《陈雷文选》

 | | | 转寄

心战

作者 陈雷 2006.08.06

(I)

Tī hit年，che算是一件稀罕困难ê病例。所以手术成功了后，电视、新闻报真chē，o-ló伊是台湾上gâu ê心脏外科专家，mā是国际一流ê权威。

这个病人tō是听着洪教授ê名声专工按印尼来ê。洪教授详细检查了，kā伊讲：「陈先生，你年岁chiah大a，又koh经过三摆心脏病发作，这粒心已经pháiⁿ一半，无够力来负担你ê身体。所以你不时行路会喘，无行mā喘。」老人问教授，有啥物办法通好医。教授讲：「你这个状况kan-na会lú来愈bái，bē lú来lú好。除了换心以外，无啥物办法。」老人讲：「若是按呢，我无躇踌，你马上kā我换一粒。」教授摇头：「陈先生，che m̄是换猪心，随时beh tō有。你ài等候。有人死去，愿意kā伊ê心脏捐出来，才有通换。」老人问：「Ài等外久？」教授讲：「无定着。Chit-má社会上无人爱捐心，有时ài等半年一年，mā无一定tō有。」老人无欢喜讲：「教授，我今年72岁a，tī印尼财产事业一大堆，我bē等得！你赶紧想办法kā我chhōe一粒心，费用外chē完全m̄免考虑，钱m̄是问题。」教授无欢喜讲：「陈先生，che m̄是钱ê问题，是有心无心ê问题。我chit-má kā你登记tī紧急候列ê名单，若有，马上kā你通知。」

一月后，陈先生koh来看洪教授。教授检查了讲：「状况有khah bái去。M̄-kú心脏犹未有。」老人讲：「无要紧，我家己有带来。」教授奇怪问：「你有带啥来？」老人叫伊ê后生入来。He后生穿西装、梳金头，tu一张名片hō͘教授，讲：「我是陈水森。我专工按印尼替阮老父带一粒心来。」教授无了解伊ê意思，问：「你怎样带心来？」He后生chhōa一个查甫gín-á 入来。看起来17、8岁，乌乌细汉细汉，目睭gōng神gōng神。后生kā伊讲印尼话，伊tō行óa来，嘴内iⁿ iⁿ ū ū，bē输5岁gín-á teh讲话。后生kā教授讲：「伊虽然头壳gōng gōng，m̄-kú脚手好势，身体勇健，我ta̍k日拢用滋养品饲伊，心脏一定是勇ê。」教授惊一tiô，指hit个gín-á ：「Che…che… 」一直摇头。后生讲：「教授，你m̄免烦恼。伊是番á ，生作gōng gōng，父母m̄ tîⁿ 。我3万盾kā买来。」按lak袋á jîm一张纸出来，the̍h hō͘教授，讲：「证件拢tī chia。」教授kā看，纸顶面有汉字写：「同意书。我kiáⁿ阿母沙.猪拉东卖hō͘陈水森。现金3万盾全数付清。木巴.猪拉东，年月日。」后生kā gín-á手骨掠leh，讲：「Che是卖断ê，chit-má这项代志完全我来决定，你一切m̄免挂虑。随时beh换拢会使得。」

这时洪教授才完全明白伊ê意思，tō是in买这个gín-á beh来换心。想bē到世间会有这款ê代志！着惊koh受气，目睭皮tiuh-tiuh-chhoah，khiā起来，对二人ê面hoah ：「Che换心是天赐ê，m̄是钱买ê!恁等候，有随时kā恁通知。」

也是tú á好koh佳á 哉。三日后发生一chân车祸，有人hō͘车tōng死，心脏捐出来。洪教授接着通知，马上安排，kā陈先生紧急手术。开刀kā伊ê胸坎破开，pín-á 骨剪断，kā hit粒pháiⁿ去ê心ka掉，thīⁿ一粒新ê勇ê hō͘伊。He换好ê心脏，一粒圆圆若猪心hiah大粒，又koh phih-pho̍k phih-pho̍k tī老人ê胸坎窟内面活活跳。实在医术高明，一礼拜后，陈先生tō会家己起床，peh起来行，bē喘bē siān，bē输作一下少年几lōa 十岁。成实ê，成实是换一粒心ê奇迹，khioh一条性命，作一个新人仝款。

(Ṳ)

3个月后，又koh有一个老人来chhōe教授。问起来才知影是陈水森ê朋友，专工按印尼来。教授问伊陈老先生ê近况，伊讲手术了后，一切顺是，状况真好，事业拍拚，bē输少年人ê khùi力。Tō是陈先生特别介绍伊来。

教授一看，这个老人嘴唇乌绿，坐tī轮椅喘。详细检查了后讲：「你ê心脏真是衰弱无力。」老人问：「有啥物办法好医？」教授讲：「这个心已经pháiⁿ去a，ài换心。」老人问：「Kap陈老先生仝款？」教授tìm 头。老人讲：「若是按呢，m̄免踌躇，你马上kā我换一粒。」教授摇头：「Chit-má无心，你ài等候。有人死，心脏捐出来，才会thang换。我chit-má kā你khǹg tiàm紧急候列ê名单，若有，随时kā你通知…」老人讲：「Che你完全m̄免考虑。我是专工拢有准备好才来ê。」教授听m̄知伊ê意思，按怎拢有准备好？老人叫后生chhōa一个gín-á入来，17、8岁ê脚tau、乌乌细汉细汉、gōng-gōng khiā tī hia。教授才雄雄会记得，3个月前陈先生mā是按印尼chhōa一个这款ê gín-á beh来换心，chhoah一大tiô，hoah 讲：「Che…che bē使--得！Bē使得！换心是天赏赐ê，m̄是钱买ê！」

那知后生应伊讲：「按怎bē使--得？陈先生in 会使得，按怎阮tō bē使得？」教授讲：「陈先生伊真佳哉，tú好有人车祸tōng死，疼心救人，心脏捐出来…」后生面对面kā教授一直看，亲像tī这个少年教授ê面顶beh chhōe一个过去掩khàm ê大秘密，看一晡才讲：「你敢m̄知影？」教授问：「M̄知影啥？ 」「你成实拢m̄知影？」教授摇头，后生才讲：「Hit个车祸tōng死ê，疼心救人ê，心脏捐出来ê，hō͘你出名ê，tō是伊按印尼买来ê番á ！」

教授坐tòa hia若é-káu ê，一个嘴开hāⁿ- hāⁿ，话soah讲bē出来。一目看hit个老人坐tī轮椅顶喘，面一直乌绿去，m̄知beh如何处理。伊liâu-liâu-á khiā起来，一步一步行离开in三个人，头壳gōng chhia-chhia，bē输槌á huh着，ná行ná念：「我m̄知影…，我拢m̄知影…」行转来办公室，tǹg tòa phòng椅里，神神一直想，伊这半世人认真拍拚得来ê成就，伊对医学救人百分之百ê信心，雄雄像大地动ê koân楼作一崩崩倒倒去…。因为tō是伊，亲手kā人thâi ê gín-á 心脏换hō͘ hit个老人，伊tō是hit个偷the̍h心ê帮手。而且敢m̄ tō是，因为伊奇妙ê医学技术，hō͘ hit个心pháiⁿ去ê老人变作自私野蛮ê谋杀者？