《BONG报bong2选》

 | | | 转寄

快车小姐

作者 5656 2007.02.12

快车小姐，就是对号车顶ê 服务小姐；1960~80年代hit当时除了火车，公路局ê 长途对号车mā 有设án-ne ê 服务小姐。

当年beh 应徵对号车ê 服务小姐，tio̍h-ài 高中出业、身koân 160公分以上，ài 通华语、台语iah 是客语，当然笑容ài 甜。In ê khang-khòe 除了提供车顶服务，ài koh tī 车顶卖本岛各地ê 名产kap 便当；铁路局卖ê 便当，到taⁿ 犹原hō͘ 人siàu 念。

有一首台语流行歌曲就叫做〈车顶ê súi 姑娘〉，歌词lóng 是形容一寡当时受着大众欢迎ê 车顶服务小姐。M̄-koh 后来因为高速公路通车，致使火车ê 营业一工bái 过一工；为着减少支出，快车小姐mā 只好顺应环境渐渐行入历史。

Koh 有一种大型车mā 有车顶ê 服务小姐，就是游览车小姐。游览车小姐需要ê 专业知识就khah chē，像讲各县市ê 行政区、人文历史、建设资料、风景区，当年十大建设ê 建设重点、开拓历史mā ài 了解。

Tī 当年资讯无chiah 发达ê 年代，一寡资料ài chiâⁿ 用心去收集，上主要ê 资料来源就是sianpai，m̄-koh一寡手抄本，sianpai mā 无一定肯传教，所以观摩、偷学，是新进人员ài 做ê 功课。除了介绍一寡资料，游览车小姐koh tio̍h会晓唱歌、讲故事……等等gī-niū 节目。自开放国外观光了后，国内ê 游览车业务受着真大ê 打击，为beh 生存只好改变经营方式，竹鸡á 车自án-ne 开始tī 国道往回。

Chit二、三冬来，为着beh 消除「竹鸡á 车」che 无好听ê 名，有几间往回tī 高速公路顶ê 大型游览巴士，为beh 提高企业形象，mā 为着beh hō͘ 旅客有khah 好ê 印象，这几间私人客运mā tī 车顶设一位服务小姐，提供koh-khah 好ê 服务。Che，mā tī lán 目前ê 环境，提供hō͘ 少年男女bē少工作机会。