《陈雷文选》

 | | | 转寄

失乐园

作者 陈雷 2006.09.03

(1)

这个所在12月时ê海水已经真冷a，涌mā真大。这暗海防ê又koh掠着一只水鬼，可惜m̄是活ê，已经枪拍tī心肝头hia死a，所以无口供通好问。总是he身尸看起来，18、9岁á，规身躯thǹg-theh，kan-na一领短裤á，kap 以前掠着ê仝款，对面阿共á派来ê 水鬼á兵无m̄ tio̍h。听讲che水鬼有2种，一种是来了后，假作咱ê人，四界探消息。一种是专门来偷咱khiā海防ê兵，掠转去刑。

刘司令真欢喜，亲身来海防单位训话，宣布礼拜日加菜，koh命令hit日831加班，专门为海防ê服务，票司令部总送。以前拍死水鬼á mā是这款奖励。海防ê兵á thiòng kah若gín-á，「他妈的」操干kiāu，等bē赴礼拜日。

这个东引实在是一个真孤单ê海岛，四围规年thàng天ê海风，乌色ê海水。一块山石kan-na会发草，树á活bē起来。以前是无人知、无人到ê所在，kan-na几个掠鱼ê tī chia。一江山战事了后，大陈ê游击队撤退到chia，政府kā in编制作「反共救国军」，m̄是正规ê部队。所以限制tī chia，bē使走去别位。Che是我来以后，in kā 我讲ê，其他poa̍h-kiáu相拍枪杀ê代志，后来自然渐渐知影。

以前无预备军官来过，我算是第一期，又koh是野战病院ê少尉医官，所以款待无仝。亲像831这个所在，院长tō有特别交代，我bē使去买票。反共救国军每一个单位，二礼拜轮一摆去hia买票chhit-thô，in兵á 话叫作「打炮」。日时兵á票，暗时6点以后限军官票。后来我才了解，这个831属反共救国军ê政治作战部管，为着保密，每一个单位拢有一个代号，831 tō是这个单位ê号码。但是对外正式ê名称是叫作「军中乐园」。

政治作战部惊兵á「打炮」着病，规定83 1ê查某拢ài定期「卫生检查」。「若检查有性病ê一律停票，严格实施。」院长kā我吩咐。所以我虽然bē使去831买票，mā是每礼拜ài去hia一摆作检查。后来发见为着这个检查ê头路，病院ê卫生兵会kā我phô͘，相争beh作我ê助手tòe我去，检查ê时会tàng看免钱ê查某空。M̄-kú这个头路事实真复杂无简单，又koh有生死chiah大ê 责任，我tú-chiah来gōng-gōng拢m̄知影。

这日检查了成绩犹bē bái，kan-na 5个停票。这个16号ê生作少年bē bái，时常有病，大概有人缘，生理siuⁿ好ê关系？我分Pheⁿ-ni-si-lin hō͘伊，kā伊讲：「你ài停票3工。」另外一个óa来讲：「医官，我mā有病ài停票，你hō͘我Pheⁿ-ni-si-lin。」我问伊：「你几号？」「 23号lah。」对he簿á，23号拍一个kho͘ á无病。「你23号tú-chiah检查了无病，m̄免停票。」伊tu一张单á来我手里，讲：「医官，这张送你。」我看hit张单á，顶面tǹg一个印á 23号，tō是伊ê票。「医官，你拢m̄-bat来chhit-thô，che是特别票neh。来lah！Hō͘阮服务一摆lah！」16号ê teh斗讲。特别票tō是军官票，一张80分钟，普通兵á票是50分。若是兵á票，in作50分hioh 10分。军官票khah thiám，ài作80分才hioh 10分。「好lah，医官，通容一摆lah。Hō͘伊hioh一工mā好。」我看hit个23号，大概已经30外外lah，面色有影无外好，黄酸黄酸，问伊有啥病？「无lah，a̍h to人真thiám a，作bē落去…」院长吩咐有病ê才会使停票，我骂伊：「无病bē使乌白停！」

这个单位虽然号作野战病院，m̄-kú设备简单，kan-na会tàng应付普通ê外伤kap小病，khah 严重ê拢tio̍h「后送」。病房是有lah，不时tòa kah tīⁿ-tīⁿ 。一kóa是假病来tòa爽--ê，有ê真病来，好了m̄出去。这个姓蒋ê poa̍h-kiáu相拍，枪子pōng着脚，小khóa伤着，已经四礼拜a，不时thèⁿ一枝拐á，páiⁿ leh páiⁿ leh犹m̄出去。这日门诊soah，伊kā我 cha̍h leh讲：「医官，作作好事吗。」我问伊昨啥物好事，伊讲：「这个16号不能停呀！」讲一晡才知影伊ê意思，叫我bē使停831 hit个16号ê，这礼拜轮着in炮兵单位买票。「医官，你停别的吗。」我叫伊买别个ê票，伊讲：「老子别的都不要，就是要这个。」我讲16号有病，会传染。「他妈的，管他什么鸡巴病，怕什么？！吃药就行了。」Beh kā我讨Pheⁿ-ni-si-lin。我m̄ hō͘伊，伊起受气，大声嚷：「他妈的，老子等了二个礼拜，再等二个礼拜要等死了！」一定叫我bē使停。我讲he是院长ê规定，伊起pháiⁿ面，大声骂：「你那里来的臭小子，我蒋光怕你？！他妈的，老子干掉你！」拐á gia̍h起来tō kòng。佳哉hit个姓白ê卫生兵，后礼拜轮着伊kap我去检查，khah为我，赶紧kā伊拖走。

(2)

「医官，拜托一下」这日检查了，23号ê又koh 按呢讲。我无欢喜，想讲顶礼拜to已经讲bē使a，chit-má koh来lo-so，「我讲bē使停tō是bē使。」伊无意无意，身躯边摸一张纸出来。「医官，这张批敢会使拜托你读一下？」我pháiⁿ势一下，批the̍h来看，是咱台湾hia台南县路竹乡寄来ê。「恁tau tī路竹？」 我问伊。

「阿母，你顶个月寄来hit张批今á日才到位。阿妈有小khóa khah 好，医生讲，che bē断根，若无khah大去tō好。学校注册拢总350 kho͘。阿妈讲，校服chū按呢穿，m̄免koh买。你批若是chiah 久才会到，khah早寄来才会赴。阿妈吩咐你家己ài khah细字。阿芬。」

按呢我才知影，伊tī台湾有一个查某kiáⁿ，犹teh读册。伊ê ta家70外a，身体bái，听起来大概是有生啥物件。过来16号kā我讲，伊ê翁几冬前作土水，起楼á厝peh koân poa̍h落来，siak死去。Chhun一个查某kiáⁿ kap ta家，chhun ê代志我无koh问siuⁿ chē。

这个以后，伊也无koh来拜托我。每个月月经来ê时，照规定会使无作，che tō是in hioh困日。M̄-kú che也是一个问题，有ê想beh加停票，会假月经来。院长先tō有kā我教，ài注意，一定tio̍h看in ê月经带，有影来ê才会使停。不过这方面，in二个是拢照规矩来。

(3)

这暗特别冷，ji̍h-puh车ê玻璃拢冻霜。天是清清清，一大堆光iàⁿ-iàⁿ ê星，实在这个孤单ê海岛暗时看起来khah平安，比日时khah sûi chē 。「他妈的，三更半夜搞什么急诊!」 这个姓白ê ji̍h-puh ná驶ná骂。事实tī chia半暝急诊时常有，hia ê兵á暗时poa̍h-kiáu lim酒，gia̍h枪相pōng。定定mā teh叫。不过831半暝急诊犹是第一摆。我teh想，是m̄是有兵á食醋，半暝去hia tōaⁿ枪？

Hit个23号ê倒tī房间内哀哀叫，面色青sún -sún，chhìn汗一直流。16号ê kap伊仝房间，teh kā伊拭汗。讲是早起pak肚tō忧忧á痛，无hioh困koh去作，eng暗大痛起来。Kā摸，pak-肚尾ân-tòng-tòng，khap leh tō痛kah跳起来。问一下详细，taⁿ害a，这个月月经犹未来，已经慢十外工a lah。In作这行ê定定有这个问题，我讲「大概是子宫外有身。」赶紧kā伊车来病院，注大tâng射。报告院长，che咱chia野战病院无法度处理，ài马上转送，紧急开刀，a̍h无若piàng破流大血tō救bē赴a。院长讲，这个月ê补给船后礼拜才会到。我讲按呢bē赴lah，ài用直升机护送。院长请示政治作战部，讲kan-na军事人员才会使用直升机护送，831 ê m̄是军事人员。尾a电话拍几nā通，才安排明á暗一只临时来ê军舰，顺路送去金门。

隔转日，病房围一大堆兵á看闹热。「他妈的，几号？」主要是beh 知影几号ê破病停票。有一个老炊事兵，mā 是炮兵单位ê，规日坐tī病房m̄走，kā伊jôe手拭汗，koh煮食物来kā伊饲。院长赶mā m̄走。听讲伊m̄ bat买别号ê票，一定kan-na 23号，有时作一下买2张，坐tòa 831房间内面kap伊讲话，hō͘伊hioh困…，有人讲伊精神无啥正常…。我teh想，这个老兵敢是kā 23号看作伊m̄ bat有过ê亲人？伊精神上ê某？伊ê查某kiáⁿ？伊ê老母？…但是tī chia这个失落放舍ê海岛，tó一款才是正常ê人？Hia ê二礼拜买一张票去chhit-thô ê兵á，抑是这个tī家己幻想ê头壳内制造一点á温情kap亲情ê老兵leh ？

M̄-kú hit暗23号开始流血，佳哉无拚真大。我kā伊讲，liâm-mih船来tō会kā伊送去金门，tī hia赶紧手术。填后送资料表ê时，才想着犹m̄知影伊ê名。「你叫作啥？」「我23号。」伊按呢应，若像伊mā bē记家己ê名，因为tī chia人拢叫伊23号。我koh问：「你姓啥?」伊才应：「我林花市，人叫我花a。」小khóa kā我笑一下。我心内烦恼，m̄知拚会到金门bē?

这时16号下班赶到位，kōaⁿ一脚细个箱á，kā花--a讲：「你ê衫拢tī chia。」koh the̍h一个皮包á hō͘伊。「这个你收hō͘好。」我知影，hin内面tō是伊来chia 4个月thàn ê钱。我kā皮包á挟tòa伊ê身躯边，koh注一枝止痛ê mò-hui，看伊上车，细声kā讲：「你金门手术好势，紧转去台湾。」伊概成知影我ê意思，叫伊m̄通koh作a，摇头讲：「契约犹未到期。」目睭niauh-niauh看我，看16号ê，一时á细声问：「医官，你啥物名？」

这个月ê补给船有照时间到。大家消息拢是灵通，有新ê 831 ê查某来。Ta̍k个月拢有新ê来，mā有旧ê契约到期转去。In拢teh等新ê来beh试。这月日来3个，ài先检查才卖票，che mā是我ê头路。 这个新ê 23号差不多20外岁，生作khah粗，爱讲话，薰食真重，大腿hia刺一只细只ê红尾ia̍h-á，讲按呢查甫人khah会刺激。我问伊tó位来ê，伊讲是ùi屏东监狱来ê。我chhoah一tiô，问伊按怎thài会出外海来到这个所在？伊讲伊mā m̄知影chiah hn̄g，koh讲若是tī监狱ài koh关三冬，来chia作2冬tō会使转去，koh有钱通好thàn，he监狱ê人按呢kā伊讲ê。我想beh问伊，啥物代志hō͘人关？伊家己先讲：「He钱m̄是我抢ê，刀á mā m̄是我ê。」

我想起以前hit个23号，真后悔到taⁿ m̄知影伊是按怎来东引ê。敢oan-na是hō͘人关，按监狱来ê?伊敢会抢钱thâi人？抑是本来tō是酒家ê查某，年岁siuⁿ大，choán来chia bóng koh thàn?或者拢m̄是，kan-na是in 翁作土水，起楼á厝peh koân poah死去，普通ê thàn食人niā-niā?

「医官，好a ho͘ⁿh？」新来--ê问，「通过a，通过a。」我按呢应。伸手入去lak袋á内，摸着 hit张23号送我ê军官票」，soah无张持讲：「恁后摆若siuⁿ thiám作bē落去，才kā我讲。」23号ê kā内裤giú起来，hit只细只ê红尾ia̍h-á tú好掩leh无看去。

已经2礼拜--a，院长犹恬恬。我知影伊ê人，以前后送有问题，拢m̄爱koh讲。明á chài我才来kā伊问看māi。

尾注：真chē tī台湾ê中国人为着日本兵ê慰安妇道德上大愤慨。Hō͘我想起我作兵ê时，军中有真chē这款失落ê「乐园」。这篇是我ê报告。