《陈雷文选》

 | | | 转寄

PP基因

作者 陈雷 2008.05.18

这种人有一款特别ê气味，牵猪哥ê财--a上盖了解。生--出-来tō有，人讲是基因ê关系。这二个双生出世ê时，in老pē看一眼、phīⁿ一下、hoah一声「害」，头oat--leh出--去，自按呢无koh转--来。In老母头一胎生双生，差一sut á难产生bē出--来，血直直拚，据在婴á khàu一晡，佳哉才返魂倒转--来。目睭peh金kā看，ai-io-ôe,che婴á一个秃头光光，无半枝毛；另外一个，敢有影hahN，thán横一撇嘴须，ùi chia到hia，bē输gín-á作孽用乌笔画--ê｡总--是作老母--ê,khah讲mā是家己ê婴上盖宝，心肝iⁿ--a ôe,这二个m̄是天使tō是天才。赶紧叫相命--ê gín-á-仙来，mā是看一眼、phīⁿ一下、hoah一声、鸡母ôe,大汉m̄是作总统tō是党主席。隔壁hit个阿财--a，牵猪哥出身也来看，hoah讲：「红豆嫂，bē m̄-tio̍h--lah，这个味，我牵猪哥ta̍k日teh phīⁿ！这二个，生成是一世人ê政治家。」红豆嫂欢喜，应：「Hioh--lah，m̄是作总统tō是党主席。」

不而过，beh作一世人ê政治家也无hiah简单，自细汉tio̍h比人食苦têng倍。这个红豆嫂，难产tio̍h产褥热，无钱通买药。二礼拜tō来过身--去。这二个双生soah tī世间无pē无母，hō͘阿妈抱转去朴子io，khah早真草地ê所在，叫作猴树港。后--来犹是散赤人io bē起，姑不而衷未肚chè tō hō͘-hō͘--人-去。Hit个大汉秃头--ê,hō͘姓施--ê抱--去，号作信良。犹hit个细汉--ê一撇嘴须，hō͘姓许--ê io--去，号作明德。无彩一对双生兄弟，m̄是天使tō是天才，自按呢tō来拆散分开，一直到大汉m̄ bat见面。

信良kap明德大汉了后，若相命kap牵猪哥--ê讲--ê,拢成作政治家chhap政治。Hit chām,台湾政治单纯，chhap政治m̄是入国民党，tō是chhòng台独，ah无tō是óa共产á｡明德--a tòa tī南部，时行台独，后--来为着「台湾独立联盟案」hō͘人掠去关，判无期徒刑。

Tī监狱关khah无四冬，ta̍k日食糙米，困柴pang，bē堪得受苦，暗时作恶梦。梦见一个老身--ê,白嘴须红目眉，m̄是真人tō是仙道。Gia̍h一枝牛sut ná ia̍t ná笑：「实在有够gōng!」明德无欢喜，问伊：「你是啥人？」老身--ê应：「我tō是风神，天下行透透，世事看到到。」「我是勇士兼义士，为啥物笑我gōng?」老身--ê讲：「勇士食拍，义士食亏，世间第一gōng｡…我问你，你tī chia四冬，ta̍k日食糙米，困柴pang，受苦受难，敢有人o-ló你，讲你gâu?」连续几lōa暗作这个梦，流chhìn汗，自然心内思考，我tī chia食kiâm食苦，无人关心，无人o-ló,实在何必苦?！lú想lú有理，讲：「请教真人仙道。」老身--ê tō kā指点：「勇士、义士m̄通作，作永远ê政治家，有名koh有利，上盖风神。」Tú好hit几日，伊人闭结，便所桶khû一晡，放bē出--来，大力tèⁿ--一-下，雄雄大tháu,soah连头壳也清--去。一时觉悟知转，khah早实在gōng｡赶紧裤láng--leh peh--起-来，the̍h纸来写。In某来探监，纸交hō͘伊，吩咐讲：「这张纸你chah--leh，去蒋介石in大厝门口kā跪。」In某问：「跪beh创啥？」「Kā伊求。」in某惊一tiô,你m̄是拢讲，大丈夫，敢作敢当。怎样chit-má叫我去跪蒋介石，kā伊求？「你m̄知，我chit-má关了艰苦，有理解真理。勇士食拍，义士食亏。…这张纸，你the̍h去kā蒋介石跪。」「Che纸写啥物？」「写我明德--a，关了够khùi,bē堪--得，知错悔改，求伊赦免，放我出--去。我以前少年m̄ bat代志，hō͘共产á骗去作台独。伊若放我出--去，我chiù-chōa kap伊拍拚，作伙反共大陆。」明德看in某踌躇，紧讲：「丽珠--a，你m̄知，che监牢m̄好tòa,实在艰苦。」「你犹是家己去跪，khah有诚意。」明德紧讲：「我明德大丈夫，ná会使去跪人求人？Hō͘人知，面子拢无--去。…犹是恁查某人跪khah有效，人khah会同情…听讲伊是信教--ê｡」Koh再kā丽珠吩咐：「这项代志绝对m̄通hō͘朋友、有志知影，失我面主。」结果in丽珠--a，带念着几冬翁某情，成实hit张纸chah--leh，去蒋介石大厝头前跪，三暝三日无peh--起-来，跪kah脚头u chhê破皮流血水，无人chhap--伊，无彩明德teh觉悟真理。一直等到hit年，蒋介石beh死，雄雄去想--着，伊一世人pháiⁿ事作siuⁿ chē,thâi死太chē人，若是死了去阎罗王hia对chi̍h,问伊在生pháiⁿ事作hiah chē,有作啥好事，soah无话通应。所以临时大赦政治犯，作好事hō͘阎罗王看。明德--a关十冬，koh in某跪三暝三日拢无效，等到老蒋--ê死，作功德才放--出-来。

放--出-来了后，朋友、有志拢替伊掩盖，写批叫in某去跪、求蒋介石赦免ê代志拢无hō͘人知。明德koh chhiàng声：「抗争到底！牺牲到底！绝对无向独裁者妥协投降！」成作反蒋第一大英雄，讲话会歪嘴，行路会khau风，真是风神。心内不时会记--得，监牢内底风神真人仙道kā伊教示：「勇士食拍，义士食亏。」时常家己自勉：「作永远政治家，有名有利，上盖风神。」

无外久桃园县长选举。国民党有一个施信良，党内提名无着，等bē tiâu,急beh作官。Hit 时情势有teh变化，人心渐渐反国民党。信良--a利用这个机会，脱党竞选。结果当选桃园县长，变作党外大英雄。这个施信良是啥人？m̄是别人，tō是明德--a另外hit个双生á兄弟，chēng细汉秃头，hō͘姓施--ê io--去。大汉了后，西瓜óa大旁，入国民党，靠国民党ê势起身。

台湾kap美国断交hit年，蒋经国取消选举，又koh掠人。党外人士tī高雄桥á头集会示威。信良--a tī hia遇着明德，kā伊展：「我是党外第一英雄，台湾上盖风神ê查甫人。」这句话上盖伤着明德ê自尊心，真是不服。「干，恁pē苦牢坐十冬，tō m̄是白关--ê｡你也kap我争风神！」Tú好无外久发生美丽岛事件，党外人士总掠。明德--a会记得顶回坐监ê辛苦，惊hông掠去关，逃命走去bih。政府赏金几百万beh掠伊。Hit chām电视新闻每日报伊ê名、ta̍k时hip伊ê相，强强滚，一时变作台湾上盖风神ê查甫人。15冬关--出-来了，伊kā信良--a展倒转：「我是台湾上盖风神ê查甫人。」后--来为着chia ê代志，二人前后hō͘人选作民进党ê党主席。相命--ê kap牵猪哥--ê出世ê时tō有讲过：「M̄是作总统tō是党主席。」siàⁿ-siàⁿ讲kah tio̍h-tio̍h｡

Hit chām党内有一位奇妙秘书，姓陈名文西，亲切叫作阿西。M̄是生作外súi,é-é肥肥，有油有肉，特别是hit二粒奶bē细，可比屏东ê热带椰子。又koh作人大方，交际真gâu,会晓用奶á作社交ê工具。结果kap二位主席真投机会合，仝hit个气味。上班tîⁿ-tîⁿ作一kōaⁿ，下班kō-kō作一堆，社交来往，新闻媒体出风神。

Taⁿ这日三人又koh lim酒半醉teh社交，阿西--a一目看明德，一目看信良，一个撇须，一个秃头，一个勇士，一个英雄，目睭花花，心肝飞飞。无张持灵感来，讲：「恁二个，bē输生--来亲兄弟。」这句话无小心hō͘一个乌白日报ê记者听--着，报纸顶tō pòng｡讲许主席、施主席，一个勇士，一个英雄，原来是亲兄弟。有人食饱êng-êng,走去调查。查--出-来ai-io-ôe,二个拢是一岁ê时hō͘人khioh来作kiáⁿ。问来问去，hiah-ni̍h tú好，拢是ùi草地朴子，khah早叫作猴树港hia分--出来-ê｡Taⁿ心适--a。M̄-kú这时in hit个阿妈早tō过身无tī --lah，beh去tó位问？结局喊来喊去，虽然听--起-来有影有迹，总--是也欠一个确实ê､科学te̍k ê证据。

佳哉咱中央研究院生物研究所有一位吴天光博士，研究人类基因专门。听着这个消息，tī 报纸顶chhiàng讲：是m̄是亲兄弟，用基因分析会tàng证明。伊有这个技术。阿西--a热心kā in二个鼓舞，明德--a、信良--a一人抽一筒血，用先进科技，基因分析。结果tī二人ê染色体顶，发见新ê､真特别ê基因。天光博士kā号作PP基因，正式学术全名是永远政治家(Permanent Politician ) 基因，一组三个，也tō是PP-1，PP-2 kap PP-3. PP-1基因ê功能是，一枝嘴双个舌，乌--ê讲白--ê,白--ê讲乌--ê,tio̍h--ê讲m̄ tio̍h,m̄ tio̍h讲tio̍h｡PP-2 ê功能是，pûn鸡kui，出风神，顾面主，爱金钱。PP-3 ê功能是，kā人跪，kā人求，好空--ê óa--来，pháiⁿ空--ê走lī-lī｡Tú-tú好kap in二人合合。吴博士讲，明德--a、信良--a二人这三个PP基因完全tú-chiàu对合，是天生ê永远政治家。一般人口中间，若m̄是血亲双生兄弟，这款tú-chiàu ê机率是十亿分之一，差不多无可能有。Tō是按呢，科学证明，许明德、施信良原本是双生兄弟。有人讲，最近明德tī总统府头前凯达革兰道倒扁，信良tī中正庙静坐，mā是ham PP-1、PP-2、PP-3有直接ê关系。表示PP基因mā有扰乱民主、破坏法制ê功能。

以上tō是永远政治家PP基因发见ê经过。因为这个重要ê发见，吴天光博士差一sut-á得着No͘-be-luh (Nobel) 奖。不过有人建议，陈文西ê功劳mā真大，若无伊热心社交，tō bē带动这个研究。Che实在mā是台湾人ê光荣。