《陈雷文选》

 | | | 转寄

Thâi狗

作者 陈雷 2008.05.04

(1)

Hit日，七堵kap八堵仝款，死真chē人，拢死了足雄koh足chheⁿ-cho̍h,有ê连棺柴to无。无人料想会到，比狗死khah chē｡老大人讲，古早日人(jîn)时代chi-bu-suh大流行ê时，mā无chiah惨。我想，拢是为着狗ê关系。Hit chām,七堵ê人kap chín仝款m̄甘狗。m̄-kú,和平、永远、清天……in无饲狗，tī庙里烧香求保庇mā是死；金兰a伊进前狗á已经牵去a,无koh再饲，mā是死；koh阮七堵ê美人秋月，伊有电头鬃，āiⁿ婴á犹未度chè,死tī水窟á边，几lōa工无人看着。大人拢m̄爱讲，骂阮gín-á人m̄通乌白问，乌白听。莫怪这个误会chiah深chiah久。

In讲七堵狗siuⁿ chē,che有影。阮tau tō有2只。勇a是阮老pē kap进a in pâ行棋赢来ê,生乌嘴ê｡Chēng细只我饲大，对我上尽忠。进a in pâ尾a想m̄甘，beh讨倒转去，阮pâ讲：「大thiāu a,你mài笑破人ê嘴。查某kiáⁿ嫁出门a,敢有koh chhōa转去ê?」勇a hō͘车kàu死了，阮pâ kap阿母拢有去kā拜。

七堵ê狗好命，che也是有影。食饱chhit-thô,四界游仙，无人束pa̍k｡有时tī门脚口放狗屎，mā无人kā in kāng｡钦a in大姑tòa tī khah庄脚，犹未到八堵hia,见来tō念，清溪a sēng狗比sēng kiáⁿ khah厉害。Che也是有影，不而过有伊ê因端。亲像钦a in老pē作庄长，伊信狗会救人，比人khah有情义。不时teh kā人展。若无Hi-lo͘h，tō无阮钦a｡钦a细汉tī水窟á偷siû水淹无死，tō是Hi-lo͘h救ê｡钦a in老母含笑a会斗讲，阮这二个若兄弟。七堵ê狗Hi-lo͘h上勇上大只，人人好，上有人缘。以前tī日本军队作军用狗。日本人走ê时送hō͘钦 in pâ,hit阵伊作咱chia ê街长。

大头á pháiⁿ-kiáⁿ大家早tō知。这回连in母a mā怨叹，这个gín-á好通khioh-ka̍k a｡无彩in母a守寡，chēng细汉kā伊chhiâⁿ。代先进a in阿财pháng去，几lōa工chhōe无，想讲he狗á kiáⁿ路，走去tó位hō͘车kauh死a｡Tō是春a in新妇彩凤来偷讲，有看着大头á暗头家己一个，抱一只狗á kiáⁿ ùi派出所hia去。

成实gōng-gōng过几工又koh来，人早tō teh当伊。三郎kap伊有熟sāi,pa̍k tī树脚，无kā伊pūi,乖乖hō͘伊牵，tòe伊行。进a kap in pâ chông出来jiok，kā叫，大头á,阮三郎你beh牵去tó?大头á无料着人来，chheⁿ-cho̍h tō应：「三郎teh beh生，牵来去饲好食物。」大thiāu 骂：「乌白讲！三郎公ê thái会teh beh生？」手骨kā chang leh，beh拍伊。大头á讲：「米婶a会晓看狗相，chhōa来去hō͘伊相狗命。」大thiāu kā伊hīⁿ-á lian起-来choān l liàn,问：「照实讲，hit日阮阿财你抱去tó?」大头á m̄应，大thiāu受气kā háⁿ ：「M̄讲，chhōa来去派出所，你tō知苦。」大头á soah phî-phî-á应：「去派出所beh创啥？我tú-chiah ùi hia来。」Taⁿ苦a,tō是派出所叫伊来牵狗！「你讲！啥人叫你来ê?」「简ê,…简ê叫我来ê｡你beh按怎？」「乌白讲。简ê家己作警察，thái叫你来偷掠狗？」问一晡，才知影是新来ê派出所长无下hoâi ê beh爱狗。这个派出所长姓钟，讲是广东来ê,细细汉，欠一tè下hoâi ，人叫伊无下hoâi ê｡「伊爱beh饲狗？」「M̄是beh饲狗。」「掠狗beh创治？」「掠去thâi｡」大thiāu惊一tiô:「Thâi狗beh创啥？」「食狗肉。…狗腿炖姜丝，补冬免kéng时。」大头ná念。大thiāu气kah咬嘴齿筋，双手phi̍h-phi̍h-chhoah，大力ām-kún kā tēⁿ leh，beh chhiâⁿ hō͘死。」「你！你这个猪狗精牲！」佳哉大头á有力，liòng 开走。大thiāu hoah声kā放tiau ：「你koh来，恁pē chang着，lān-chiáu-á tok起来，ùn盐tàn tòa大路hō͘狗吞。」

「狗上盖灵siàⁿ。我kā你讲，恁勇a艰苦死，冤枉去，定着会来命。」凤a惊狗，kā金兰按呢讲。「Beh讨啥人ê命？」金兰问。「我问你，昨hng，啥人夭寿，亲手索á kā大耳ê pa̍k ām-kún ê?」凤a大声问，bē输警察teh kā phngh。「我lah。」「我问你，he狗gōng-gōng,欢喜甘愿tòe你去？」「伊m̄去，我kā骗，讲beh chhoa伊去水窟á siû水。用肉骨kā siâⁿ。」「你实在无chhōa伊去siû 水？」「无。骗伊去派出所。」「Ah来leh？」「到hia,伊m̄入去。我kā伊giú｡」「Ah来leh？」「大耳ê有力，giú bē赢。简ê出来斗giú 。」「Ah来leh？」「大耳ê ām-kún束ân bē喘khùi｡伊目睭kā我拜托，求我m̄通giú伊入去。…」凤a hoah：「Ai-ioh。Taⁿ害a!」金兰a惊kah phi̍h-phi̍h-chhoah。卖鱼ê春a听kah强beh流目屎。

Tō是hit日简ê来市á巡。金兰a紧包一tè好肉，the̍h hō͘伊：「恁桃a chiah久无来。三chân肉伊上盖爱。」简ê见来，chē少ài巴结伊。注死hit日，大耳ê tòe脚，bih tī肉tiam下底teh khioh肉幼á｡简ê看狗肥，一对大耳若粽叶á chiah大个，头到尾规身躯乌sìm-sìm,问伊：「Che狗几岁？」「阮大耳ê明á chài生日，tú好三岁。」「三岁上盖好。乌狗上盖补。」简ê ná念，明á chài chhōa来去派出所。」金兰a叫是简ê teh o-ló大耳ê súi,beh牵去hō͘人看，应：「派出所nih？阮大耳ê上乖，生份人也bē pūi｡」

转来欢喜kā in翁讲，明á chài beh牵狗来去派出所。石竹a想龟怪，问落才知影是简ê来市á看狗，讲：「3岁上tú好，乌狗上盖补。」面头拍一个忧愁结。金兰a问讲：「是啥物代志？」石竹a讲：「你成实gōng鸡m̄知昼。咱大耳ê,明á chài有chhōa去tō无chhōa转来。」Kā前a大头á偷牵狗ê代志讲hō͘ in某听。金兰a gông-gia̍h惊一tiô,鸡母ôe,阮大耳ê差一sut á hō͘我害害死。隔转日，大耳ê生日，pa̍k tī厝里树á脚，无hō͘伊tòe去市á,也无chhōa去派出所。

简ê tī派出所等2工，无看狗来。过来市á巡，问金兰：「Thái无chhōa狗来？」金兰应：「狗破病，tī厝里m̄敢hō͘出来。」简ê走去金兰in厝看，ah thái有影lah？He大耳ê家己一个pa̍k tī树脚无聊，看简ê来，phut-phut 跳，ia̍t尾beh kap伊chhit-thô｡简ê骂：「干！che狗无病。」石竹a chhìn-chhái应：「Ai-ioh，早起犹teh khuh-khuh嗽。」Kā简ê讲：「Che狗无清气，khah输食猪。明á chài,我thâi一只猪肥肥…」简ê受气，骂：「狗会补，猪bē补。若无来，你市á猪肉免卖。」

害in翁某操烦二日，金兰念：「大耳ê若牵去，剥皮tok肉，tīm冬归补冬。」石竹讲：「若无牵去，执照吊销，猪肉免卖，饭免食。」想想leh，kā某讲；「He狗咱koh饲tō有。」金兰a tiām-tiām m̄敢应，一暝困无眠。隔转早，chhōe一条大索，大耳ê叫来，耳á giú óa来讲话：「大耳ê,你tio̍h 知，m̄是我阿兰a ê意思。」大索ām-kún pa̍k二kho͘,beh牵伊行。大耳ê m̄行thōng一晡。石竹讲：「成实人khah输狗。Soah be晓kā骗讲beh chhōa伊去siû水。」成实讲白贼kā骗。Beh chhōa伊去水窟á siû水。Koh the̍h肉骨kā siâⁿ。大耳ê上爱siû水，才tòe伊行。

「害a!你taⁿ成实害a!」凤a一枝秤-á手里khok-khok比，若师公teh画符á｡「Che狗chēng细汉你饲ê,chit-má艰苦死，冤枉去，he ām-kún kho͘索á你亲手pak8e5;he一路骗伊行，mā是你亲手牵ê,taⁿ m̄ chhōe你讨命，beh chhōe 啥人？！」金兰大枝肉刀piaⁿ leh，hoah：「我来去！我紧来去！」直透chông去到德修宫，吕洞宾面前跪落：「M̄敢a!我m̄敢a!…」khap头直直拜：「大耳ê,你tio̍h了解，m̄是我兰a,m̄是我beh害你，…」

(2)

「Tòa厝里放！Bē使出去。」阿母大声kā我hoah，m̄ hō͘我出去放尿。「是按怎bē使出去？鸟嘴ê mā beh放。」「戒严a｡」「戒严是啥？」「Tō是bē使出去。大家拢tiàm厝内。」Tō是按呢，阮阿母kap阿pâ chiàng时犹未去市á｡」「是按怎beh戒严？」阿pâ无欢喜，hiàm我走。「Bē使出去！戒严tō是戒严。Gín-á人爱问话！」所以我m̄知影，为啥物beh戒严。昨暗寒流来，真冷，m̄-kú以前khah冷mā m̄-bat戒严。又koh戒严真龟怪，普通时á阿母上大nâ-喉，chit-má讲话soah足细声，chhi-bú chhi-chhā,规日chia̍p-chia̍p tòa门口探头，m̄知teh探啥？

偷走去问钦a,in tau tī阮tau对面。今á日无去学校，学校mā戒严。「阿pâ叫我顾Hi-lo͘h，Hi-lo͘h bē使出去。」Hi-lo͘h mā戒严。「为啥物？」「警察beh来掠伊。」Tō是按呢ām-kún pa̍k一条索，以前m̄-bat hō͘人束ām-kún｡「是按怎beh掠伊？」「Beh掠去thâi｡」我惊一tiô ，beh thâi Hi-lo͘h！？「伊作啥pháiⁿ代志？」「伊无作pháiⁿ代志。」「是按怎beh thâi伊？」「Thâi去食。」我m̄信。

Bêh thâi Hi-lo͘h！Hi-lo͘h chiah乖，是按怎beh食伊 ê肉？！「啥人？啥人beh thâi伊？」「无下hoâi ê 。」「无下hoâi ê?！是按怎m̄食鸡肉？ 」我受气问。钦a讲，狗肉上热，in beh补冬。Tō是天气siuⁿ冷ê关系。Hi-lo͘h坐tī门口，chiah大只，耳á翘翘，胸坎挺挺，目睭仁tī日头脚反射绿色ê玉光。高贵尊严，kā阮pūi二声，bē输伊teh讲，伊上盖大，伊tō是七堵ê狗皇帝。

「你tio̍h kā伊顾hō͘好。」我紧讲。钦a kā Hi-lo͘h giú khah óa来，细细声偷kā我讲：「阮pâ beh叫人来开会。」「开会是啥物？」「In大人参详代志。」「参详代志？」「参详顾Hi-lo͘h。…m̄通hō͘ in掠去。」「Oah。…」我勇敢讲：「我mā来开会，斗顾Hi-lo͘h。」这日，到尾警察无来。钦a in pâ kap in母a戒严mā是真龟怪，kap阮pâ仝款，规日chheⁿ-chheⁿ cho̍h-cho̍h,拢讲细声话。

Hit个挂目镜ê坐tī钦a in pâ边a,tō是钦a in学校校长。Sán-sán lò-lò,头毛拢白ê,二撇嘴须ā白ê｡Khiā tī伊后面tō是春a,伊tī市á卖鱼。进a in pâ坐tī门边，kan-na伊讲话khah大声，阮听会着。Chhun ê五、六个我bē认得。进a in pâ见若讲「自治」，手tō gia̍h-koân起来比。钦a讲，「自治」tō是家己决定代志。「家己决定啥代志？」「Hi-lo͘h ê代志。」「决定in bē使来掠？」「Hioh，咱家己决定。」「按呢自治khah好。」我紧kā钦a讲。钦a mā tàm头同意。暗顿ê时，我kā阿pâ讲，自治khah好。阮pâ惊一tiô,气kah面反青，咬嘴齿筋：「你去tó位听来ê?！Koh乱sú讲，我修理。」阿母骂：「Gín-á人乌白听，乌白讲，m̄知死活！」Hiàm我去困。所以我hit阵m̄知影，是按怎in m̄爱自治，无beh家己决定，普通时，in mā是足疼Hi-lo͘h。

无戒严mā真龟怪，真chē人tī街á路teh行，钦a讲是「游行」，若像teh giâ闹热。校长kap钦a inpa5进a in pâ chhōa路，行tī上头前。钦a in学校几个khah大汉ê学生mā tī hin｡「自治！自治！」In ná行ná hoah，tō是beh家己决定。Koh hoah「拍倒陈仪」，「拍倒贪官污吏」。钦a讲，陈仪tō是kap无下hoâi ê仝款，偷掠狗thâi去食，tō是贪官污吏。

已经 4工a,警察无来。简ê走去bih，无人有看着。In讲警察惊咱游行。进a有听着in pâ讲，八堵mā有人游行，in去拍仓库，beh the̍h枪。M̄知八堵人也chiah疼狗，in hia也有「贪官污吏」偷掠狗。 真正警察惊游行，无下hoâi ê辞职a,拢m̄敢出来见人。大家欢喜tī街á路走koh跳，也有大汉学生hoah「自治a!自治a!」。第一摆放Hi-lo͘h出来，欢喜kah kap街á路ê人仝款，phut-phut跳，kho̍k-kho̍k chông 。进a in三郎tòe Hi-lo͘h四界走。这下晡，咱自治a,狗拢放出来hō͘ in去chhit-thô｡

另外koh再一个寒流来，雄雄天变乌阴，koh冷冻。无戒严mā真龟怪，阿母吩咐bē使出去。又koh讲细声话。In来开会，钦a讲，校长kā大家讲，人beh来a｡「啥人beh来？」「国军」「国军是啥？」「兵á｡」「狗ê,亲像卫生队？」钦a tìm头：「有gia̍h 枪，讲beh来足chē足chē｡」「外chē?」「M̄知，上无mā几lōa百个。」「In ùi tó 位来？」钦a讲，是ùi中国坐船来ê｡明á chài tō会到。八堵hia有人ùi台北去ê消息。「校长讲，来tō惨。M̄知beh死外chē｡」「狗á拢总behhō͘死？」钦a tìm头。「无自治a?」钦a摇头。雄雄伊khiā起来，kā我ê手chang leh，hoah：「紧！你紧去抱恁乌嘴ê来！」

阮三个人青狂直直行。Hi-lo͘h kap三郎，欢喜ná走ná跳，直直chông作前去，走一节a tō koh停脚，oa̍t头来pūi ，bē输叫阮赶khah紧，通chhōa in去chhit-thô｡乌嘴ê jiok bē赴，hō͘我抱。Beh中昼才到位。钦a in大姑tòa tī七堵出去真草地hia,犹bē到八堵。看阮三个gín-á三只狗，着惊问：「钦a,啥代志？…ah恁pâ,恁母a leh？」紧kā阮giú入去厝内，青青cho̍h-cho̍h吩咐：钦a,转 去会记得，kā恁老pē讲，台北有人来，讲国军teh beh来a｡」钦a讲：「大姑，in来beh狗死。阮狗寄你chia敢好？」大姑人大kho͘ koh大欉，比大姑丈koân半个头，一下tō一手抱乌嘴ê,一手牵Hi-lo͘h kap三郎。In概成知影有危险，乖乖hō͘伊牵，拢无pūi｡

Hit暗来一大阵，来足chē,足chē…，m̄知来外chē｡规暗街á路lìn-lòng叫，车一台koh一台驶过，土脚会chùn,概成地动摇bē soah。又koh戒严a,我看会出来，因为阿pa kap阿母讲话用chhuh ê,窗á拢khàm起来，门mā chhòaⁿ ân-ân,用桌á脚tú leh。我kā阿母问，敢是国军来a｡伊气kah beh骂koh骂bē出来，紧张kah面á青青。灯火关掉，hiàm我去房间困，拢m̄通出来。害a,连房间也戒严，我困bē去。

外面pìn -piàng叫，chia一声，hia一声，连续几lōa声，bē输29暝放炮放bē soah。Hn̄g-hn̄g近近，有狗teh pūi,mā有人teh hoah，teh叫，teh hiu,teh哀…。我bih tī房间内看，阮阿pâ mā无困，bih tī窗á kîⁿ teh看。雄雄有人嚷足大声，概成teh起siáu,续落pòng一声，koh来3、4声，he声像刀á足lāi teh割，beh割破窗á,m̄是teh放炮，是tōaⁿ枪ê声。又koh再几lōa声，雄雄tiām chiuh-chiuh，连车ê声也无，人ê声也无…。近近一pha足光ê火ùi窗 á外chhiō入来，chhiō着阮阿母规身躯仆tī土脚爬，双手头壳mo͘h leh。Chhiō着阮阿pâ神神跪tī窗á脚，hia̍h-á phak tī壁，若柴佛á｡雄雄khiā起来，阮阿母双手kā伊一脚mo͘h leh，抱ân-ân,lám tiâu-tiâu,据在伊拖也m̄放，伊m̄ hō͘伊出去。外面teh狗，我知影，in beh拢总hō͘死，因为七堵ê人siuⁿ过sēng狗。…我惊暗，tèⁿ无听ê,tèⁿ无看ê,家己胸á坎lám leh，若像 mo͘h乌嘴ê,mo͘h足ân,据在in拖mā m̄放伊去。

这暗，七堵死真chē狗，人死koh khah chē,…加真chē｡进a有亲目看着，阮阿母拢m̄讲，m̄-kú我知影。几lōa冬了后，我kap进a拢总知影。钦a m̄是kòng死tō是刀 á tu̍h ê,死tī厝内桌á脚。庄长清溪a kap in某含笑，枪tōaⁿ tī头壳kap面里，tú-tú好死tī in tau门脚口。进a有听in pâ teh kā in母a讲，阮阿pâ有kā伊偷讲，hit暗，tī窗á后亲目看着，含笑跪tī土脚，kā in求足久，3个kòng狗ê gia̍h枪围tī hia,piàng …piàng …piàng ……是m̄是因为in chhōe无Hi-lo͘h ê关系？阮chhōa Hi-lo͘h去bih。
Chit-má我有确定，进a mā有确定，hit几日，七堵thâi人kâp thâi狗无关系。Ah，阮七堵这个庄脚小所在，亲像和平、永远、清天…，in无饲狗mā是死；金兰a,我进前讲过ê,狗已经早tō牵去派出所a,mā是死；又koh阮七堵ê美人秋月，伊电头毛āiⁿ红婴á,mā是死tī水窟á边，几lōa日无人看着。…Hit个时代，代志真乱，可惜阮作gín-á人误会真久真深。终其尾a,认真kā想起来，che thâi人kap thâi狗无关系。不过，不而过，有时我犹会bóng去kā想，敢无hahN？敢成实拢无hahN？因为事实thâi人kap thâi狗真相仝。原在，七堵ê人疼狗、m̄甘狗，到taⁿ in犹有相信，狗á有灵，比人khah有情义。

注：多谢乌嘴ê kap阿财同意我用in ê名。乌嘴ê是台湾土hong á,阿财是Ho-lan猎狗 （Deutch hound），拢tòa tī高雄。