《陈雷文选》

 | | | 转寄

美丽ê樟脑林

作者 陈雷 2006.02.19

一
Hit个乌肥ê阿泽是研究森林ê人。台大毕业作兵了，hō͘人派去阿里山森林管理实验场作管理员。伊人tiau直，kap人koh好作伙，lak袋á若有几kho͘银，tō招人去食kap lim，开了了。Hit个樟脑林管理组ê下底，有五、六个退伍兵老芋á，伊mā常常请in去食。特别是hit个白ê，食了知滋味，看伊领钱ê日tō来招伊，若像是伊ê好兄弟。看tio̍h伊，tō笑hi hi；肩胛头kā搭leh，叫伊「老郭」。

In几个常常去食ê，tō是实验场山脚一间叫作日月阁ê小菜店。Hit个日月阁tú好tī林场落去bē到半点钟ê山路弯过去ê所在，kap一间新春旅社、一间kám á店作伙。日头beh落山ê时阵，四、五个tō落来，对tio̍h西照日ná走ná唱歌。Hit个秃头赵ê对日月阁ê小姐秀鸾上有意思，lóng走tī头前，先入去店内面chhōe秀鸾lô-so。Hit个白ê爱食，对阿泽tòe tiâu tiâu，笑话kap粗话一直讲。

「…我家乡的姑娘呀…老郭…意思就不同…」想beh hōaⁿ郭ê肩头…m̄-koh白ê人é，才五尺koân，hōaⁿ bē好势，山路koh落kiā，差一sut á poa̍h倒。

菜店ê头家娘看in来，hâ一条花裙来迎接。搬椅á出来，大声叫：「秀鸾a！」

菜店内面清清无别人，两pha电火暗sàm暗sàm，内面秀鸾有听tio̍h头家娘teh叫，拖一双木屐摇leh摇leh出来…he秀鸾看起来mā khah无二十岁，身躯肥水a肥水，面圆圆，无抹胭脂mā是bái súi a bái súi…hit个赵ê上盖爱秀鸾ê肩胛头，伊若穿无手ńg ê衫，两个肩胛头白白、圆圆、幼幼，赵ê手tō食豆腐，chia摸hia摸，不sù鬼。

Hit个秀鸾是山里出来ê，鼻koân koân，目睭lô lô，酒koh上gâu lim。伊对赵ê无啥物特别ê sa-bi-suh，m̄-koh对乌肥ê阿泽上盖亲切。阿泽若lim无了ê bí-luh，伊khah chē mā替伊lim去，这点赵ê心肝内上bē爽快。

M̄-koh今á日大家酒lóng lim kah足欢喜。菜出无一半赵ê tō开始teh醉，叫秀鸾「我ê亲亲心肝…」，chia摸hia摸，桌á顶ê bi-luh chhia chhia倒…。白ê kap另外一个陈工友beh lim酒，专门食菜，两个人半只白切鸡食了了。头家娘看阿泽无啥lim酒，phâng一尾红烧鲫á鱼kap一干高梁，来kā伊灌酒。

「今天呀，我说呀，老郭…，咱老赵害的是呀…不得了的相思病加上乡思病…」

Hit个白ê gia̍h一双箸，指伊ê面讲…赵ê醉醉，听tio̍h白ê讲啥物相思病、乡思病，一双箸tòa伊面头前指来指去。Soah一时认真起来，想tio̍h今á日食老a，山东ê故乡kap伊ê某几十年lóng无消息…soah beh哭beh哭，坐tòa椅á顶，目睭gōng-gōng一直看秀鸾，若像雄雄khong去án-ne。

五个人食了转来ê时阵，月娘已经出来真koân ah。规个山路hō͘月光照kah青青白白，像溪水洗过án-ne。赵ê hō͘陈工友半拖半行，沿路吐两摆才转来到宿舍。

二 隔转日天iáu未光，阿泽tō起来。伊上爱一个人透早行山路。He林场ê山路tī日头出来以前lóng tah雾，有时像tī云海内面。阿泽上爱一个人走去山路上koân ê所在，等日头按山后壁出来。He peh起来ê日头bih tī雾ê后面，若像电火照tio̍h báng tà。山内ê水气像云án-ne飞出来，树林内几lōa种ê芳味若像花teh开。

等伊行来到东旁ê林场ê时阵，天已经足光。He东旁ê林场是一片足大ê樟脑林，一直透到三脚山ê后壁去。而且lú入去，he树林lú老。Tī三脚山有足chē大樟脑树，看起来差不多lóng有一、二百年以上。

He樟脑树叶á顶khoân一iân薄薄ê霜，hō͘日头照leh tō无去a。叶á顶青青青，像玉á ê面。阿泽看he细欉樟脑树ê芽、puh kah chiâu chiâu是，tō tòa簿á顶作一个记号，koh鼻hit个叶á puh出来ê味、koh tòa簿á顶拍一个圆kho͘ á。

Án-ne无êng kah二点外钟，才lóng总检查了。看起来这片新ê樟脑林状况真好，伊才离开hit个所在。M̄-koh心内挂意三脚山ê樟脑林，bē放心。因为二礼拜前，tī hia若像有人偷chhò柴。伊走入小山路，行beh一点钟，才来到三脚山。

山脚近小路所在ê樟脑林已经hō͘人chhò一片光光，iáu有一kóa大树倒tī hia，iáu未搬走。阿泽看看leh，chhò去ê所在大概有二十几甲，确定是有人teh偷林。详细ê状况记tòa簿á内，赶紧沿路走转来实验所。

伊决定beh作一个报告，kā偷林ê代志正式报告hō͘阎所长知。叫白ê马上the̍h报告纸来，详详细细tò teh填写。Hit个白ê看伊teh写报告，七问八问，知影是三脚山ê代志hō͘伊发现，赶紧来赵ê宿舍kā伊通知。赵ê听一下惊一tiô，昨暝ê酒lóng醒了了。想讲这个新来ê台湾少年人，平时hō͘伊食秀鸾ê醋，chit-má koh m̄知天地几斤重，beh作报告，拍pháiⁿ伊kap大家ê饭碗，实在无想办法kā修理bē sái。Hit暗tō去阎所长ê所在参详。

三
Pê龙船ê前一日，阿泽tī台北监狱内面透早tō hō͘人掠出去。两个sán猴兵á kā伊押出来监狱ê后壁埕。Hit阵tú好天beh光，天一旁乌ê，一旁微微á红hóa红hóa｡阿泽thǹg赤脚，踏tio̍h露水lóng会冷。Hit两个sán猴兵á，一旁一个，kā伊押来壁边khiā leh。He埕一片足大，koh无啥物物件，kan-taⁿ一枝thiâu á tī中央，过一目nih á，koh一队兵á出来，lóng戴帽á phāiⁿ枪，chàm脚步来到埕ê中央。兵á队ê后壁tòe一个穿白衫ê人。Hit个人看起来koh少年少年，kap阿泽beh仝旁岁，剃光头，双手也无pa̍k leh。

等伊行到thiāu á前khiā好，有一个人hoah号令，he声koân kah ló-ló长，若像狗teh吹风螺。「准备！…」「瞄…准…！」，「开枪！…」。Hit六个兵á khiā直直，枪gia̍h起来tō kā弹落去。阿泽听he枪声pin-pin pòng-pòng，目睭liap leh，hit个犯人tō倒落去，身躯tòa土脚chùn两下，tō死去a，无koh tín动。

Hit两个兵á笑leh笑leh，koh kā阿泽押入来监狱内面。Hit阵tú好天khah光a，监狱内ê走廊一步一步有看leh行。阿泽ná行ná想，hit个枪杀ê是啥物人？

续leh hō͘人chhōa入来一间细细间ê房间，四个lah-sap ê壁kap一tè桌á。一个大kho͘有猪哥嘴ê外省刑事坐tī hia teh等伊。阿泽看hit个猪哥嘴ê，脚手软一半。伊会记得顶礼拜tō是这位猪哥嘴ê kā伊修理，规身躯hō͘伊用拐á kòng kah肿歪歪，bē tín动。

M̄-koh hit个刑事今á日手里koh无拐á，kan-taⁿ坐tī hia笑leh笑leh。才khiā起来讲：「他叫王金水，其实是王金水第二，上个月也有一个王金水。…他妈的！你门台湾人，连名字都不像样！这个金水，那个金水，都是他妈的金水…」

「今天这个金水，跟你他妈的一样，不合作…告诉你这臭小子，别跟我耍本事…在这里，你就是死了十次也无有人理，神不知，鬼不觉。基隆港里有少他妈的金水？！…」

伊指桌á顶ê几张宣传单hō͘阿泽看，lóng是阿共á骂国民党kap老蒋ê话，大字细字印kah清清楚楚！阿泽看一下惊一tiô，看tio̍h鬼！讲是tī伊ê宿舍chhōe出来ê。

Hit个刑事问伊传单是án-chóaⁿ来ê，是啥物人hō͘伊ê？阿泽照实讲m̄知。问来问去，连一个名to无。起gê siâu，khiā起来。一个兵á kā阿泽ê ām-kún chhui tiâu leh，另外一个手骨掠leh，一枝红红ê射tō kā注落。阿泽感觉伊ê手ê肉若像十枝刀teh割，痛kah哀bē出来。续leh头壳若像火teh烧，像beh爆破；天地倒péng转，beh吐吐bē出来。Án-ne差不多beh kah十分钟，才痛kah晕去。

Hit两个兵á，一个gia̍h头，一个gia̍h脚，才kā伊kng去来桌á顶，像一只死猪á倒tī hia。用一桶冷ki ki ê水按头壳châng落去。Hit个阿泽才小khóa精神，两蕾目睭开起来，tō koh晕去，m̄知人。Hit个兵á牵一条电线，pa̍k tòa伊ê脚ê大头母。通一个电，阿泽ê身躯tō chùn一下，精神过来。猪哥嘴ê大声嚷：「快说！他妈的，这单子是谁拿给你的？…」

阿泽头壳gông kah乌天暗地，想beh讲mā讲bē出来。

「他妈的不讲！」

「M̄知影。」又koh晕去。Hit个顾脚ê兵á，电tō koh kā通落，阿泽ê身躯大力chùn一下，koh醒起来。Án-ne问来问去，刑beh kah一点钟，khah讲mā是m̄知。猪哥嘴ê知影无khah choa̍h，叫兵á kng入去，准soah。

Án-ne头尾刑beh kah四礼拜，无啥物新资料，khah讲mā是m̄知影。Hit个猪哥嘴ê，人叫伊崔情报长，心内mā知，若用药á问bē出来，tō是无法度a。M̄-kú koh m̄甘愿，叫he兵á有tiang时tō kā刑一遍，修理修理。Hit个阿泽，本来人乌肥乌肥，爱讲笑，hō͘ in刑kah一kho͘人若死ê，bē讲bē笑。规日倒tī土脚，头壳mo͘h leh，若像teh发童乩。

四
Koh三个月后，阿泽才hō͘人判刑。讲是共产份子，判五年有期徒刑。Hit个赵ê告密检举有功，赏金五千，白ê赏三千。阿泽坐监iáu未一年，hit片三脚山美丽ê百年樟脑林tō hō͘人chhò了了去a。

(这篇是陈雷ê第一篇台语小说，1986年写ê。原文刊tī陈芳明主编、tī美国加州出版ê “台湾文化”)