《BONG报bong2选》

 | | | 转寄

乌猫kap 水鸡

作者 甘露 2008.08.17

Tī 热人ê 暗暝，莲花池边á 有几十只水鸡teh「oa̍h！oa̍h！oa̍h！」，tò-pêng hit 只叫kah tng siak-phah，nah会hiông-hiông 停落来？Ō͘-o͘h，原来是一只困bē 去ê 乌猫ùi 边á 行过。

乌猫：「Miau~miau~，今á 日日时nah会热chit 体ê leh？Tio̍h-ài 趁暗时á 出来行行lau-lau leh，若无，我chit 只体材瘦thio ê 乌猫liam-mi就变肥猫lo͘h。

Chit 个时chūn，tú-á 好有一阵凉风吹来，kā 莲花叶siàn kah phih-phih pha̍h-pha̍h、摇来摇去。

水鸡á：「Ah，我苦a，nah会án-ne?M̄ 知有hō͘ 乌猫看着无？紧kā 头àⁿ khah低leh……」

「Ha~ha~ha~，凉lah，凉lah，风ah，继续吹、继续吹，m̄-thang 停。」乌猫ná 享受凉风，ná teh chhōe bih tī 莲花池边á ê 水鸡。

「正pêng 有四只，tò-pêng 73只，上óa 近我ê hit 只上无胆，惊kah phī-phī-chhoah，头á koh lê-lê，好！今á 日就chhōe伊做伴，hi~hi~hi~」乌猫心内teh 偷笑。

就án-ne，胡闹kā 头前脚kap 头kiu tńg来，后脚翘kah koân-koân-koân，圆滚滚ê 尾溜ká-ná 钓鱼ê 浮筒，hàiⁿ chi̍t-ē、tiuh chi̍t-ē，hàiⁿ chi̍t-ē koh tiuh chi̍t-ē，伊欢喜ê 心情看尾溜就知。

「He~he~，看我一号ê khut 势！水鸡ah，好胆mài 走！」

水鸡á:「我苦a，我苦苦苦lo͘h，chit 声苦bē 了a。乌猫大ê，你kā 我放开lah，kā 我放开lah……」

「好ā，kah 你to 开嘴ko͘-chiâⁿ a，好，放你走。」乌猫虽bóng 嘴nih 讲beh 放水鸡走，m̄-koh 身躯soah ná 徙ná 去，kā 水鸡beh tńg 莲花池á ê 路挡起来。

「Chit 只乌猫讲一套做一套，讲beh 放我走，koh kā 路挡leh，chit-má 水路bē-tàng soan，kan-taⁿ chhun 草á 路niâ。好！无kap伊拚chi̍t-ē，soah lia̍h做我好欺负。」水鸡á 心内án-ne 想。

乌猫：「Hi~hi~，gâu 跳o͘，oah，跳chi̍t-ē尺外远，好sńg、好sńg，m̄-thang 停、m̄-thang 停落来。」

无论水鸡án-chóaⁿ 跳，乌猫总是tòe tī伊后壁。过无jōa 久，水鸡就跳kah phì-phè 喘a。

水鸡：「Hè~hè~hè~，chiok 喘ê、chiok 喘ê，chit 只乌猫无tāi 无chì lia̍h 我kún-sńg 笑，伊是sńg kah 真心适，我是两支后脚跳kah kiōng-beh thih 腿去，用跳ê 我nah 跳会赢伊？若无想一个á 好办法，liam-mi-á thih 腿就变做chhun 骨头ê 白骨腿lo͘h。」

Chit 个时chūn,tú-á 好koh 有一chūn风tùi 莲花池边á 吹过，m̄-koh kap tú-chiah 无仝ê，是所有ê 水鸡lóng 惊kah m̄ 敢出声，kan-taⁿ chhun 乌猫jiok 水鸡，kā 草á phah kah phī-pha̍k 叫ê 声。

水鸡á:「有a,无声ê 暗暝…无声ê 暗暝，我有救a!」

乌猫：「你讲煞bōe？无声ê 暗暝，he~he~，你走无路a。」

原来，水鸡想着éng 过细汉经过雨伞节ê siū ê 时，ma-ma lóng会特别交代伊bē-sái 出声；chit-má伊想着一个好办法：赶紧跳tùi 雨伞节ê siū hia 去。

水鸡：「Koa̍h…koa̍h…koa̍h…」勇敢ê 水鸡拚性命叫，koh 愈叫愈大声，想beh kā 雨伞节siâⁿ出来。

「Toh一只m̄ 惊死ê 水鸡敢来goán 门脚口chhiàng 声？今á 日chi̍t-kóa 水鸡m̄ 知án-chóaⁿ lóng m̄ 出声，害我提早歇困，腹肚chiah tng teh iau niâ，随有点心走来。」本底就iau kah 大肠告小肠ê 雨伞节，siu̍h chi̍t-ē，ùi 蛇孔sô出来，nah 知面头前m̄ 是水鸡，是乌猫。

乌猫：「臭水鸡，你koh会晓用chit 招！雨伞节，我无teh 惊你，看一号khut 势！」

乌猫kui 身躯毛lóng chhàng起来，雨伞节本chiâⁿ 想讲有料thang sut，想bē 到m̄-tāⁿ 食bē 着，koh ài 拚老命，愈想愈m̄ 值，头oa̍t leh sô tńg 去蛇孔。

勇敢koh 冷静ê 水鸡就tī 乌猫kap 雨伞节对相ê 时，跳入去莲花池á。

水鸡á:「Koa̍h…koa̍h…koa̍h…，人讲好khang ài 报人知，歹khang mài sio 害，想bē 到tī 紧急ê 时chūn，歹khang ê mā ē-tàng 救人命，hi~hi~。」