《胡文池牧师kap布农族》

 | | | 转寄

寡妇ê独子死去

作者 胡文池 2009.08.30

潘姓青年出世tī富裕家庭，身躯强壮，脑筋灵活，小学成绩相当bē-bái，初中毕业了后，以优良成绩考tiâu师范学校，成做小学教员。父亲是牙医师，当教会长老，母亲是助产士，mā热心信主。 Chit种ê身世，伊若按照基督教信仰来生活，安份守己，前途一定是光明灿烂。可惜，伊变成一个酒徒，自毁前途，bōe-sái成家立业， Tī三十岁ê英年就早逝了，这是何等悲惨ê事!原因何在?

一、小学不上主日学
伊ê性情外向á好动，自细汉ài sńg，加上家境富有，口袋不时有够额ê金钱，soah致使吸引真chē朋友，常常kap小鬼们chiah-ê猿群犬党tī外游sńg食乐。家庭信基督教，按照教规，儿童tī礼拜日tio̍h上主日学敬拜上帝，领受主ê教示。但是伊煞无听话，时常缺课，后来干脆m̄来主日学了。

伊ê父母溺爱独生kiáⁿ，in认为gín-á每日在学校读册辛苦，礼拜日hō͘伊轻松一下，sńg sńg，mā无算什么坏事，所以不勉强伊上主日学，任由伊kap一kóa非基督徒gín-á同齐sńg乐。

主日学是宗教教育ê门路，建立个人信仰ê基础，养成礼拜日歇下一切ê工，到教会敬拜主ê好习惯，mā是交往善良小朋友ê好地方，所以关系一生ê成功失败真大。

二、中学时代ê放荡
因伊既然tī小学时代无上教堂ê习惯，到了初中时代离开父母tī外求学时koh-khah自由放荡。Kap一kóa太保结交，siōng早学习pok薰、食槟榔，了后koh-khah会饮酒了。

因家庭富有，又koh是独子，有求必应，boeh jōa-chē钱就寄jōa-chē钱hō͘伊，任用不完。对伊来讲，教会是严肃、无聊ê地力，虽然父母是基督徒，伊煞无愿踏入教会一步，成做有名无实ê信徒。

三、酗酒ê教员
虽然中小学时代放荡sńg乐，因天生聪颖，犹原以优良成绩考tiâu师范学校。毕业了后回乡当教员。

Tī小学任教，伊ê薪水全部交iáu公卖局，买酒取乐。每工，伊ê办公桌顶必备米酒，下课时，以酒当茶饮。小学里有一位工友kap伊同有酗酒习惯，成做同趣之交，时常同饮欢乐。

虽然án-ne，因伊头脑好，教学认真mā独具风格，学校当局iáu是认为伊是一位好教员。

教了几年册，到了结婚年龄，却chhōe bē-tio̍h对象。因为基督教女子看tio̍h伊是酒鬼就退避三舍。无想beh koh进一步kap伊交往。

世界上女子虽多，伊煞chhōe bē-tio̍h配偶。

四、寡妇ê独子死去
伊ê父亲死去以了后，母子二人相依为命。但是母亲对chit-ê酗酒ê kiáⁿ儿大为失望。Tiāⁿ-tiāⁿ劝伊禁酒不听，不得不loh唆地，反覆地责骂伊，soah致使伊对母亲产生反感。

有一工，伊感觉四肢无力teh要倒地。去看医生时，病症已相当严重。医生偷偷á对伊母亲讲，伊患tio̍h肝硬化，tio̍h绝对禁酒。

母亲tńg去厝里看gín-á时，伊竟然iáu teh饮酒。因此真受气地骂伊boài命。伊m̄-nā不听话，反tńg恶言相对，回骂其母讲：「你太loh唆了，别人ê老母会死，你怎样iáu不死¨¨」等等话语，其母听了，大哭一场，伤心不堪。

无久，这寡妇ê独生kiáⁿ因肝硬化á死去，年龄只有三十岁，这是何等凄惨ê事，老实讲伊ê父母该负起大部分责任。

「教养孩童，hō͘伊行当行ê道，就是到老伊mā不偏离。」(箴言二十二：6)

五、伊ê小学同学成功了
胡姓gín-á kap伊同年龄，tī小学时mā是同班。因为母亲是主日学教员，gín-á每礼拜日早起必乖乖á来上主日学。

有一个礼拜日早起，胡妈妈煞无看tio̍h家己ê gín-á tī课堂里，等中昼gín-á tńg来食中餐时，chiah知影伊kap同学钓鱼去了。母亲非常受气，the̍h起竹鞭就将伊phah一顿。Kiáⁿ儿皮肉痛，母亲却痛tī心中，mā禁bē-tiâu流目屎。Chit-pái ê教示真有效，tùi-án-ni了后，gín-á死mā m̄敢tī主日学缺课了。养成每一个礼拜日参加主日礼拜ê好习惯，一生不改其乐。

胡姓gín-á到台东中学读册时，mā kap潘家独子tòa作伙一室，礼拜日招呼伊同到教会，伊煞无愿，因为伊认为一礼拜中礼拜日to̍h是游sńg ê好日子。

胡姓gín-á遵守安息日，mā规规矩矩认真读册，成绩bē-bái，由小学、中学、大学，致使留学美国，得tio̍h化学博士，电脑硕士学位。成功地当大学教授。

潘姓、胡姓二个gín-á ê失败kap成功，在tī人生开始ê第一步---主日学时代已经决定了。

「不忍用杖phah kiáⁿ儿ê，是恨恶伊。疼爱kiáⁿ儿ê，随时管教。」(箴言十三：24)