《陈雷文选》

 | | | 转寄

Kéng婚

作者 陈雷 2006.05.28

高友通校长ê三个查某kiáⁿ tō是大汉ê碧玉生作上súi，身材koân koh lò，皮肉白koh幼，看起来秀气koh高尚，bē输美国电影名星Grace Kelly。读台大护理系ê时，少年家á 不时tòe一大阵tī kha-chhng 尾，hō͘伊ê老母操心。毕业了后，留tī台大病院精神科作护士，mā是常常有医学院ê学生来追求。但是m̄知啥物缘故，交来交去到taⁿ iáu未有圆满ê选择。有人批评，讲súi查某gín-á 目睭生koân koân tī hiâ-á 顶，siuⁿ gâu kéng 挑。M-ā有人宣传讲，这个súi查某gín-á 脾气bái ，有一个特别ê 怪癖。到底内容是怎样，事实无人知影。

最近也鹤阿姨介绍这位林博士ê时，碧玉ê老母bē放心，有特别kā伊吩咐：“查甫gín-á 若是kan-na爱看外观ê，不如hit款重感情ê。”这句话碧玉有记tī心内，不而过，伊bē晓beh按怎分别，啥款是爱看外观ê。啥款是重感情ê人。

这位林先生是电脑工程师兼太空工程ê双料博士，tī中央研究院作研究员。对碧玉会使讲是见面tō合意，一看随有情，不时按南港驶车来约会伊。碧玉看伊有学问，生作有人缘，见面koh有话讲，对伊印象mā是bē bái 。按呢二人来往，经过2、3个月，渐渐lú会投机。M̄-kú碧玉心内会记得老母hit句话，若是kan-na爱看外观ê。不如hit款重感情ê。因为伊m̄知影，这位博士到底是重感情ê抑是看外观ê人，所以pak内ê情意m̄敢hē深落去，恐惊koh再来失败。

按呢经过一个春天，to也一切顺是。热人来了后，博士才开始注意着一项龟怪ê代志，概成这个碧玉有一个怪僻，不管好天pháiⁿ天，见面一定拢是穿长ńg ê衫。代先无特别kā张持，想讲大概是女性爱súi，tòe时装流行ê关系。尾a大热起来，人teh 时行短ńg ê，伊mā是流大粒汗穿长ńg 。博士想beh kā问，koh惊pháiⁿ势失礼。这个疑问想来想去，lú想lú无，soah放bē 落去，khǹg tī头壳内，lú ká lú大giâ，亲像tú着一个科学工程ê大难题，暝日思考，想无一个tú好ê答案。

尾a想kah无步，去请教伊ê阿姊，关于碧玉穿衫ê代志，讲hō͘阿姊听。有影查某人ê心理阿姊khah内行，伊讲：“Soah m̄知，查某gín-á爱súi，惊大日皮肉phak乌去。”博士讲：“乌阴天无日，伊mā是穿长ê。”阿姊讲：“定着是体质lám ，惊畏寒。”博士讲：“好天出大日，流大粒汗mā是穿长ê。”阿姊讲：“无tō是伊人khah保守，pháiⁿ势穿短ê hō͘人看。”博士讲：“这阵拢穿迷你裙，一双腿súi当当。”阿姊hō͘伊应kah无话，想beh讲：“Ah无…敢会是…”óa来博士耳á边nauh一kōaⁿ 细声话，博士suh一下khùi，吞一嘴nōaⁿ，大声喝：“莫怪！莫怪！”目头结一结，问：“Taⁿ beh按怎？”阿姊讲，按呢生…按呢生…。

Chhōa小弟去se̍h百货公司看查某人ê súi衫。Kéng 一领意大名牌「无啥钱 」（Versace）ê时装，一su 3万kho͘，长裙无ńg ，规套是半暝暗天ê乌色，chhap台湾海峡深海ê khóng 色，朴素简单，高尚飘撇。包装好势，专工亲身mo͘h去送碧玉。Kā伊讲：“后礼拜你ê生日，这su衫我特别亲手kéng 送你，Happy birthday！”碧玉足欢喜，讲：“我生日穿这领hō͘你看。”约hit工tiàm开开大饭店跳舞庆祝。

这日博士先来tī开开饭店等。头壳内一直想hit领衫。这个热人以来ê疑问，今á 日tō beh有答案，紧张kah手tê á流chhìn汗。雄雄听着鸟á唱歌碧玉ê声：“你看这领好看--无？”Gia̍h头一看，正正khiā tī面头前，he碧玉笑微微，一身「无啥钱」ê洋装，暗天ê乌色chhap深海ê孔色，胸前pín一支钻石花ê pín针，bē输天顶ê星粒，闪闪sih sih，hō͘伊头目醉醉。详细kā看，bē活lah，thài会又koh是长ńg ê!无看he皮肉!原来顶面koh再tha̍h一领，mā是乌色lām孔色。着惊koh失望，一时m̄知beh按怎应伊。目睭直直kā chîn，按头相到脚，按脚相到头，bē输teh看thǹg光无穿衫ê mo͘h-te-luh（model），thuh 一晡，用手指：“你…你tha̍h这领bē siuⁿ热？”

Liâm-mi he舞厅放lo͘-man-tit-khuh ê音乐，温柔ê oah-lu-chuh，蓝色ê多恼河。博士好礼请碧玉跳舞。碧玉peh起来，khiā tī伊面前，双手liâu-liâu-a kā长ńg ê衫一纽一纽tháu开，作一下拢总thǹg掉去。侥幸--oh，你看！内面拢无别领，kan-na chhun hit su「无啥钱」ê洋装，长裙无ńg ，头到脚是乌色lām 孔色ê丝á ，规身是白粉幼棉棉ê皮肉，伊tō是koân天大海teh飞ê天鹅，梦中妄想ê仙女下降…这时这个开开大饭店高贵ê场所，所有ê人客拢oa̍t头过来，因为in m̄-bat看过chiah-nih艳丽ê美女，chiah-nih肉感ê身材，穿chiah-nih高尚飘撇ê súi衫。Bē输tī hit个当时，tī hit个地点，hit个梦想ê美国电影名星Grace Kelly雄雄亲身来出现。规场tiām chiuh-chiuh，kan-na lo͘-man-ti-khuh ê 音乐，温柔ê oah-lu-chuh，蓝色ê多恼河细声细声teh tân…

但是che iáⁿ目ê光彩kap o-ló ê美丽伊有看见若无看见，有听着若无听着。因为伊kan-na注意着he bô͘-ńg暴露ê手，有一chōa红贡贡ê khì，按白白白ê肩胛头直直直thàng落来到手khiau。粗pê pê，ló-ló长，一phòng一naih，bē输一kōaⁿ 灌好ê生腌肠。Chhoah一tiô，指hit个khî:“Che…che是啥？”碧玉笑笑á应：“Che oh？…che我细汉骑车poah倒lòng着，thīⁿ足chē针。”“Ah…ah thài chiah粗chiah大chōa?bē输…bē 输…”“Bē输蛇？…无m̄ tio̍h，che叫作蛇khî。”“蛇？！”博士一世人上惊蛇，退一步，ná惊ná看，ai-ioh-ôe，成实电火脚规只koh会tín动，像蛇teh sô。“Ah…Ah thài m̄ kā割掉？”“割bē掉，医生讲，割掉koh发出来也是仝款，lú割lú 大只。”

惨--ah，惨--ah，明明是神明teh创治伊。这个 áⁿ tī身边跳舞ê碧玉，变作一个身躯生蛇ê美女。Koh惊koh爱，taⁿ是beh按怎好？是beh抑是m̄?是好抑是m̄好？头壳gông chhia-chhia，bē输土脚顶oa-lu-chuh ê脚步， lin-long-seh，一时bē tàng决定。He真久khǹg tī心内ê一件事，本来tī这工生日beh kā伊求婚ê话，that tī nâ喉头，soah讲bē出来。

隔日去chhōe阿姊，kā碧玉穿súi衫手生蛇ê代志讲hō͘阿姊听。阿姊讲：“我早tō知！定着是，pháiⁿ物暗khàm，siàⁿ-siàⁿ hō͘我讲--tio̍h!”目睭chiah大kòng，大声问：“Iáu-koh有啥？”博士惊一tiô ，Iáu-koh有？！阿姊讲：“规身躯别位iáu有生啥？”博士讲：“看会着ê tō是一只niā-niā。”阿姊骂伊：“你娶某kap买车仝款，一项to bē使马虎，看会tio̍h，看bē tio̍h ê拢ài看。”博士问：“看bē tio̍h ê beh按怎看？”阿姊óa来耳á 边，讲按呢生…按呢生…。

博士轻声kā碧玉讲：“我kap你熟悉chiah久ah，ta̍k项代志kap你拢坦白…”碧玉讲：“Che我知影。”博士讲：“有一句话，m̄知beh按怎…”碧玉讲：“无要紧，作你讲。”心内欢喜kap期待。博士讲：“若是终身大事，che bē使chhìn-chhái得。”碧玉讲：“Che我了解。”博士讲：“概成咱若去买新车，beh买进前，ta̍k项ài看hō͘清楚，检查好势…”碧玉tiām -tiām无应。博士讲：“所以我想，iáu是咱先来去作身体检查，the̍h一张全身健康证明书…”这时碧玉才完全明白伊ê意思，受气koh失望，独强lún leh，无拍青惊伊，好礼应：“Che…我mā了解。亲像咱买一台新车，ài有一张品质保证书。”博士欢喜，讲：“Tō是按呢，tō是按呢。”停一下，碧玉讲：“Ah无，你代先去检查。”

博士去hit间新开ê高信大病院作全身检查，交费4万kho͘。Hip电光、超声波、心电图、通胃镜、肺管镜，大肠镜、检屎检尿检血、检糖检油检盐、…，内内外外，大空细空，拢总通 过koh验过。报告出来，一切正常。博士足欢喜，the̍h来hō͘碧玉看。碧玉看he报告，ná看面ná忧，目头结一结，一直hàiⁿ头。博士奇怪问伊：“Che报告一切正常，全部甲等，敢koh有啥问题？”碧玉讲：“你ta̍k科拢通过，一科无及格。”博士chhoah一tiô，问：“Tó一科无及格？”碧玉讲：“精神科一科。”博士m̄知伊ê意思，事实he新开ê高信病院设备一流，每一科拢有高科技ê仪器检查验定，数字证明，独独精神科无。“我kap你熟悉chiah久--ah，ta̍k日见面，你也m̄是m̄知，我无起siáu ，mā无神经病。”碧玉起爱笑，讲：“你无起siáu ，也无神经病。M̄-kú你ê心kap感情bē输一枝súi面ê花干，可惜有pit一khî chiah大khî。”Kā家己倒旁手ńg le̍k chiah koân起来，比hō͘伊看：“你看，kap这chōa khî仝款仝款。”按椅á顶peh起来，koh讲：“你讲了无m̄ tio̍h。Che终身大事kap买车、kéng 花干仝款，ta̍k项ài顶真，bē使 chhóng -pōng chhìn-chhái得。”Kā博士ia̍t一下sa-io-na-nah ê手，oa̍t头作伊去。

转来厝，欢喜kā阿母讲：“阿母，我知影lah。”老母问：“你知影啥？”碧玉讲：“我chit-má知影beh按怎分，啥款是爱看外观，啥款是重感情ê人。”老母问伊：“按呢这个电脑太空ê双料博士，伊ê感情有外重？”碧玉应讲：“Kap我手这chōa khî平重。”

听讲最近新ê医学科技会tàng用le-soh（laser）kā这款蛇khî整容改善。不过咱m̄知影，高友通校长ê查某kiáⁿ碧玉尾a有去作这种手术无。