《陈雷文选》

 | | | 转寄

写hō͘ 学生朋友ê代志 43 - 台湾 ê chiù符á

作者 陈雷 2019.12.29

（Siá hō͘ ha̍k-seng pêng-iú ê tāi-chì 43）（写hō͘ 学生朋友ê代志 43）

Tâi-oân ê chiù-hû-á / 台湾 ê chiù符á

Chêng hiong-káng Tang-lô-oan chheh-tiàm thâu-ke Lam sian-siⁿ tī Tâi-oân môe-thé hóng-mn̄g lāi-té kóng:Tâi-oân siōng-tōa bē ún-tēng ê lâi-goân sī Tâi-oân-lâng chheⁿ-mê chiap-siū Tiong-kok bûn-hòa. Koh-kóng:Ká-sú chit-tāi Tâi-oân-lâng bē-tàng khek-ho̍k chit-ê bông-tiám, in tō bē-tàng thoat-lī chit-ê bē ún-tēng ê ui-hia̍p. Che sī chin chèng-khak, chhim-khek tah-sim ê ōe. Chin pó-kùi ê kéng-kò.

前香港铜锣湾册店头家Lam 先生tī台湾媒体访问内底讲：台湾上大bē稳定ê来源是台湾人青盲接受中国文化. Koh讲：假使这代台湾人bē-tàng克服这个盲点, in tō bē-tàng脱离这个bē稳定ê威胁. Che是真正确, 深刻tah心ê话. 真宝贵ê警告.

Siáⁿ-mi̍h sī Tiong-kok bûn-hòa? Tiong-kok ōe, Tiong-kok jī, Tiong-kok kàu-io̍k, Tiong-kok le̍k-sú, Tiong-kok gē-su̍t……siōng tiōng-iàu sī Tiong-kok lâng thâu-khak lāi ê siūⁿ-hoat, kè-ta̍t koan. Sui-jiân Tiong-kok í-keng bô tè-chè--a, m̄-kú in thâu-khak lāi ê chèng-tī lûn-lí goân-chāi sī thoân-thóng ê hong-kiàn koân-ui su-sióng. Téng-si koán ē-si, ē-si koán pùn-ki. Téng-bīn to̍k-chhâi, ē-bīn lô͘-châi, pa-kiat ho̍k-chiông. Pún-chit sī hoán bîn-chú, hoán chū-iû, hoán lí-sèng, hoán hoat-lu̍t. Kap hiān-tāi Tâi-oân bîn-chú chū-iû phó͘-sè kè-ta̍t oân-choân tùi-hoán, chhiong-tu̍t bē-ha̍h. In bē-tàng iông-ún su- sióng to-goân, chèng-tī to-goân, bûn-hòa to-goân. Ta̍k-hāng lóng tio̍h Tiong-kok hòa tōa it-thóng.

啥物是中国文化？中国话, 中国字, 中国教育, 中国历史, 中国艺术.... 上重要是中国人头壳内 ê 想法, 价值观. 虽然中国已经无帝制--a, m̄-kú in头壳内ê政治伦理原在是传统ê封建权威思想. 顶司管下司, 下司管粪箕. 顶面独裁, 下面奴才, 巴结服从. 本质是反民主, 反自由, 反理性, 反法律. Kap现代台湾民主自由普世价值完全对反, 冲突bē合. In bē-tàng容允思想多元, 政治多元, 文化多元. Ta̍k项拢tio̍h中国化大一统,

Tâi-oân lâng chheⁿ-mê chiap-siū Tiong-kok bûn-hòa, ùi chiap-siū Tiong-kok ōe, Tiong-kok jī, Tiong-kok le̍k-sú, Tiong-kok kàu-io̍k......piàn-chó chiap-siū Tiong-kok lâng thâu-khak lāi ê su-sióng, kè-ta̍t koan. Ùi chia sán-seng jīn-tông ê ûi-ki. Kā Tâi-oân ê jīn-tông hi-jio̍k chhòng-bū--khì. Sīm-chì jīm-ûi ka-tī sī Tiong-kok lâng, bē kì-tit Tiong-kok sī it-ti̍t iá-sim beh chhim-chiàm Tâi-oân siōng hûi-hiám ê tùi-te̍k. Chiap-siū Tiong-kok bûn-hòa sī Tiong-kok thóng-chiàn ê chú-iàu kang-thêng. Che tō-sī Tâi-oân siōng-tōa ê ûi-ki. Tâi-oân bē ún-tēng siōng ki-pún ê goan-in:Tâi-oân lâng ê jīm-tông būn-tê. Tâi-oân lâng ê kè-ta̍t koan èng-kai sī kok-chè ê phó͘-sè kè-ta̍t, m̄-sī Tiong-kok chhàu-phú ê koân-ui hong-kiàn. Tiong-kok bûn-hòa sī Tâi-oân ê chiù-hû-á, ài kín-kín kā sio-tiāu.

台湾人青盲接受中国文化, ùi 接受中国话, 中国字, 中国历史, 中国教育,....变做接受中国人头壳内ê思想, 价值观. Ùi chia产生认同ê危机. Kā台湾ê认同虚弱创雾--去, 甚至认为家己是中国人. Bē记得中国是一直野心beh侵占台湾上危险ê对敌. 接受中国文化是中国统战ê主要工程. Che tō是台湾上大ê危机. 台湾bē稳定上基本ê原因：台湾人ê认同问题. 台湾人ê价值观应该是国际世界ê 普世价值, m̄是中国臭phú ê权威封建. 中国文化是台湾 ê chiù符á, ài紧紧kā烧掉.

（Chok-chiá chù:chhiáⁿ-iōng pe̍h-ōe-jī) （作者注：请用白话字）