天下一般黑，…有什么好打的！？他妈的！老子当兵二十八年，连窝个屎也要打，真他妈的！…」ná讲ná操，看阿良紧张kah bē讲话，笑伊讲：「台湾郎，家里老婆等你…没法度啦！」

话讲iáu未了，一粒大炮飞来到碉堡门口爆炸，炸一下碉堡内面若像大地动…阿良hō͘炮lòng一下倒倒去，耳á吱吱叫，目睭soah无看去…过一时á，土崩了，才雾雾看tio̍h一个人倒tī伊ê脚尾，身躯hō͘土tâi一半，哀哀叫…赶紧kā伊ó͘出来，原来就是pháiⁿ死死ê王连长，惊kah面青sún sún，手phi̍h-phi̍h-chhoah。王连长看是大头兵阿良，大声嚷：「还站在这里干什么！？…快去拿电话来！」阿良m̄知伊teh嚷啥，kan-na听一句「电话」，赶紧去the̍h电话来…

才知影he电话pháiⁿ去拍bē通。Hit时食力ê大炮连续来七、八粒，有ê近有ê远，若像teh创治in。连长phak tī土脚，koh惊koh气，手里hit枝电话khok-khok chhoah，大声嚷：「出去！快出去查线！」阿良听无伊ê话，khiā tī hia无tín动，连长若准阿良惊炮，m̄出去，起变面---「出去！马上出去！」

阿良听无，犹原khiā leh无tín动。林班长听tio̍h连长嚷阿良，óa来kā连长行一个礼，讲：「报告连长，现在炮弹不停…」

王连长平时对这位台湾人ê预备军官无kah意，无空通giâ，无想tio̍h hit时会来干涉，peh起来跳。

「他妈的！你闭嘴！…我说现在出去，就是现在出去！」

大炮一粒续一粒，明明出去就是死…王连长家己惊死，koh m̄叫有经验ê老兵，刁工叫新来ê大头兵出去，实在人讲大头兵死bē了！

林班长khiā直直koh行一个礼。

「报告连长，我出去！」

He连长面á一阵青一阵白。

「他妈的！你造反了！…你是共产党！你…」

「报告连长，我不是共产党。」

「闭嘴！」

「报告连长…」

「你抗命！我枪毙你！」

碰！碰！话讲iáu未了，手枪póe出来，就kā tōaⁿ落去…一枪tio̍h头壳，一枪tio̍h心肝，倒落土脚，血流iáu未了就死去a …碉堡内ê兵á，看tio̍h连长tōaⁿ枪，惊kah无人敢tín动…连长行二步，来到阿良ê身边，hit枝枪tu tòa阿良ê头壳顶，发一句命令，像siáu狗teh pūi。

「他妈的！出去！」

作sit人阿良hō͘ hit个占领台湾ê中国兵王连长命令，行出去碉堡，若像行入去落西北雨ê田里，he大炮像雷公sih-nà，一声远一声近，tân无停。伊行出去tú好四分钟ê时，来到车路弯过去ê所在，一粒炮弹按金门对面飞来，tòa伊ê头壳顶爆炸。He时常叫in台湾人作亲爱ê骨肉同胞ê中国人，tī八月三十一日早时八点十五分，放一粒炮弹，kā大头兵黄明良炸一下连身尸lóng无去。

后来师部派人来调查，查明少尉预备军官林瑞雄「敌前抗命，就地枪毙无误」。差不多一个月后，子郎庙黄明良ê厝里接tio̍h国防部一张通知，讲大头兵黄明良tī金门炮战光荣战死，军部有照例发怃恤金，每一个大头兵，发八百kho͘，会使去乡公所领。

5 黄明良ê老pē m̄甘伊ê kiáⁿ，用这八百kho͘，koh另外借钱，tī圳边离厝无外远ê所在，替明良作一个khong-kut-li-toh ê墓。后来明良ê某切a生一个胖胖ê后生，kap明良真仝面，抱转去西庄hō͘厝里ê人看。庄里ê chhit-thô gín-á听tio̍h切a转来，又koh拖木屐来伊ê厝头前散步唱歌：

「切a爱嫁翁，…」

就是in西庄ê人，iáu m̄知切a ê翁已经tī一个炮战中hō͘人炸死去ê代志，而且hit个in中国人制造出来ê炮战，kap台湾人大头兵黄明良有干啥物tī-tāi?到底为啥物大头兵黄明良ài去金门？In mā是lóng m̄知。