《陈雷文选》

 | | | 转寄

高山玲子

作者 陈雷 2006.08.20

高山玲子过身ê时，身躯消pó͘，kiu kah chhun 142公分，体重36公斤。棺材店ê头家看看leh，kā伊ê后生讲：「咱大人ê无作chiah细ê。用gín-á ê tō会使。」In后生因为社会上外观ê关系，pháiⁿ势用gín-á ê，mā是买大幅ê棺材来kā伊安葬。

市内ê人讲伊是家己iau死ê，这点也是有一kóa事实。不过自头到尾，伊人精精，koh后生三个查某kiáⁿ一个，大家拢真有孝，是按怎会家己iau kah死，ah he tō chiâⁿ pháiⁿ讲lah。

未嫁进前，作查某gín-á ê时，姓纪名玲霞。嫁了tòe翁去日本。In翁姓高，tī日本读药剂师，所以伊tō改一个日本姓，叫作高山，koh号一个日本查某ê名，玲子，叫作高山玲子。转来台湾了后，tī台中市á内开一间西药房。玲子kā翁讲：「这间店是我ê嫁妆私khia钱买ê，号我ê名。」所以叫作玲子药房。这个药房tī咱夜市á边，人客出出入入，生理tō也ka-iah。In翁名作平和，人叫伊平和仙。作人忠厚，无性无地，规日顾店卖药，tú-tú无半句话讲。Taⁿ这个玲子号作店是伊ê，规日坐tī店口，早到暗tō是无êng hit枝嘴，khin-khin khiang-khiang，ki-ki kia̍k-kia̍k，无一时á停，tú好一日一粪车ê êng话，按呢车出车入。市á ê人笑讲，玲子结婚前有kap平和仙签约：「Khang-khòe你去作，话我来讲。」算算leh，成实有影，he话tō是hō͘ in某讲了了a。

这个平和仙普通时顾店无êng，也tio̍h兼顾三顿。有人笑讲，玲子话siuⁿ chē讲bē了，ná有时间通煮饭？M̄-kú che代志也m̄是hiah单纯，店口排衫ê明珠上盖知影，定定问玲子：「头家娘，你实在好命。嫁这个翁也会内也会外，生理hōaⁿ好好，三顿chhoân便便。」玲子tō应：「Ai-ioh，m̄是lah，tú着无法度lah。」明珠in老母鸡a坐tī边a tō问：「是按怎tú着无法度？」 「Ai-ioh，tō是咱han-ban-lah，bē晓煮lah。」「A̍h thài会bē晓lah？」「Bē晓lah！咱作查某gín-á ê时m̄ bat摸过lah。」「A̍h thài会hiah好命，作查某gín-á拢m̄ bat摸过？」「M̄-bat lah！厝内拢查某kán tòe tiâu-tiâu款便便，也无通hō͘咱摸一下。无学thài会晓lah？Tō是按呢teh害！」讲了面-á笑gī -gī，因为伊知影，这时鸡a tō会大声讲：「Ai-ioh！恁he大好额人，厝内才会有查某kán ，ta̍k项款便便。」按呢过路人拢知影，in tau khah早是大好额人，厝内拢有查某kán teh服侍。这个明珠了解头家娘ê心理，beh phô͘伊，hō͘伊欢喜，有时无时tō koh kā问这个煮饭ê问题，in老母鸡a tō假无意骂伊：「A̍h你soah m̄知，人头家娘chēng细汉厝内拢查某kán 款便便，也无通hō͘伊摸一下，beh thài会晓lah？」这时玲子tō真真正正ê欢喜，畅(thiòng)kah若牛，爽kah若猪，假无意pháiⁿ势：「成害lah。实在是咱han-ban lah。」市á ê生理人chia ê话听chē了会烦，kha-chiah后骂：「骗siáu ê!khah 早无作过，chit-má to bē摸得？少缺（chió-khoeh）人厝内有查某kán ê?」

关于查某kán 这个问题，福嫂--a讲了上公道。伊讲查某kán 是有，khah早in 公a少年ê时有一个，尾a hō͘ in公a收起来作细ê，tō是玲子ê细汉阿妈。这个福嫂a tī菜市á内卖肉丸，tō是玲子ê阿姊。「M̄ 是han-ban，是贫惰兼风神lah。」伊是按呢讲ê。

玲子嫁平和仙40年，生三个后生一个查某kiáⁿ拢tī市内teh作生理。虽然讲是kiáⁿ 4个，事实孤孤hit个大汉ê辉a伊上合意，chēng细汉tō是身躯边ê金kiáⁿ钻石后生，chhun ê三个拢是顺续kah来ê，无准算。He昌a、明a kap娟a不管对伊外好，m̄ bat讲一句o-ló ê话，也m̄ bat说(soeh)一声欢喜。A̍h若是in辉a，有时无时tō是「阮辉a上有孝。」「阮辉a上会thàn钱。」「阮辉a 上gâu读册。」阮辉a按呢，阮辉a按呢（读àn-nè）…。菜市á ê人听了ià-siān，kā伊tu̍h:「A̍h恁昌a、明a kap娟a m̄是拢有读大学？」按呢伊才恬去。因为in辉a大学考二摆无tiâu，kan-na专科毕业niā-niā。

Taⁿ这年平和仙a 63岁，无病来过身去。有人讲，tō是暝日êng话听了siuⁿ chē，话屎积leh，人bē堪得，烦死ê lah。Hit年玲子69岁，比翁大6岁，tō是咱所讲ê某大姊。平和仙过身了，玲子家己一个，无人煮hō͘伊食，贫惰koh惊人笑，规气市á买便ê。人问：「恁平和仙去a，taⁿ beh啥人煮hō͘ 你食？」玲子摇头应：「成害lah，拢是咱家己han-ban lah。」

Hit 4个kiáⁿ看老母三顿市á买，m̄成食，kā伊讲：「阿母，你来kap阮tòa，mā khah照起工食。」玲子kā in讲：「恁无êng，我来kap恁大兄tòa。」He大汉新妇摇a知影ta家厉害，嘴若开ná机关枪，枪子拍bē lī，真是小心服侍。早时去市á进前tō先问：「阿母爱食啥？」玲子讲：「Ai-ioh，chhìn-chhái lah，买啥tō食啥。」He摇a惊ta家讲话，买鸡买鸭，买鱼买肉，煮煮一桌顶。玲子tō讲：「Ai-ioh，摇a成gâu，煮kah ta̍k项有leh。」面oa̍t过kā in辉a讲：「医生讲，咱有岁ê油臊khah m̄通食。」A̍h tō鸡鸭鱼肉拢m̄ ngeh，he饭白白pe。过来摇a去市á买pû买瓜，买kiô买笋，煮煮一桌顶，玲煮讲：「Ai-ioh，摇a实在gâu，煮kah ta̍k项有。」Oa̍t头kā辉a讲：「医生讲，咱有岁ê kan-na食菜会无肌肤。」A̍h tō kiô-á、笋-á、pû-á、瓜-á拢m̄ ngeh、饭白白pe。

Taⁿ这个辉a kap in老父平和仙仝款，作人忠厚，规日无性无地，有嘴无话。坐tòa hia顾在老母一枝屎-hak-á嘴，hô͘-神lā屎poe，按呢使弄，恬恬无出半声，也bē晓应伊一句。He摇a一礼拜jím leh，二礼拜lún leh，三礼拜tō tú bē-tiâu，掠in翁来siak性地：「阿母beh食ê，你去煮！」 所以辉a kap in老父仝款，顾店卖o͘-to̍h-bái无êng，另外tio̍h koh煮三顿hō͘老母食。He查甫人m̄ bat落灶脚，bē晓煮。肉煮来内面红红，pû煮来外口tēng-tēng，煮m̄成食。玲子知影是in辉a煮ê，o-ló kah无尾溜，欢喜kah chhoah嘴须。出去四界kā人tâu:「Ai-ioh，阮辉a孳命。查甫人也beh外，也beh内，顾店无êng tio̍h koh煮三顿。A̍h hit个查某 ê，规日êng-êng顾讲话，也m̄甘斗一个脚手。」厝边隔壁teh讲：「你tō是按呢食命。未嫁查某kán 服侍，嫁了翁婿后生款便便。」玲子讲：「Ai-ioh，成害lah，拢是咱han-ban学bē会lah。」

玲子70岁hit日，摇a chhōa伊去百货公司买súi衫，poa̍h一倒，拍折一枝大腿骨。医生讲ài手术，玲子讲：「医生爱thàn钱，手术才有钱通thàn。」惊医生thàn钱，m̄ hō͘人开刀，甘愿规日倒leh，食放拢tī hia。总是伊人虽然bē tín动，hit枝嘴原在chi-chi chiu̍h-chiu̍h kia̍k bē停，早暗tō是tī hia喝烧喝冷，嫌东嫌西。

讲也是真无tú好，hit日辉a载摇a骑o͘-to͘h-bái hō͘ tho͘-la-khuh cheng着。He摇a人大kho͘，身躯全油，poa̍h一下lù破皮，人拢无按怎。He辉a sán-thiu，poa̍h一下内伤外伤，大骨细骨折几lōa枝，入tī病院bē-tàng出来。摇a kā玲子讲：「阿母，你taⁿ小忍耐一下，先食我煮ê，等辉a出院转来，才koh煮hō͘你食。」玲子讲：「Ai-ioh，无要紧lah。啥人煮mā拢仝款。」Kha-chiah后骂：「猪m̄ chông，chông着狗！」He摇a煮鱼煮肉来服侍，玲子讲：「Ai-ioh，chiah gâu lah，煮chiah chē。」Ngeh二下tō m̄食。等无人看，piàⁿ-piàⁿ hō͘厝里hit只狗食。

摇a看玲子m̄食，人一直sán去，狗一直肥来，心内着急，叫昌a、明a kap娟a来姑成。昌a、明a kap娟a来，ai-ioh-ôe，he老母若一个破车lián消风去，sán kah bē认得。Kā老母讲：「阿母，阿嫂煮ê你若食bē合，阮煮来hō͘你食。」玲子讲：「Ai-ioh，thài会lah。人煮啥咱tō食啥。」嘴按呢讲，mā是m̄食。按呢tú好前后拖三、四礼拜，人老bē堪得，soah来中风断脑筋。车去病院，佳哉，断细条ê，人iáu精精，kan-na hit枝嘴歪一旁，bē吞bē lim，讲话漏风。可怜he话一世人ki-kia̍k叫讲bē soah，到chia来，iⁿ-iⁿ o͘ⁿ-o͘ⁿ，soah无人听有。

按呢tī病院二礼拜，吊大tâng射顾水分、注滋养。Hit日辉a出院来kā看、惊一 tiô，beh thài会认得。He老母liap kah若sīⁿ好ê菜脯，kā扶起来坐，khah轻he pha̍k ta ê菜瓜chhè。玲子看金kiáⁿ辉a转来，目睭仁 khok-khok liàn，嘴唇皮tiuh-tiuh chhoah，beh kā辉a tâu…，tī hia liòng-chùn 5分钟，话讲bē出来。雄雄目睭仁吊koân起lih，嘴角phū一个风，人soah m̄知去。脑筋又koh断去，这回断大条ê，tō按呢来过身去。

所以高山玲子一世人嫁一个翁婿生四个kiáⁿ，一日讲一粪车ê êng话，m̄ bat落灶脚煮过一顿饭。Che代志无讲你m̄知，讲来你也m̄信。Tō是按呢，伊过身ê时，身躯pó͘-pó͘，kiu kah chhun 142公分，体重36公斤。棺材店ê头家kā in辉a讲：「咱大人ê无作chiah细--ê，用gín-á ê tō会使。」