《BONG报bong2选》

 | | | 转寄

土地公kap土地婆ê故事

作者 吴美臻 2008.12.14

今á日是土地公ê生日，小朋友，我相信恁一定有看过土地公。每一冬土地公过生日这工，大家lóng会去土地公庙拜拜。小朋友上爱去土地公庙前ê空地thit-thô 。所以咱会tàng讲土地公虽然是小神，m̄-koh i soah kap咱上亲，上得着大家ê疼thàng。

差不多所有ê土地公ê神像lóng 是大kho͘大kho͘ ê老阿公，有长长ê白嘴须，脸红kì-kì，有笑bi-bi ê笑容，看起来使人感觉chiok亲切ê，chiok想beh入去kā伊拜拜。

M̄-koh因为土地公是每一个所在保庇大家ê神明，所以各地ê土地公lóng有无仝款ê故事，chit-má我就kā恁讲其中ê一个民间传奇故事。

古早时chūn，有一个收帐官，叫做张福德，他非常爱护老百姓，若有人纳钱纳bē出--来，他就会h³伊欠，若是真正无法度纳钱，伊就会the̍h钱出来替伊纳，若是看tio̍h老百姓有困难，伊lóng会想chiok chē办法去帮赞。每一工，伊lóng sì-kè teh替老百姓ê tāi-chì leh无闲。

尾--á，张福德死了后，新ê收帐官chiok pháiⁿ--ê，时常逼老百姓纳钱，koh kā大家苦毒，大家lóng感觉chiok痛苦，有人tòng-bē-tiâu，就讲：「若是张老爷koh 有tī--leh，m̄知影有jōa好。」大家chiok感恩过去张老爷照顾、疼惜老百姓ê日子，所以大家lóng想beh替伊起一间庙hō͘老百姓会tàng时常受到伊ê保庇kap照顾。In就tī 田园中chhōe一个风景chiok súi ê好所在，替张福德kap伊ê夫人起一间细细ê庙，尊称伊「福德正神」，这就是土地公庙ê由来。

老百姓时常去「土地公庙」拜拜，求土地公保庇大家平安大赚钱，当in看着土地公ê神像时，就亲像看着张福德在生ê时替老百姓服务ê情形仝款。
M̄-koh恁kám知影，是án-chóaⁿ taⁿ-á有土地公，无土地婆？原来土地公ta̍k工lóng笑bi-bi，chiok好笑神，土地婆chiok自私--ê，ta̍k工lóng chhiah-pê-pê。

有一工，一个穿破衫ê散赤人来土地公庙拜拜，伊讲：「是án-chóaⁿ我lóng bē好额，beh食一顿饭mā食bē饱，求恁赐hō͘我一寡金银财宝。」

土地公看伊chiok可怜--ê，想beh hō͘伊一寡金银财宝，m̄-koh土地婆soah开嘴讲：「Bē-sái，若每一个散赤人lóng求咱hō͘伊金银财宝，án-ni咱ê财产lóng分了了，到时chūn，咱查某囝嫁翁就会连扛轿á lóng请不起，bē-sái，bē-sái！」
土地婆chhiah-pê-pê无爱hō͘土地公赐金银财宝hō͘散赤人，土地公无法度只好对散赤人讲：「你tńg--去，只要你认真phah拚做khang-khòe，我就会tī暗中保庇你得着财富，你免烦恼。」

Koh有一pái，有一对翁á某来拜拜，求土地公hō͘ in福气，会tàng一世人lóng得着荣华富贵。」

土地婆马上讲：「Bē-sái，若每一个人lóng来求咱hō͘ in福气，án-ni咱家己就lóng无chhun--落-来ê福气á，bē-sái，bē-sái！」

土地婆chhiah-pê-pê，无爱对每一个人好，土地公无法度只好对hit对翁á某讲：「恁tńg--去，只要恁诚心做善事，我就会tī暗中保庇恁得着应该得--着ê福气。」从今以后，大家lóng知影土地公ê仁慈kap土地婆ê自私，所以lóng去土地公庙拜拜，拜土地公，无人beh拜土地婆。

小朋友，你若是有看着风景chiok súi ê田园有土地公庙，会记--leh，停落来拜拜，求伊保庇hō͘你gâu读书，无的确，小小ê土地公会开嘴kā你讲：「只要你认真读书，我就会tī暗中保庇你变成上有路用ê人」。