《陈雷文选》

 | | | 转寄

食老按呢想

作者 陈雷 2006.06.25

(1)

今á日in大舅，hit个树头a，又koh来ah。一chōa路hiah-nih hn̄g按屏东来，讲好听是来看我，事实是beh来看土地，伊kap in拢斗空好势ah，chit-má是仝党ê。

人讲食老才来老pháiⁿ命，上盖算bē和，实在有影，che我chit-má家己kā经验，ta̍k项拢知影ah。少年hit时，一日拼一担汗，桃a讲，骨头thèⁿ khah直leh，koh艰苦几冬，gín-á大汉，咱tō出头天。Hit时，大家拢是这款想法。Taⁿ chit-má，你kā看，胜a kap大头á生理作hiah大，钱thàn hiah chē，辉a食头路，无hiah好空是有影，mā是会过得。珠a嫁了上好，翁á某拢teh教册教补习，若伊讲ê:「外好空leh。」In拢定定转来，讲是来看我，事实是来看钱相土地！珠a上盖厉害，ta̍k日来。

珠a咱上怨叹，细汉时外乖leh，想bē到，嫁了随变去。查某kiáⁿ嫁出去别人ê，bē仝心lah，这点桃a iáu gōng-gōng m̄知。Hit时，嫁妆咱拢有照起工，手只大细脚七八脚，in老母讲：「查某kiáⁿ 一个niā-niā，beh嫁tō嫁hō͘好看!」连hit kōaⁿ真珠mā pak hō͘伊。「嫁真珠，kah真珠。」欢喜tō好。He真珠披链mā是桃a hit当时入门kah来ê，che无讲你m̄知。

辉a细汉上kāu头路，不时流hīⁿ-ang-á膏，讲是中耳炎，慢性ê。咱一日thàn 30 kho͘，in老母chhōa伊去医生馆开40，无法度，嘴齿筋咬leh，借钱看医生，尾a mā hō͘伊读到大学毕业。In大舅á tō是来看土地hit个树头a，讲辉a读m̄ tio̍h科，出来食一个死头路á，无in阿兄hiah好，我看也是有影。

珠a hit枝嘴上tiⁿ，入门tō一句「阿tia」，二句「阿tia」，大大声叫hō͘厝边听。「阿tia，che义明ê鸡卵糕你上爱，专工买转来hō͘你食。」。我kā看，珠a胭脂lú来抹lú厚（kāu)，he a̍p-á写是义明饼店无m̄-tio̍h，鸡卵糕m̄是义明ê，che咱食chiah chē冬ah，那会食m̄知？我拢tèⁿ tiām-tiām无kā应，无hit个心假有心，咱心肝内知影tō好。

Ta̍k项话to讲会出嘴，「阿tia，你有khah好无？」，「阿tia，你有作运动无？」伊tō是明知影咱脚手无好势，刁持按呢问，我拢m̄爱kā应。入门tō kap in老母bih灶脚，鸟鼠á chhi-bu-chhi-chhah，讲bē soah，惊我听着。Ná着bih，khah bih我mā有听着，一句一句tī hīⁿ空边清清楚楚，见讲tō是钱：「阿tia hia ê钱chhōe有无？」

佳哉he钱咱分几lōa位khǹg，我m̄是gōng人。He真龟怪，厝内见若khǹg现金，隔转工tō无去，ah m̄ tō是欠二万，欠三万，成厉害neh，连藏tī便所mā抄抄去。问in，无人beh认，「你家己khǹg kah bē记得！」颠倒赖我，当我作gōng人，我soah m̄知。

桃a钱钱叫，不时伸一枝手长长，叫我：「现金the̍h出来！你hia ê现金交hō͘ in去khǹg银行，khah bē pháng去。」夭寿，你敢想会到，伊kap in仝一党，chit-má连家己ê某to hō͘你bē信用得。

结局我kā想，我食老ah，in爱我ê钱，无爱我ê人，桃a不时kā我乱讲：「你mài chhap，放hō͘ in gín-á 去发落tō好。」我soah m̄知，ta̍k项mài chhap，钱放hō͘ in上盖好，in自起头tō是这个拍算。

所以我kā看，咱食老别物无要紧，tō是钱上要紧。你想，胜a、大头á按台北来，辉a无êng mā按高雄来，珠a无代无志ta̍k日来，是来chhòng啥?……Taⁿ chit-má连土地mā beh卖，一人一句，话套好好，讲khǹg土地算bē和。大头á不时teh jiok钱，我看是有teh poa̍h股票，m̄敢讲。Che土地咱绝对无卖，印á我m̄ kā tǹg，看in beh按怎？

害loh，chôaⁿ按呢m̄放我soah，叫人来厝里监视，讲有人爱钱爱kah这款，ah你敢bat看过?! Hit个查甫人，裤带hâ大板ê，一看tō知，m̄是好人，假无意坐hia看报纸，挂乌目镜是beh按怎看？我刁工kā伊chîn，伊tō去便所bih，问桃a：「He是啥人？」桃a tèⁿ无看，「那有啥人？」明明坐tī phòng椅teh pok薰，桃a讲无人，骂我：「你m̄通乌白想！」我to m̄是青瞑ê讲，当我作老蕃颠无路用。

Chit-má soah lú来lú雄，暗时入来我ê房间，佳哉咱轻眠，半瞑听着声醒起来，bih tī thang-suh内面teh讲话，用无线电teh联络。桃a tēⁿ无听着，一直困，摇醒kā伊问，应讲：「鸟鼠teh jiàu。」若像teh骗三岁gín-á leh。

不时一枝手插tī裤袋á内底，m̄是有chah té枪tō是té刀á，乌道ê兄弟，一看tō知。Che真简单，大头á作生理，kap in有往来，beh叫来kā我hèⁿ惊hō͘死，恐吓我，叫我tǹg印á，桃a kap珠a作好人，tèⁿ m̄知。

印á我绝对无tǹg，in beh来kā我掠去，he乌道ê chit-má是ta̍k项拢作会出来。M̄通koh再chhiân迟，我有一个拍算，透早桃a去市á，伊bih tī便所等我，我刁工禁尿m̄去放，印á袋leh tō出来，tú好后壁一只thah-khuh-sih，好心kā运chiàng拜托，赶紧kā我载去派出所。

(2)

桃a一直问，「龙a走去tó?」我那会知？可怜害伊一早起khok khok chông，龙a又koh走出去ah。佳哉派出所有熟悉，liâm-mi khà电话来，讲龙a家己一个去tī hia。实在，che龙a ho͘ⁿh，食老好命m̄知惜，头壳内m̄知teh想啥?! 咱厝边作chiah久ah，ta̍k项上清楚，你看，hit二个大汉ê，作生理无êng，mā是一礼拜tō转来一摆，我问胜a：「你台北按呢一chōa来回，那有hia ê时间？」伊讲：「无时间mā tio̍h chhōe时间。」续leh讲：「老pē一个niā-niā。」有hit个心lah。Hit个查某kiáⁿ真珠a，tòa khah近，tī市内，ta̍k日来。侥幸oh，m̄知按怎，in来，龙a tō无欢喜，受气m̄讲话，che你敢想有hahN？Hit个细汉ê tī高雄食头路，若转来tō请假几工á，kap老母斗顾。桃a讲，龙a有时屎尿bē好势，家己一个顾无法得，我bat kā桃a讲：「那m̄请人khah简单！」伊讲龙a bē惯势，hia ê gín-á mā bē放心，ai-ioh，我看hit个桃a，一个老翁惜命命，tō是伊家己teh m̄甘心lah。

Che久长病bē好bē bái，按呢拖落去，m̄知会tàng挡外久，我看龙a身躯iáu勇khia̍k-khia̍k，手骨外有力leh，讲一顿大碗ê食一碗，会食tō有捆头。Tō是kan-na hit粒头壳，医生讲pháiⁿ去ah，号做老人gōng呆症，che我看是加减á讲ê。Chit-má ê社会，老人lú来lú无价值，少年ê若看无kah意，tō讲咱gōng呆症。食老tō是这个症头，chit-má上盖时行，古早阮ê婶婆姑婆，ta̍k个食kah七老八老，老khok khok ah，mā m̄ bat听讲tó一个有这lō老人gōng呆去ê症头。

我看龙a m̄是gōng，mā m̄是呆，khah花一sut á是有影，食老加减大家拢会lah。桃a讲，目睭输，记池有pháiⁿ去，不时厝内khǹg现金，chia藏hia藏，随tō bē记得，chhōe无tō赖人kā伊偷the̍h去。珠a kā in老母讲，mài kap伊花，现金算赔伊，mā是bē直，liâm-mi花二万，liâm-mi花五万，一时又koh藏无去。

龙a pháiⁿ性地，che咱chēng古早tō知影。桃a讲，受气tō m̄食药，按呢teh pháiⁿ。He药á我看是bóng食，有食人khah安定，总是bē断根。这chām teh恼（ló͘）气hia ê土地，m̄食药á，m̄讲话，气kah若一kho͘柴头á，家己一个七想八想，m̄知去想着啥，soah雄雄又koh走出去ah。

事实上，龙a上bē晓作人，何必苦？咱ta̍k项放hō͘清，放hō͘ êng，代志mài chhap，少年ê去发落tō好。这点伊看bē开，咱食老，钱无要紧，人kap家庭上要紧。恁看，亲像我阿会kap桃a、龙a in平岁头，算咱ê岁八十出头ah，四个后生有若无leh，hài，自in老pē chûn年过身了，无一个bat转来过。Ah m̄是讲tòa外hn̄g neh，拢tī市内chia，侥幸，tō是hō͘ hia ê钱舞舞害害去！In老pē去ê时，留hia ê财产，m̄是讲少，大家分家伙分kah冤家，差一sut á tō相拍，chit-má兄弟四个若冤仇人，无往无来，soah连老母mā算在来。你kā想，taⁿ分hia ê财产有啥意思?佳哉，咱chín iáu好脚好手，家己会煮会食，beh若像龙a这款，…讲实在，我看派出所khà十通电话，mā无人beh来leh。

食老心苦病痛是拢会，若有人来kā咱看一下，探一下头，问一声烧问一声冷，比啥货拢koh khah好lah！我hia ê孙成十个，过年时á，咱红包包好好teh等，mā无一个来，hō͘咱tī chia khok khok想。……实在ê，人讲作人作人，钱是khah轻，情是khah重，我不时teh kā桃a讲：「恁龙a上好命！」桃a tō开始teh流目屎，伊mā是知影，龙a食老这点kap我比，有khah好无khah bái，这款扮势bē 嫌得ah，是伊家己m̄知影niā-niā。

(3)

夭寿，咱nái知，hit个刑事kap in仝一党，拢斗空好势ah。我印á the̍h hō͘伊看，伊大声骂：「阿伯，你又koh家己一个走来chia！」死loh，正经案件m̄ kā咱办，直直khà电话，珠a随tō到，早tō联络好ah，珠a假仙：「阿tia，你nái家己走来tī chia？」我m̄ kā应，伊心内知影，ngē kā我拖转来，一入门，桃a tō teh háu，又koh问：「你nái家己一个thǹg赤脚走出去？」In仝党ê拢讲仝款话。随tō the̍h药á叫我食，che药á我nái beh kā食？食落去tú好包死ê lah！也无破病，食啥物药á ？tō m̄是gōng ê讲。

胜a、辉a拢来ah，大头á mā来ah，见面pháiⁿ死死，一人一句，像teh骂gín-á ：「你m̄通家己一个出去！」khah讲mā是仝一句话。Taⁿ chit-má koh khah惨loh，不时tòe tiâu-tiâu，kā我关tī厝内，m̄ hō͘我踏出门一脚步。去到tó tòe到tó，连去便所mā顾tiâu-tiâu，掠我准作一级犯人款待。Chang暗，tō是chang暗第一摆，in龟脚sô出来，现出真面目。珠a kap桃a又koh teh讲话，lú来lú好胆，m̄惊我听着：「…一定赶紧处理…」今á日又koh讲：「……lú紧lú好……」。Chit-má… chit-má我ê印á已经无去ah，时间差不多ah，我m̄是m̄知，早慢会hō͘ in kā我处理掉去，…我…我…救命oh！救命！

(4)

到taⁿ已经一礼拜ah，龙a无转来，派出所iáu未有电话来，夭寿，一大堆êng人讲êng话：「老岁á家己一个thǹg赤脚出去，chiah chē工无转来，包是出代志ah lah！」害桃a、珠a一直háu。……实在，龙a m̄是gōng，tō是作人急性铁齿，成害，咱m̄知影伊头壳内是teh想啥？！