《林茂生博士论文》

 | | | 转寄

第二章 背景概况

作者 林茂生着（英文） 林咏梅华译 林俊育台译 2017.08.27

一）地理背景
1）岛屿名称ê由来
福尔摩沙chit-ê名称，chit-má却被日本人kah中国人普遍地称做「台湾」，是葡萄牙文「美丽」ê意思。Tī十六世纪，chit-ê岛屿iáu未被欧洲ê航海者所知影ê时chūn，葡萄牙人偶然地航行经过chit-ê岛屿ê西海岸，hō͘ 她ê美丽惊一tiô，soah kā她称做“Ilha Formosa"「美丽岛」。一位hō͘ 葡萄牙人雇用ê荷兰航海官，名叫作霖卓敦（Linchotten），就tī伊ê航行图上án-ne标记chit-ê岛屿ê名称，福尔摩沙chit-ê名称就án-ne tī欧洲ê书籍上，hiah-ni̍h好听，koh hiah-ni̍h适合来取代其它ê名（注：1）。
2）位置
台湾大约是东北向西南ê行向，位置tī北纬20度15分到20度55分之间（注：2），东西跨越东经120度到122度之间。往南行有菲律宾群岛，她ê北端ê恩干约角（Cape Engano）距离台湾ê siōng南端有225英里，她ê首都马尼拉距离台湾有390英里。东北方向有琉球群岛，这是去日本ê踏脚石，日本本土siōng南端ê岛屿叫作鹿儿岛，kah台湾北部港口ê基隆，相距660英里。向西约100英里是中国大陆，两者之间有澎湖群岛（注：3），距台湾海岸chiah 20英里。向东则是一望无际ê太平洋，直到夏威夷群岛相距四千英里，一屑á都无阻隔（注：4）。
3）土地
台湾kah日本类似，有山脉纵贯南北，kā chit-ê岛分做两半，东部kah西部（注：5）。Chiah-ê山脉形成浓密ê树林kho͘-á，山峰lóng tī 7,000尺到将近15,000尺之间。Siōng kôan ê两个山峰，一个是Mo͘nt Morrison，日本人kā它改称做「新高山」，有14,270尺（注：6），另外一个是Mo͘nt Selvia，日本人kā它称做「雪山」，有12,480尺。山脉区差不多集中tī东部直到东海岸，hia-ê坑khàm根据估计总共有6,000尺，面对海洋形成垂直ê绝壁。这是世界上siōng kôan ê海岸绝壁。Tī崎岖ê山区，是台湾已经知影ê siōng古老ê住民ê kiáⁿ孙—mā to̍h是原始山地住民ê家园。Tī西半部，真chē hō͘ 山谷所贯穿ê斜坡伸长到海，形成起伏无停ê大平原，tī chiah-ê平原顶面，荷兰、中国kah现今日本ê旗á续接飘扬（注：7）。Chit-ê西海岸有港口kah沙滩，文明就án-ne进入岛屿，并向东部扩散，行入ê里程碑to̍h是开垦ê田园kah人丁旺盛ê庄头（注：8）。万峦山区以西有一个黏土山丘地带，koh再往西行，to̍h是tùi北到南一片真阔ê冲积平原，有真chē水道穿流tī它ê间，直到沙滩kah长长ê泥沼（nî-chiáu），kui个沿海ê景象kah东海岸ê岩壁形成显明ê对照。西部ê土地继续向海伸长，当然是山顶ê土因为水流冲积落来所形成ê，尤其是tī雨季ê时，山区真chē所在差不多无法度行（注：9）。
4）气候
台湾是一烧热带地区。北回归线约tùi其中间穿过去，因为án-ne，南部完全tī热带kho͘-á里。若是因为án-ne来认为chit-ê岛屿kui年享受热天，án-ne to̍h m̄-tio̍h去à。事实并m̄是án-ne，春天tùi三月开始到五月底，气温非常温和；热天tùi六月初到九月中；十月kah十一月to̍h kah-ná中国kah日本ê「小春」，是kui年中siōng爽快ê月份。Tī北部，雨季lóng tùi九月开始，连续20天á是30天落sap-sap-á雨；tī南部，雨季通常tùi热天开始，所以，会带来凉风，hō͘ 炎热降温。虽然雨季是bē hō͘人爽快，m̄-koh，chit-ê岛屿ê生产力大部分是依赖它。Án-ne hō͘ 菜蔬茂盛 ，树木kui年生长，花一年四季lóng开（注：10）。 总是，kui个看起来，chia ê气候，特别是对hiah-ê非土生土长ê人，是非常oh得忍受ê，因为不时tâm湿，炎热有瘴气。温度真少升kôan到华氏一百度，准讲是tī温和ê气温里，普遍ê tâm湿mā hō͘人失去活力（注：11）。 离台湾南端无远ê海面是真chē风台ê发祥地，m̄-koh，岛屿顶面ê高山成做抵挡强烈风台ê屏障（注：12）。
5）自然资源kah它ê经济价值
台湾ê物产丰富是tùi大陆招引移民ê吸（khip）石，chit-ê岛屿对真chē农作物lóng thang适应，有时hông称做中国ê谷仓。因为日本gâu ê企业管理，各方面lóng大有进步，m̄-nā主要作物收成量增加，每一种作物ê品质标准mā提高。1923年农作物ê总生产量，值日币192,939,416圆，虽然，1928年ê数字iáu bē-tàng得tio̍h，若是用2亿5千万元当做新数字并无夸大（注：13）。 米、糖、茶、蕃薯、青豆、四季豆、大麦kah小麦、黄麻、重青(染料）、烟草、果子kah菜蔬lóng是主要产物。米ê生产，经历真大ê改变，tī真chē地区，一年三作代替两作。1923年，米ê总生产额，值日币8,500万圆（注：14）。 糖ê生产受tio̍h政府ê鼓励kah补助；因为继续无放轻松ê努力，1922到1923年chit季ê收成约40万吨；根据最近ê估计，1928年会有50万吨。有以上数字ê成果，是因为tùi夏威夷kah爪哇引进真chē品种，koh kā它密集ê开发kah实验，并kā khah优良ê甘蔗种，免费分配hō͘ 蔗农（注：15）。 第三种重要ê农作物是茶。台湾ê乌龙茶，根据最近ê统计，总生产额为2,000万斤，它ê输出额值日币900万圆。Chit-má对茶园ê发展特别重视，tī茶ê生产方面，美国收购（kò͘）台湾茶总生产量ê一半。 台湾有真chē有价值ê矿产，1923年合计日币1,291万圆。M̄-koh，这并无包括金、铜kah煤ê开采，因为岛上chiah-ê矿物ê开采iáu tī未开发ê阶段。 Hia有广大koh壮观ê树林地带，拥有ê树木，种类ê chē会hō͘人tio̍h惊。渔业已经仝款推sak入去à，1923年渔产ê总值为日币14,273,730圆。 台湾是樟脑有名ê出产地，占世界总产量ê主要部分。樟脑ê需求量真koân，tī 1924年，樟脑输出岛外包括日本，总额值日币1,117,000圆（注：16）。 以上所举每一个例lóng有明显ê开发，当然是会继续进展，因为chit块土地ê资源真少开发过。以上数字ē-tàng显示，日本占领后，台湾地位ê重要。1899年，台湾出口kah进口ê总值日币3,100万元，m̄-koh到1923年，chit-ê数字膨胀到日币3亿8,000万圆。Tī日本统治之下，收入kah支出真明显增加。日本统治后ê前十年，每一年日本补助台湾政府将近日币100万圆，m̄-koh，过去二十四年，殖民地对帝国国库年年有贡献（注：17）。Chit-má（1929年）ê收入kah支出ê数目大约是日币一亿圆（注：18）。
6）面积kah人口
根据siōng新ê地图研究，台湾ê面积有13,889平方英里（注：19），等于麻省（Massachusetts）kah康州（Connecticut）合起来ê面积（注：20），á是kah九州仝款大细；九州是日本帝国本土ê四大岛中siōng南ê岛。台湾ê形状是长鸡卵形，而且南端成做尖形ê to̍h是鹅銮鼻。Chit-ê岛屿，tùi一头到另外一头ê直线距离有264英里，m̄-koh，任何实际ê路tùi南到北约350英里；它siōng阔ê所在是80英里（注：21）。 人口包括10万名原住民，虽然无gōa确定伊ê种族构成，mā可能是马来人，189,630名日本人，383万8,636名汉人，kah 3万3千名外国人（注：22）。下底ê数字会明确显示，chit-ê岛屿kah两个欧洲独立ê国家，tī面积kah人口上ê比较。In显示chit-ê岛屿比chit两个国家细一点á，人口却超越in。
面积 （平方英里） 丹麦 16,604 瑞士 15,940 台湾 13,841
人口 台湾 4,161,206 瑞士 3,880,320（1924年估算） 丹麦 3,419,656（1925年估算）
7）住民
Kah顶面仝款所述，根据最近人口普查，台湾住民已经超过400万人，其中包括四种成员，就是日本人、当地汉人、原住民kah外国人。 日本人kan-taⁿ占全人口ê百分之五，in大部分khiā tī khah高阶层，像讲政府官员、银行家、企业家、律师、教员、seng-lí人kah警察，这以外mā有少数ê作穑人、劳工kah讨海人。所以差不多tī社会每一个阶层，in lóng是领导者。In ê传统、习惯、礼仪等等，换句话讲，in ê文化kah日本本土ê同胞完全仝款。 当地ê汉人是岛上siōng大ê族群，差不多占人口ê百分之九十五。其中五分之四ê人叫做「福佬」，是来自厦门kah她附近地区ê移民kiáⁿ孙，讲hit所在ê方言。其他五分之一ê人是「客家」，tùi汕头kah广东地区来ê；in中间个百分之六十是作穑人（注：23），其他是地主、seng-lí人kah劳工，属tī中下阶级。Tī台湾当地ê汉人，lóng保留in tī中国本土ê亲族记号，保持仝款ê传统、习惯、家庭制度、文献kah宗教；换句话来讲，保留中国本土ê文化。 根据in ê方言（注：24）以及来自福建地区，福佬人thang分做四群人，是厦门、泉州、漳州kah漳浦。有kóa作者称in为「闽南人」。大部分ê客家人á是粤人lóng来自广东省移民ê kiáⁿ孙（注：25）。客家人tī动乱时期，tī中国南方四界迁徙，终其尾离开大陆惨淡koh受压迫ê生活，tī台湾安居落来。In真勤奋koh ē-tàng食苦耐劳。这说明án怎讲会in大多数是勤劳ê作穑人，福佬人却大部分tī城内经商。客家妇女遵守先人ê习惯，kah丈夫tī田里工作，因为án-ne，in无缚脚。反tńg来看，福佬妇女却固守中国南方时行（kiâⁿ）ê古老ê习惯。当in ê丈夫出外tī田里工作，in因为缚脚（注：26）留tī厝里做家事。客家人因为有硬颔颈ê精神，成功ê机会chē，福佬人却无lóng án-ne。 客家人ê坚持kah 福佬人ê冒险精神合成一股有价值ê进取力量，因为前者勤奋，后者有创业能力。今á日to̍h是chiah-ê性格kā chiah-ê人带领离开中国。Chit种人会出现tī法属印度支那kah暹罗；in tī马来联邦mā是主要ê力量，特别是tī新加坡，in是名商；in出现tī爪哇mā仝款，tī hia in属tī富商阶级；其实ē-tàng án-ne讲，in散布tī kui个南洋群岛上。Tī台湾土生土长ê汉人to̍h是chit阶级ê人，用仝款无畏ê勇气横渡危险ê台湾海峡，soah成做台湾ê开拓者。 头前已经叙述过，tī台湾ê汉人kah中国本土ê汉人仝款，沿袭仝款ê文化，m̄-koh tī chia一定tio̍h对语言附带讲几句话。咱一定tio̍h记tiâu，书写语言，tī台湾kah kui个中国本土ê每一个所在是一致ê，m̄-koh，口语to̍h有差别。文字是固定ê，而且所标识ê意义对所有ê汉人来讲是仝款ê，m̄-koh，文字ê发音就tòe中国省分ê无仝有差别。这以外，tī台湾kah tī华南ê真chē地方仝款，实际上需要学习两种语言；一个是口语ê á是会话用ê，一个是读音ê。譬喻讲，台湾kah厦门ê口语仝款，「人」字，读音发音为“jîn” á是“lîn”，口语发音做“lâng”。汉文无名词、代名词、形容词ê语尾变化、á是动词变化；这是典型ê「孤立语言」。名词、代名词、形容词ê语尾变化，á是动词变化，tī汉语（文）里chhōe bē-tio̍h相当ê对应，m̄-koh，音调ê变化往往以「声」来表示，台湾á是厦门ê语言有八声（注：27）。一个台湾字，外国人听起来，kan-taⁿ是一个音，m̄-koh，因为声调ê差别，可能表示八个以上ê事物ê其中之一，chiah-ê声调是真有音乐感ê。仝款ê子音kah母音ê组合，thang用高促、高缓、低缓、低升、高降ê「声」á是八声中任何一声来发音。每一声代表一个字，而且chit-ê字真清楚指示一个特别ê意思（注：28）。 组成台湾人口ê第三种成员是原住民，有关原住民ê一切真少人知，而且in之间互相ê关系koh khah是无清楚（注：29）。有一kóa人认为是马来人kah南洋ê小乌人á是琉球人混血ê kiáⁿ孙；另外有人相信，仝款是纯马来人ê kiáⁿ孙，东到台湾，西到马达加斯加岛，亲像扇状分布各地。根据第三个理论，台湾原住民kah中国ê土着苗族，是仝一个渊源（注：30）。无论án怎，这是无thang怀疑ê，早tī史前时期，真chē族群ê祖先，大部分来自附近南部ê马来亚岛屿，有一kóa来自亚洲大陆，有kóa来自琉球群岛，因为tī海上tú-tio̍h意料bē到ê风台，soah来到台湾岛上避难。因为生活条件真好，而且中央山脉ē-tàng抵挡强风，in就tī chit-ê岛上永久安居落来。 几世纪以来，chiah-ê岛上ê原住民杂居做伙，teh过原始ê生活，从来m̄-bat被外界侵入搅扰kah众人知。照记载，大约tī 1430年以后，早期汉人渡过海峡，tī台湾岛ê西海岸登陆，to̍h发见有真chē原住民ê部族。Tāi先接触ê部族hông称做「平埔蕃」（平原ê野人）。In ê土地渐渐被强夺，并hông驱逐往东到山脉ê山脚，山脉是chit-ê岛屿ê主干。Chiah-ê平埔番tī历史ê演变中，chē少受tio̍h文明ê洗礼，siōng早来自荷兰人，然后来自汉人，最近来自日本人。In讲汉语，大部分穿chhah mā亲像汉人。Koh讲，in ê宗教仪式效法汉人，m̄-koh，in犹原保留真chē原来ê观念kah习惯。真chē部族ê家庭制度是母系社会，这kah中国ê家庭制度tú-tú倒péng。汉人bat做进一步ê分类，kā以上所有部族称做「熟蕃」（「煮熟ê」á是驯服ê野蛮人），来区别〔生蕃」（「生ê」á是未驯服ê野蛮人），生蕃khiā起tī深山kah南部（注：31）。 东部地区未开化ê原住民，m̄承认统治当局，而且时常借机突袭。In分做真chē族、群，in有无仝ê语言kah方言，koh保持in独立kah古老ê生活习惯、制度，像讲身躯ê装饰á是毁伤、纹面、猎取人头、神灵kah自然崇拜等等。Chiah-ê原住民被描述做非常勇敢koh结实，in利用有闲ê时chūn练习奔走。真chē人ē-tàng一工走100英里，kah-ná马hiah紧。In脚底ê皮肤无比ê tēng koh厚，准讲踏tio̍h刺phè mā bē伤痛。Cha-po͘人差不多全身赤theh，cha-bó͘人to̍h用草编成ê裙遮身（注：32）。In所tòa ê村落，厝是用石头叠（thia̍p）起来ê，厝顶用石板盖leh，是非常清气koh整齐。小型ê战争是真平常ê tāi-chì，m̄-nā tī汉人tòa ê边界，准讲kah近邻ê无仝阶级之间，mā常常发生；被phut ê人头当做战利品保存起来。Tī有kóa地区ê少年cha-po͘人kah cha-po͘ gín-á就困tī khǹg头骨ê房间，来激发in ê勇气。死人用坐ê姿势被埋葬tī伊临终ê眠床脚。Tī路上，cha-bó͘人tú-tio̍h年长ê人，á是阶级khah koân ê人， tio̍h行去路边，并要求tńg身，kha脊phiaⁿ ǹg in，一直到in完全行开。In无历（la̍h）日，当in看tio̍h幼草生出来，就断定春天已经到à，in就开始掖种。当种籽puh芽，in相信天公teh祝福in，in就停止互相争斗，而且从事比较khah平和ê工作来报答天公。In phah猎鹿á kah射鸟á，用兽皮kah羽毛做衫裤。In真正是siōng原始ê人群。15世纪末叶，汉人来à，in不得不放弃肥ê低地，逃入去山区，远离侵入者（注：33）。真chē kah汉人接触ê部族就显示真chē文明ê技能（注：34）。 Beh结束以前，一定tio̍h提起ê是人口中间ê第四个成员—外国人。根据1926年ê人口普查（注：35），外国人ê人数是3万3千2百58人，chit阵人占总人口百分之一bē到。其中大部分是中华民国ê公民，其中无到200人是西洋人。Tī台湾ê中国公民，差不多全属tī劳动阶级，只有少数经商á是做小买卖。讲tio̍h chit小数目ê西洋人，大部分是传教士kah in ê家眷，加上几位贸易商kah seng-lí人。传教士除外，整体讲起来，tī台湾ê外国人影响力是非常微小，为tio̍h beh显得完整，chiah kā in包括在内。
台湾ê住民（注：36） 有日本人、汉人（福佬kah客家）、 原住民（蕃人，有生蕃（泰雅族、布农族、邹族、赛夏族、排湾族、卑南族、阿美族）kah平埔蕃（熟蕃）。
8）政治kah经济现况
日本人占领台湾后ê前24年内，司法制度kah经济结构，以及教育制度ê建立方式，kah日本本土ê对等机构真无相仝。这是当初制立政策ê时，对台湾本土固有ê习惯kā它做某种程度ê承认。 总是，1919年以后，因为日本人ê人数增加，日本人社会kah经济ê影响相对增加，koh因为日本人ê台湾资本化ê发展，chit-ê岛屿已经kah日本本土处tī仝款经济kah文化制度ê范围里。亲像司法制度包括民法kah刑法，已经是日本现有ê制度ê延长。 讲tio̍h政治制度，台湾iáu-koh处tī一个特殊ê地位，受统治ê方式kah日本本土真无相仝。 虽然tī 1921年，tī台湾公布ê法律kah法令，基本上kah日本ê仝款，m̄-koh，总督tī立法kah行政上iáu-koh保留非常独裁ê权力。Tī 1921年新近成立总督府评议会，是siōng kôan ê顾问机构。Chit-ê机构是为tio̍h岛上要求谘商ê种种问题，提出民意。M̄-koh，这根本m̄是民意代表ê立法机构，而且kan-taⁿ是一顾问机构，评议会ê评议员koh是由政府提名ê（注：37）。Koh khah严重ê，评议会ê开会lóng是由总督召开，而且由伊决定议题。 虽然地方行政已经重新组织—有关chit点以下会详细讨论—地方ê政治制度已经修改kah亲像日本ê本土，m̄-koh iáu-koh存在大koh重要ê cheng差。比论讲，各市kah州ê首长以及各庄社ê主管lóng由政府指派。Tī日本本土就由人民选举来产生。地方ê协议会成员仝款由政府任命，因为án-ne，像日本本土ê民意代表机构真明显并无存在tī台湾。 一想tio̍h维持和平kah秩序ê机关ê时，值得特别提ê是「保甲」制度，这tī日本本土mā无存在。「保甲」制度原本来是一个自治ê组织，由中国宋朝ê时一位名政治家设计ê，真正tī台湾实行是清朝ê时chūn。日本政府因为欣赏它ê功效，采用chit-ê制度，并无做必要ê修改。 「保甲」制度是由「保」、「甲」两部分合成得来ê名称。十户组成一「甲」，而十「甲」组成一「保」。chit两部分ê首脑是由各市、街kah座ê长老选举出来ê。 平常时in ê功能是维持和平kah秩序，并tī in各自区域内从事户口kah人口ê记录。Chia有一原则是每一成员对各「保」kah「甲」内发生ê tāi-chì，有共同连带责任。 虽然chit-ê制度ê理想是用民主ê方式去维持秩序，而且造福「保」kah「甲」ê成员，m̄-koh，因为tī政府警察当局ê控制之下，实际上它变成一般警察制度ê辅助机构。 自从日本统治初期，台湾ê工业政策to̍h被特别看重。尤其是tī 1919年以后，日本人对台湾经济发展ê影响koh khah明显。Tùi chit时开始，工业、企业ê数目kah投资ê总值紧捷（chia̍p）增加；投资tī chit-ê岛上ê大资本是日本人所有，kan-taⁿ少数ê台湾人参与投资tī几个公司。 亲像以前所述，农民占当地全人口ê百分之六十。大多数ê农民是佃农，tùi大地主á是制糖公司租地。因为in处tī不利ê经济地位，甚至自耕农mā渐渐失去in ê土地，hông迫成做佃农。 农民以外iáu有劳工阶级，in m̄是tī日本人ê工厂做工，to̍h是当技工á是临时工。 Chiah-ê农民kah工人ê经济状况并无真好，in ê人数加起来占全人口ê百分之八十。的确tī日本统治下，in每一个人所付出ê劳动kah in tùi田地kah劳动ê金钱收入增加，m̄-koh是因为跟tòe生活费提高，chiah-ê阶级ê经济福利并无相对ê提高。 一般来讲，咱发见tī台湾，农业kah劳工ê人口差不多形成台湾当地人ê全人口，而且日本人是掌握大部分ê商业kah工业事业。后者，经由in ê所有权以及控制主要ê工业kah金融机构，实际上掌握chit-ê岛屿ê经济性命。
二）历史背景
1）1600年以前ê台湾—原住民kah海贼时期
Tī纪元前几世纪以前，tāi先移民到台湾是来自东北方。Chiah-ê人hông称做「琅乔」（Lonkius），in控制chit-ê岛屿直到第六世纪ê后半叶，以后由来自南方ê几群马来人，kā chit-ê岛屿ê kui个西海岸控制à。 几世纪以来，chiah-ê马来人构成chit-ê岛屿ê永久人口，而且直到第十五、十六世纪kah外界无建立固定ê接触。 Tī第十六世纪，活跳tī中国沿海ê海贼kā台湾当做行动中心。Chiah-ê放浪ê海贼看情况来决定，mā经商mā抢夺。In中间有日本人kah汉人；前者ê大本营tī北部ê鸡笼（基隆），后者tī南部ê台员（台南）附近。Chiah-ê海贼seng-lí人ê出现，hō͘台湾tī hiah-ni̍h早期to̍h成做中国、日本kah南海附近岛屿之间ê商业交易所。 Tī仝一个时期，其他汉人因为中国大陆恶质状况所赶逐，koh被台湾土地之肥沃所吸引，成群结队涌进chit-ê岛屿；in是勤勉koh有活力ê移民；in处tī非常重要性ê地位，台湾ê海贼时期开始变成做农业时期。 一般来讲，1600年以前，台湾处tī khah混乱ê状况下，居民大部分lóng是原住民，in有tang时á kah已开化ê民族—主要是汉人kah日本人—有所接触。当时是一个无主人ê岛屿，而且chit-ê时期有关咱ê题目ê资料mā真少。除了hiah-ê原始社会所通行ê原始做法，欠缺有意识ê教育活动是明显ê。Tī chia值得提ê是，远tī三百年前，mā to̍h是tī十五世纪kah十六世纪，汉人kah日本人tī chit-ê岛上开始往来，尤其是tī台员地区ê seng-lí人，汉人kah日本人做厝边tòa做伙，而且无任何互相敌对ê形迹。*
2）荷兰时期（1600年到1661年）
几世纪ê混乱状态已经过去，tī hit期间，台湾是一个无统治者，若无to̍h是siuⁿ chē统治者ê岛屿，tī十七世纪前半叶由荷兰人占领。荷兰人一开始就强调商业殖民政策，来增进母国ê财富，荷兰人m̄-nā tī岛上kah日本人以及汉人交易，koh差派船只到中国以及日本直接kah两国通商。 关系内部ê行政，in用非常有远见ê态度，随时向原住民表示友好，荷兰人tī chit-ê岛上建立第一间学校。In发见hō͘原住民改信基督教，ē-tàng扩大in对原住民ê影响力kah商业往来。所以tī 1627年，台湾第一位传教师名叫甘狄士（Georgius Candidius），tī荷兰政府ê指派下，加入台湾南部ê荷兰公司，tī原住民部族中间从事宗教kah教育ê工作。到1645年，tī七个á是八个村落中设有学校，将近六百个男、女gín-á来读册，教授内容以记诵宗教册为主。这lóng是用原住民ê语言来教学，同时训练原住民教师来教导in家己ê族人。政府以供给学生米kah衫裤来支持帮助chit项教育工作。 虽然课程ê内容kah影响范围真有限，荷兰人tī教育上ê努力，的确hō͘原住民有书写in语言ê工具—罗马字，而且tī in ê社会习惯上造成一kóa进步。有证据显示以上ê智识（译按：指罗马字ê使用〉一代一代传授落去，直到十九世纪ê初期。
3）中国时期（1661年到1895年）
（1）国姓爷ê统治时期（1661年到1683年） 以上已经叙述过，台湾ê发展kah殖民化，是tùi荷兰人开始，in做chit-ê岛屿ê统治者约62年。M̄-koh，荷兰人多次kah汉族移民冲突，koh最后kah出名ê海贼国姓爷冲突ê结果，tī 1662年受逼撤退，国姓爷tī仝hit年，tī chit-ê岛上成做统治者。跟tòe荷兰人ê撤离，汉人随时紧捷（chia̍p）涌进chit-ê岛屿，这致使荷兰人带来ê西方宗教kah文明ê消灭。东方ê影响代替西方世界ê影响，而且汉民族文明注定beh改写台湾ê前途。 当明朝被满洲人推翻ê时，国姓爷希望tī chia建立一个独立ê国家，而且tī chia从事恢复明朝ê活动。伊原本来是一位活跳ê海贼，伊却证实家己是一位真gâu ê行政者；tī伊ê统治下，农业昌盛，而且社会秩序mā井然有序。 总是，tī chit项研究ê范围内，真显然，tī chit阶段是一屑á都无建树，咱一定tio̍h tńg到清朝统治ê时期，chiah ē-tàng tī台湾看tio̍h ē-sái讲是教育措施ê事务。 （2）清朝统治时期（1683年到1895年） Tī 1683年，清朝统治下ê中国tùi国姓爷ê孙á得tio̍h台湾ê时，m̄-nā无设立殖民政府，反tńg kā她变成中国本土ê一部分，而且kā它称做「台湾」，chit-ê名bat被荷兰人取用tī一个小岛，to̍h是现今ê安平；它而且成做福建省ê一部分。 Chit-ê岛上ê居民，tī chit时期包括三种无仝ê种类，to̍h是开化ê原住民、未开化ê原住民kah汉人。第一种类ê原住民，m̄-nā服从汉人，而且接受真chē in ê风俗，koh向汉人所认定ê文明迈进。第二种包括无受驯服kah独立ê部落以及村民，in kah平原ê原住民仝款，本来kah kui阵来到ê汉人争斗，汉人tùi西海岸kā in赶走，in就向内陆四散，用武力夺取in ê土地，koh逼in逃入山区。直到chit-má，chiah-ê「高山族」对汉人极端ê反感kah憎恶，而且只要chit两个民族一旦有接触，chit种情况mā会继续落去。 来自大陆ê汉人农业移民，进入台湾速度之紧，致使汉人人口tùi十八世纪中叶ê 150万，到1895年汉人政权结束时ê 300万。 汉人分做两种，广东来ê客家人kah主要来自福建ê「本地人」（Puntes）。Chit两种人之间ê争斗，tī大陆to̍h不时发生，来到台湾mā常常重现。 讲tio̍h tī台湾ê汉人教育行政，并无明显ê特点显出kah中国本土汉人教育ê差别，例外ê是：无和谐ê因素、地方ê骚动，kah远离中国本土ê政治隔离等等因素加起来，致使tī教育上beh khah强koh有力ê施政是困难ê。 中国政权kah荷兰人ê教育活动区别如下：（a）前者ê教育对象是汉人，其次chiah是原住民；荷兰人ê课程完全kan-taⁿ为tio̍h原住民。这是料想会到ê，chit时chūn汉人人口大大超过原住民。（b）汉人ê课程无论tī形式上á是在内容上lóng是东方式ê，对宗教事务lóng无考虑；荷兰人ê课程是西方式ê，并致力tī宗教教育。 总是，tùi以上两个情形看起来，两个政权lóng企图kā in各自ê民族特性，透过教育来好好á教训原住民。 台湾tī中国ê政权下，教育ê目的就kah中国本土仝款，主要是为学子准备科举考试，其次chiah教授日常生活所需要ê读、写。因为参加chiah-ê考试必须有汉文经册kah中国历史ê知识，所以无论是官办ê á是私办ê学校，学习ê课程kah教育活动就根据chit-ê方向来形成。 虽然tī中国ê教育制度，官办ê学校包括州、县kah初级ê学校，一看所谓官办学校ê名单以及入学ê学生，就ē-tàng肯定chiah-ê学校m̄是针对大众，而且事实上in对教育mā少有贡献。Kah中国本土仝款，教育tio̍h依赖私人办ê学校。 私人办ê学校，它ê目标在tī提供一般读kah写ê知识，á是为学子准备科举考试。后者往往留在学校（私塾）十年以上，in学习ê课程包括读中国经册，to̍h是四书、书法、作文kah作诗。 所有私塾ê教学方法lóng是个别教学，án-ne比较受tio̍h父母ê欢迎，因为in时常一定tio̍h kā gín-á带离学校。 Chia值得提ê是，无论是官办ê á是私办ê学校，lóng无提供妇女ê教育。 直到1875年，原住民ê教育工作kan-taⁿ限tī受荷兰人影响ê先人ê kiáⁿ孙。Tī hit年了后，中国开始对台湾有koh khah chē ê关注。Tī 1886年，台湾已经成做中国帝国ê一个省分了后，巡抚刘铭传试一个有趣味ê实验，就是为真chē部落族长ê kiáⁿ儿设立一间学校，这是向全体原住民传授中国文化kah习惯ê计划ê一部分。规定学生穿中国服，食中国饭；chit-ê教育措施ê一般目的是beh汉化原住民。食物kah书籍免费供给学生，来鼓励in继续求学。学习ê课程kah一般汉人私办ê学校类似，mā to̍h是读、写汉字为主要ê考虑。 （3）中国统治下由传教士输入ê西方教育 Tùi教育ê观点，tī台湾ê传教团体有权声言in是传授现代教育hō͘当地住民ê荣耀先行者。 当西班牙kah荷兰人tī台湾拚手尾ê hit段目nih-á久ê时期，西班牙传教士开始tī台湾北部工作。当西班牙tī 1642年被逐出ê时，in ê工作mā停止。 Tī 1850年，有两位西班牙道明会修士tī台湾南部tòa落来，而且tī高雄设立教会kah学校。Tī 1894年，建立一间女子学校kah孤儿院，训练汉人cha-bó͘-gín-á成做家庭主妇kah教员，另外一间学校是为tio̍h训练少年人tī教会当神职。后来chit两间学校到taⁿ iáu由西班牙传教团体teh主持，m̄-koh，对chit-ê岛上一般教育ê影响是真微小ê。 Tī中国统治ê期间，siōng现代化kah系统化ê教育工作，是由英国kah加拿大ê长老教会传教团体，各自tī chit-ê岛屿ê南半部kah北半部从事经营。 起先，前者kan-taⁿ训练少年人做牧师，m̄-koh tī 1885年，tī台南设立一间中学，科目内容有汉文、历史、地理、算术、天文学kah圣经。有教会ê庄头mā设有小学，由当地教会支持帮助ê汉人教员来教。一间女子学校mā设立，课程内容kah cha-po͘人中学仝款，有一间附属cha-bó͘-gín-á学院，是为tio̍h训练少年cha-bó͘-gín-á从事教会工作。 加拿大传教团体mā建立第一间神学院，接着有一间中学kah 女子学校，性质kah英国传教团体所办ê类似。 教会团体为台湾带来现代化教育，mā同时传播罗马字ê知识，这对bē晓读á是写汉字ê成年人，是方便ê学习工具。 Chit-má，日本人tī全岛建立现代化ê学校，这致使传教士tī教育方面ê工作无koh hō͘人所注目，m̄-koh过去五十年内，in对台湾人教育ê贡献是值得庆贺ê。
注释
（1）Chit-ê名m̄是第一个被南欧人使用ê例。Tī葡萄牙有一个庄头有仝款ê名，仝款，有一个tī阿根廷，另外一个tī巴西ê东海岸。Tī Benin（中译：贝陵，是tī非洲西海岸）有福尔摩沙海角，而且tī马来西亚有福尔摩沙山。葡萄牙人会取chit-ê名，无啥疑问是因为chit-ê岛屿hō͘ in想起in本国有仝款名ê庄头á是殖民地。M̄-koh，siōng早ê航海人，当in第一pái看tio̍h chit-ê美丽ê岛屿khiā-chhāi tī一片倦（siān）倦ê水色里，犹原禁bē-tiâu hoah：「美丽岛！美丽岛！」（"Ilha Formosa! Ilha Formosa!"）（见竹越与三郎，页103 kah Davidson, pp.9,10）。几世纪以来，中国人lóng认为台湾岛屿是琉球群岛ê一部分，tī历史文献kah地图上有无仝ê号名如「大琉球」・「小琉球」等等，见Davidson, p.2. （2）台湾siōng东pêng位置是tī东经122度6分15秒。首都台北，位置是北纬25度4分kah东经121度28分。彭佳屿（Agincourt）位置是tī北纬25度37分35秒，位置tī东京向西18度ê所在，chit-ê岛ê时间就比东京慢五十四分钟。 （3）澎湖群岛是「台湾」ê一部分，位置是tī西pêng，tī台湾kah大陆之间，kah台湾之间由一个海峡分开，水深只不过100寻（sîm）（fathoms）。一只船趁晚潮离开台湾，第二工早起就thang达到中国大陆ê港口。（见竹越与三郎，页103） （4）见Davidson, p.2. （5）见竹越与三郎，页106。 （6）「新高山」日文ê意思是「新ê siōng kôan ê山」，取代富士山成做日本帝国ê siōng kôan ê山峰。（译者按：新高山to̍h是玉山。） （7）见Davidson, p.2。 （8）见竹越与三郎，页106。 （9）见International Ene'clopedia, "Formosa." （10）见竹越与三郎，页111。 （11）见International Encyclopedia, "Formosa." （12）见International Encyclopedia,"Formosa." （13）见《进步中の台湾》，台湾总督府，台北，1926年，页48、49。 （14）同上，页49~50。 （15）同上，页50~51。 （16）关于茶、矿产资源、木村kah樟脑ê数字，见《进步中の台湾》，页52一71。 （17）见Hayden, p.475. （18）见《时事年鉴》，1929。 （19）见Encyclopedia International, Year Book, 1928. （20）见Hayden, p.474。 （21）见Davidson, p.1。 （22）见《时事年鉴》，1929，页629。 （23）见山川均，页5。 （24）方言ê差别真少，kan-taⁿ tī发音上有kóa无仝。 （25）根据一位法国人，名叫潘德（M. Pant）所写ê “Accounts of a Trip to the Hak-ka District in Kwangtung"，客家人原来khiā起tī广东嘉应州一带，m̄-koh，tī第八世纪ê时，in迁徙到同省ê其它地区kah福建、广西等地。（见竹越与三郎，页114・115） （26）自从第一次世界大战以后，受tio̍h中国本土ê改变kah日本教育ê影响，缚脚ê现象渐渐消失。 （27）实际上kan-taⁿ有七声。 （28）见Mackay, pp.102,103. （29）见International Encyclopedia,"Formosa.” （30）见竹越与三郎，页44。 （31）见International Encyclopedia,"Formosa” （32）见竹越与三郎，页48~49。 （33）见竹越与三郎，页48~49。 （34）见International Encyclopedia, “Formosa”。有关台湾ê原住民，马偕（Mackay）有一章写kah真详细，见 “From Far Formosa”, pp.205,267：Tùi我个人ê观察，我注意tio̍h台湾ê原住民kah北美洲ê印地安人，有惊人ê类似所在。M̄-nā男女ê体形kah相貌，连in ê生活习惯，kah北美洲ê印地安人真相近。M̄-koh，这是真oh tùi chiah-ê类似点下结论，chiah-ê类似点大大超过表面。咱对chiah-ê部落ê起源了解siuⁿ少，我想kā chit-ê问题留hō͘将来ê学者，去决定人类发展ê锁环中，属tī chiah-ê原住民ê正确环结。 （35）见《时事年鉴》，1929。 （36）见竹越与三郎，页119; Mackay, p.94。 （37）评议会有二十五位评议员，其中被指派ê高层官员有三位，tùi日本住民kah土生ê台湾人各任命十一人。