《BONG报bong2选》

 | | | 转寄

写hō͘我上kài siàu念ê三姊

作者 李文正 2006.11.05

亲爱ê三姊，当goán接着讲你发生车厄ê电话，goán赶到佳里综合病院kā你看ê时，你已经离开世间a，goán实在bē-tàng接受你hiông-hiông过往ê事实，因为你lóng无kap goán相辞。

当goán去到学甲分局交通处理小组ê时chūn，chiah知iáⁿ讲你是tī八月十三礼拜日e-po͘六点五十左右，开车落南经过学甲急水溪桥，因为桥有sió-khóa tńg弯落kiā，车速紧，失控，soah péng tùi对面ê车道，lòng着桥顶ê护栏水银灯，车chiah tò-khap，你choaⁿ-á去hō͘ teh tī车内ê驾驶座，当吊车、救护车去kā你救出来ê时，你已经无性命ê现象a。

后来我chiah知iáⁿ你lóng利用hioh-khùn时á去做chi̍t-kóa关心动物、有疼心ê khang-khòe，照nisang ê推测，hit一日你可能是赶紧beh载chiah-ê狗á、猫á ê尸体去冈山火化、超渡，你惊时间bē赴，chiah会驶hiah紧soah来发生车厄。

过去我chhiâng-chāi去工厂chhōe你开讲，你lóng饲真chē狗á，我mā chhiâng-chāi kā你讲lán teh开工厂无闲无工，而且卫生mā无好，koh会kā人吵着，ta̍k-pái去chhōe你坐，我lóng会kā你念，m̄-kuh你lóng kā我讲「无lah，ah to无koh khioh tńg来饲a，bē koh增加a lah」，你lóng颠倒会kā我讲，chiah-ê狗á chiok有感情ê，chiok sek ê，你对i好，i lóng mā知iáⁿ neh。三姊，你就是一个chiah-ni̍h-á好性，chiah-ni̍h-á有疼心，chiah-ni̍h-á善良ê人。

虽然工业区hām安平真近，m̄-kuh自从a母á过往去了后，你就khah少teh tńg来a，除了选举ê时你khah chia̍p来kā我tàu脚手以外，lán姊弟á就是随人无闲ka-kī ê tāi-chì。我会记得tī你出tāi-chì ê chiâⁿ个月前，我koh去chhōe你开讲，你lóng mā会讲chi̍t-kóa委曲、心声hō͘我听，我lóng mā kā你苦劝，tio̍h-ài想想khah开leh，khang-khòe m̄免做kah hiah-ni̍h-á辛苦，衫á裤sio̍k-sio̍k a，tio̍h去买chi̍t-kóa khah súi ê衫来穿，tú着a就去做chi̍t-ê-á身体健康检查，你lóng mā kā我讲「好、好」，你lóng颠倒khah会关心我，讲我食kah瘦pi-pa，mā tio̍h去hō͘医生检查看māi leh。我lóng mā kā你讲lán过去tòa tī海墘á，食bái穿bái生活艰苦，做粗重lán to lóng会堪得a，何况lán chit-má已经做议员a，虽然khah无闲sió-khóa，m̄-kuh若kah过去比起来是加真khùiⁿ活leh lah。Lán姊弟á若做伙ê时，话lóng讲bē煞。后--来有1日你koh khà电话hō͘我，讲有chi̍t-kóa话beh kā我讲，我kan-na kā你讲无要紧lah，我chit 2日á若khah闲--leh chiah koh过你hia开讲，想bē到我chit-má连beh koh听你讲话ê机会mā无a。

亲爱ê三姊，你自细汉就去做女工，kā a-pa、a母--á tàu thàn钱，闲ê时tio̍h-ài koh tńg来kā a-pa、a母á tàu做khang-khòe，我会记得你thàn ê钱lóng hō͘ a-pa the̍h去买鱼栽，你lóng无为ka-kī设想，a-pa、a母á 无嫁妆hō͘你，你mā无计较，无分财产hō͘你，你kāng款对a-pa、a母á chiah-ni̍h-á养孝，你m̄-nā对goán chiah-ê小弟、小妹真照顾、真疼thàng，你对兄哥、大姊mā真有情义，你若做会到ê，lóng bē计较。

亲爱ê三姊，你离开goán了后，goán若beh koh去看秀梅，ah是beh去kā a-pa、a母á探墓厝，车顶就减你l个a，我听A秋讲，你lóng chhiâng-chāi ka-kī 1个人，车驶leh去新化仁爱之家看秀梅，因为你知iáⁿ我khah无闲；tú着á lán兄弟姊妹lóng会相招做伙去看秀梅，tī车顶lán兄弟姊妹有讲有笑，甚至mā有争执，chit-má我kā回想起来，he是lán上快乐ê时chūn。我相信你chit-má一定kap a-pa、a母á做伙tī天国、tī佛祖ê身躯边，母á-kiáⁿ有讲有笑chiok快乐ê。

亲爱ê三姊，tī我读小学beh升国中ê时，a-pa、a母á无kap lán tòa做伙，我印象chiok深ê，tī我读金城国中一年ê时，e-tàu时á你lóng kōaⁿ chiok好食ê便当kap果子去学校hō͘我食，hit时是我感觉上幸福ê时chūn，che mā是我chi̍t世(sì)人to无法度放bē记得ê tāi-chì。你chhiâng-chāi kā我讲你若tī外口听着人teh o-ló--我，lóng chiok欢喜ê。虽然我今á日已经做议员a，m̄-kuh你mā是hiah-ni̍h-á疼我，体贴我，关心我，你mā m̄敢麻烦我。三姊，你是我心目中上好ê a姊，若准讲有后世人，你koh做我ê a姐，好无？

亲爱ê三姊，你虽然无读jōa-chē册，m̄-kuh你tī我ê心目中比hiah-ê高学历ê khah有学问，khah有是非观念；虽然你自细汉就食头路，无像真chē人受政府ê照顾，koh嫌政府，若sió-khóa影响着in ê利益，in就批评政府chit项、hit项。几nā pái teh kap你开讲，你lóng真会tàng体贴政府，体贴A扁á总统，因为你知iáⁿ beh hōaⁿ 1个家庭to chiok艰苦a，何况beh hōaⁿ 一个国家？Koh再讲，台湾iáu-koh有真chē无公平ê所在。

亲爱ê三姊，虽然你真好性，真善良、真有疼心，m̄-kuh你对性命ê积极实践是无人thang kap你比ê，你kā你ê爱心化做行动，m̄-tiāⁿ是对家庭ê付出，对序大人ê养孝，对兄弟姊姊ê情份，lóng hō͘人真感动。你m̄-tiāⁿ疼亲人，你mā疼chiah-ê精牲动物，甚至你人生ê最后就是为着chiâh-ê狗á、猫á来牺牲性命！可能有真chē人会笑你gōng，过去我mā chhiâng-chāi为着chiah-ê tāi-chì kā你念，m̄-kuh chit-má我chiah了解：你是一个不管时用疼心来实践性命、伟大ê女性！亲爱ê三姊，虽然你chiah五十七岁就离开goán，m̄-kuh你ê精神永远教示goán，mā活tī我ê心肝底。