《台湾谚语咸酸甜》

| | | 转寄

南路鹰,一万死九千。(鹰扬八卦)~4~

br>
「想着祖先ê 扑拼,为着生存,为着尊严,无惜生命,甘愿牺牲认命,唉!lóng是人ê 无知,煞hō͘ 咱liân-hôe pháiⁿ命。

古早古早,咱ê 祖先就教咱爱随节气搬徙,寒天时,咱ê 故乡寒sih-sih,chiâⁿ pháiⁿ徛起,m̄-chiah 随人组队,趁冬季iáu未到ê 秋天,千里迢迢飞过海洋到南洋度假,顺绁教lín技艺,kā lín chhiâⁿ 大汉,chiah koh趁热--人beh到晋前ê 春天,搬徙转来去故乡,hō͘ lín少年-- ê 完婚生湠,che 就是祖先留落来ê 传统,每一kái 经过Formosa 地界,就会去遇着「南路鹰,一万死九千」ê 灾厄,mā是宿命无奈,好佳哉,chit-mái ê 台湾人已经觉醒,进入文明社会,有野生动物保育ê 观念,而且经过chi̍t-kóa有心ê 爱鸟人kap 彰化县政府ê 认真宣传,得着国际保育界ê 重视,m̄-chiah 有chiah-ni̍h 闹热感心ê 活动,向望明年、后年,一直到以后,咱ê 后代囝孙,拢会亲像今仔日按呢,平平安安,顺顺序序来过日,无惊惶,无死伤来经过Formosa chiah-ni̍h súi ê 地界,免欢迎无要紧, mài kā 咱thâi ,mài kā 咱掠就真感谢。」

「阿公!哪会kā 咱叫做南路鹰--leh ?」

「Che是Formosa 台湾人ê 祖先,看咱逐年都ài 飞向南洋去,m̄-chiah 按呢kā 咱称呼,无pháiⁿ意啦!taⁿ chiâⁿ暗-- à,tòe 阿公祈祷了后tio̍h-ài 去困,bîn-á 早起tio̍h-ài koh上路,无,会peh bē khit 来:感谢天!感谢上帝!赐hō͘ 咱平安,赐hō͘ 咱欢喜,过去-- ê mài koh郁卒,未来- -ē ,tio̍h-ài 扑拼sè-jī 。感谢台湾人,感谢半线ê 兄姊,lín ê 仁慈,lín ê 疼心,阮会记得,望beh lín mā会tàng平安快乐,免受恐吓,免受压霸,khioh 回尊严,tio̍h-ài 家己拚!感谢!感谢!感谢!」~结束~

【注解】:1. 八卦:eng-iông pat-kòa。 2. thiám 头:疲劳。 3. chhèng khah koân :[冲高一点]。 4. 三角翼:三角翼。 5. 鸟仔踏:chiáu-á-tah。 6. 来去!:laih --去,走,离开。7. 倒转:oa̍t 倒转,越倒转(oa̍t 倒转)。 8. 扎营:chat –iâⁿ。9. chhu--落去:[滑下去]。 10. koh 样:[异样]。 11. 状况:chōng-hóng 。 12. 唱歌la̍h 曲:唱歌拉曲。 13. iap-thiap :[隐密]。 14. chhap-cha̍p :参杂;混杂。15. 凊汗:chhìn-kōaⁿ,冷汗。 16. sau 声:破声;声音沙哑。17. chhāi 旗仔:[竖旗子]。 18. kí-kí 指指:[比比指指]( kí-kí tu̍h-tu̍h)。19. khiàn-thian khiàn-thian:[看天张望]。 20. 无好空:m̄ 是好代志。 21. 张持:tiuⁿ-tî,斟酌,小心。 22. khoaⁿ 办:免紧张,慢慢办。 23. thián 开:展开。 24. 穿插:[穿着]。25. 面腔目神:面容眼神。 26. phia̍t :[晃动]。 27. hiau-pai :骄傲。 28. thián si̍t :展翼。29. iap 尾:[缩尾]。 30. chông :跑,冲。31. kek khong :[装傻,卖弄傻相]。 32. chak-chō :[打搅]。 33. 才调:能力。 34. 上北:chiūⁿ 北。35. beh ti̍h 咱ê 生命:[要我们的命]。 36. 剿:châu ,斩草除根。37. gōing-beh :[快要]。 38. liân-hôe :无停ê pháiⁿ命,苦ê 轮回。39. 遇着:gū-tio̍h,拄着。 40. 灾厄:chai-eh。 41. 宿命:siok-miā。 42. peh bē khit 来:[爬不起来]。 43. khioh 回:[拾回]。