《陈雷文选》

 | | | 转寄

琴声Siu-be-to͘h (Schubert)

作者 陈雷 2006.07.09

(1)

若是少年老师瑞英，音乐是人生上大ê安慰kap欢喜，生命ê泉水。Che是伊ê天份，生时kah来ê，或者mā会使讲是伊ê束缚。细汉ê时，tī学校听老师弹琴，看kah无人教家己会晓弹。老师疼惜伊ê天份，免费kā教，mā hō͘伊上台表演，去kā伊ê老母讲，这个gín-á大汉ài作演奏家。但是瑞英in tau食头路人ê家庭，gín-á 6个，那有法度hō͘伊一个查某kiáⁿ专工弹琴学音乐？所以去读咱高雄师范，毕业了作音乐老师。虽然是无彩一粒真珠落（lak）tī lok-kô͘-a-moâi里，拍损了天份，m̄-kú kap伊ê性情犹算有合lah。

毕业了无外久嫁去市内一个生理人ê家庭，in翁林强tō是林茂建筑公司ê大kiáⁿ。林茂本人khah早少年ê时作土水，双手拍拚，舞kah家己也有一间公司，bāu工程起贩厝。林强作兵了无出路，叫来老父ê公司thōa生理。

这个林强生作大大汉，讲来m̄是啥物pháiⁿ kiáⁿ。不过tī生理场thōa久，薰酒查某ta̍k项会，脾气有时若牛，有时若狗，粗工人ê底tì，m̄是斯文性ê人品。时常酒家lim到暗暗，半暝转来，酒醉tō beh冤家拍人。

瑞英嫁了隔转年生一个查某kiáⁿ，名叫琴声。这个gín-á规日乖乖家己sńg，罕得吵叫。M̄-kú饲到三岁外，犹m̄ bat听伊叫一声阿母、阿pâ，kap伊讲话mā无反应，若像是臭耳兼é-káu ê。

Chhōa去病院检查，耳á好好，听力正常，tō是kan-na m̄讲话，m̄应话。尾a去看小儿科ê专家，诊断是Au-thih症（Autism），也有叫作自闭症。讲是一种先天性怪奇ê症头，耳目嘴好好，kan-na头脑无仝。He gín-á头壳内ê世界，bē输hō͘暗色ê玻璃封起来，关tī hin内面，kap外口bē通。所以有听若无听，mā bē kap人讲话，无啥办法通好医。

老母听一下心肝强beh落无去。无彩一个chiah古锥ê súi查某kiáⁿ，现现áⁿ tī烧烧ê身躯边，kā惜kā疼，亲像mo͘h一tè冷ki-ki ê冰角，bē笑bē khàu，无反无应，实在比臭耳é-káu ê khah害。He作老母ê心情，空空bē输白作--ê。

但是伊无放弃，每日弹琴唱歌hō͘伊听。讲也是奇怪，这个gín-á见若听着音乐，chhit-thô物放leh，坐tī hia定定无tín动，像音乐家teh欣赏。原来琴声kap老母仝款，有音乐ê天份，生时kah来ê，mā会使讲是伊一生ê束缚lah？

伊教琴声弹琴，随教随会，进步真紧。M̄知经过外久，mā m̄知tiâng时开始，无张持ê中间得着一个真龟怪ê感觉，bē输琴声ê音乐有时teh kap伊讲话。Tī hit个来去ê一目nih，这个暗色玻璃封起来ê世界，亲像雄雄hō͘日头光照着，伊会tàng影着hin内面。

(2)

这双红鞋是啥人the̍h来ê，伊m̄知影。Hit早起出门ê时，齐齐排tī门脚口。想讲大概是啥人bē记得ê，问对面kap隔壁间，拢m̄知影。Kōaⁿ去楼脚顾大门ê桌顶khǹg，hō͘人去认。那知隔转日透早，he鞋又koh倒转来，排tī门口teh等伊。连续几偌工，beh tàn tàn bē掉。斟酌kā看，规双新新，koh是chit-má上时行ê太空流线型运动鞋。想讲无彩，kōaⁿ入来hō͘琴声穿看māi，koh合合合，khah-thiám是专工买来ê。这双鞋穿起来若活ê，踏一步tō chiu̍h一声，后脚跟一pha电火tō sih一下。琴声日时穿teh弹琴，暗时穿leh困，m̄ hō͘人thǹg起来。

M̄知啥物缘故这个以后，琴声ê音乐lú-khah亲近，不时teh kap伊讲话。He音乐像日头光照着玻璃封起来ê世界，hō͘伊看着hit内面，m̄是空空无半项，是一个有栽真chē款感情ê花欉ê温室，欢喜、郁卒、期待、失望…，kap别个gín-á仝款仝款。但是这双鞋á真正ê秘密，二礼拜后伊才知影。

这条歌伊m̄ bat听琴声弹过，mā无想着无人教伊家己会晓弹。He Mo͘h-Cha-toh（Mozart）ê音乐是天使ê欢喜，挽大红ê玫瑰teh chhèng芳，会hō͘人醉。琴声目睭kheh-kheh，若像人无tī hia，m̄是伊teh弹琴，是音乐家己teh弹。

He鞋á开始发光，tòe音乐sih一下sih一下。伊叫是家己目睭têng-tâⁿ看m̄-tio̍h。Óa去kā摸，规双烧hut-hut。惊一tiô，赶紧beh kā thǹg起来，soah bán ân-ân，pak bē落来。鞋á liap-liap sih，lú来lú红，像鸡kui-á pûn风一直变大双去。 雄雄音乐停去，琴声流汗珠ê面顶有一chōa微微á笑，bē输风尾吹过一khut浅浅ê水面，一时á tō无去。伊m̄知影che是事实无？因为chēng出世犹m̄ bat看琴声笑。琴声khiā起来，hit领海色水流ê长裙kā鞋á khàm着，鞋á ê光tō hoa去。Liâu-liâu-á，像鸡kui-á消风kiu倒转去，kap以前平大双。

按呢伊才知影，这双鞋是一个活活ê奇迹。琴声若欢喜，伊tō欢喜pûn风变大双。琴声若郁卒无欢喜，伊tō会倒kiu变足细去。

(3) M̄-kú这个秘密伊无kā翁讲，因为琴声有Au-thih症以后，in翁受气，bē-tàng接受。拢赖讲是in某tài--来-ê，生一个这款怪物！以前爱lim酒行酒家，chit-má koh khah厉害。半暝若是酒醉转来，a̍h tō害lah，入门tō pháiⁿ嘴操干kiāu，chhōe人冤家。In某恬恬走去bih，m̄ chhap伊也bē使，拖出来拍，大醉大拍，小醉小拍。不时拍kah乌青结血。拍了无够khùi，叫伊唱歌。

「唱！你唱！」双手肩胛头掠leh，大力kā hiap。
「干！叫你唱，你m̄唱！」嘴phóe sai落去。
「火车…火车ki-ki叫，…10点5分到板桥…」
「干！唱khah大声leh！」
「…板桥查某súi kap笑，…转来去卖某来hō͘伊招，…」

Kā in某giú来，大力lam2leh，tu嘴beh kā chim……。He酒味kap tú-chiah吐ê臭味hō͘伊挡bē tiâu，头oa̍t走m̄ hō͘伊chim。

Phia̍k一下一声，嘴phóe koh kā pa落。「干！恁父…」大力kā chhia，siak tòa土脚。衫kap裙thiah-thiah破，规身躯光光，一kho͘人若大只猪哥teh tī顶koân，ngē kā伊强，kā伊创治，…像teh使牛使马。

「哈！哈！…板桥查某……」o̍͘h一下，又koh吐吐出来。

(4)

Tī Siu-beh-tō͘h ê音乐ê内面，伊chhōe着临时ê安慰，像「冬天ê旅行」按呢beh行离开这个家庭，chhōa琴声去一个无虐待ê收容所，hō͘人拍会使m̄免唱歌ê所在…。无注意琴声坐tī hia家己teh唱，「…火车…火车ki-ki叫…」。雄雄pōng一下一声，phiāng tī土脚。Kā抱起来，已经m̄知人去ah，hit双鞋lia̍p-lia̍p-sih，kap脚kiu kah若红婴á ê hiah细双去！

「严重是有严重lah。」医生kā伊说明。
「A̍h是按怎lah？Thái会雄雄按呢？！」
「白血病。」
医生tàm头。「超急性ê，…真紧…」

一礼拜后，琴声倒tī chhū白床巾ê病床过身去。Hit位同情心ê少年医生kā老母讲，大概是咱高雄水kap空气毒素污染太厉害ê关系。Chit-má ta̍k年拢有真chē gín-á tio̍h这个病。伊kā琴声换一su天色phòng-kéng ê súi衫，海色水流ê长裙，头毛loa̍h二个mi-尾á ，用红ê li-bóng缚起来，换一双奶色白皮鞋。Hit双红鞋kōaⁿ转来厝，chhāi tī phiⁿ-a-no͘h顶面。Eng暗beh困ê时，kōaⁿ去眠床头kap伊作伴。

半暝翁转来，又koh规身躯ê酒味。代先kā伊拍，才koh叫伊唱歌。

「唱！你唱！」按呢kā伊hiap。
「…火车…火车ki-ki叫，…10点5分…」伊实在唱bē出来。
「干！koh唱！10点5分按怎？！」
「…10点5分…10点5分…」伊实在唱bē出来，koh hō͘人拍。衫kap裙thiah-thiah破，一只猪哥ji̍h tī顶面，ngē kā伊强。

雄雄lìn-lòng叫ê声，林强使牛使马当teh创治，无看着眠床头一双红鞋teh tín动，lú chùn lú大力，才停起来看。He鞋a lia̍p-lia̍p-sih teh发光，想讲taⁿ惨ah，是m̄是家己酒lim过头，目睭lim pháiⁿ去a？嘴内念：「M̄通koh lim a。」He鞋á pìn-pòng跳teh siak-tiō，chhoah一tiô，规个人拢nńg去。鞋á sa来手里，soah ki-ki叫，像gín-á teh哀。气一下，大力siàng出去，khian按房间外去。

隔转日天未光，瑞英liam脚peh起床，房间外chhōe着hit二脚鞋，khioh好势排tī phiⁿ-a-no͘h顶头。「无要紧，m̄免惊。」按呢细声kā鞋á讲，也亲像teh kā家己讲。耳空内远远有Siu-be-to͘h ê琴声kap歌声，he温暖期待ê音乐伸手kā伊欢迎，beh kā伊chhōa去hit个冬天孤单ê旅途，去到一个无暴力kôaⁿ冷ê树林内hioh 困，……。「紧慢，紧慢伊会变。」酒tō会停起来，伊按呢想，tō m̄免koh唱歌。He鞋á摇一下，后脚跟hia火sih 一sih，若像teh beh hoa去。Lú来lú白siak，一直kiu细双，tú好tī伊目屎liàn--落-来hit目nih ê中间，kiu kah规个拢总变无去。

「…10点5分…10点5分…」He Siu-be-to͘h ê音乐无去，kan-na有火车lìn-lóng叫ê声…