《巴克禮普世版聖經(試讀本)》

| | | 轉寄

巴克禮普世版(試讀本) 約翰福音第十三章

Iâ-so͘ Kā Bûn-tô͘ Sé-kha
1 Pôaⁿ-kòe-cheh chêng, Iâ-so͘ chai I lī-khui chit sè-kan tńg khì Thiⁿ-pē hia ê sî í-keng kàu. I ū it-ti̍t thiàⁿ sè-kan sio̍k I ê lâng, taⁿ I beh piáu-sī thiàⁿ in tàu-tí. 2 Iâ-so͘ kah sù-tô͘ chia̍h àm-tǹg ê sî, mô͘-kúi chiong chhut-bē Iâ-so͘ ê ì-sù hē tī Ka-lio̍k-lâng Se-bûn ê kiáⁿ Iû-tāi ê sim. 3 Iâ-so͘ chai Thiⁿ-pē í-keng chiong it-chhè kau tī I ê chhiú, koh chai I tùi Siōng-Chú hia lâi, mā beh tńg-khì Siōng-Chú hia. 4 I chiū lī-khui toh, thǹg gōa-saⁿ, the̍h chi̍t-tiâu kin-á hâ tī io-ni̍h. 5 Jiân-āu tò chúi tī bīn-tháng, kā sù-tô͘ sé kha, koh ēng hâ tī io-ni̍h ê kin-á kā in chhit. 6 Sé kàu Se-bûn Pí-tek ê sî, Pí-tek kā I kóng, "Chú ah, Lí beh kā góa sé kha sī-bô?" 7 Iâ-so͘ ìn kóng, "Góa só͘-chò ê, lí chit-má m̄ chai, āu-lâi chiū ē bêng-pe̍k." 8 Pí-tek kóng, "Lí chhian-bān m̄-thang kā góa sé kha." Iâ-so͘ ìn kóng, "Góa nā bô kā lí sé kha, lí kah Góa chiū bô koan-hē." 9 Se-bûn Pí-tek kóng, "Chú ah, m̄-nā kha, liân chhiú kah thâu-khak mā kā góa sé." 10 Iâ-so͘ kóng, "Lâng sé seng-khu liáu-āu, kui seng-khu lóng chheng-khì, kan-taⁿ sé kha to̍h hó. Lín í-keng chheng-khì, m̄-koh bô ta̍k-ê lóng án-ne." 11 In-ūi Iâ-so͘ chai-iáⁿ siáⁿ-lâng beh kā I chhut-bē, só͘-í chiah kóng, "Lín bô ta̍k-ê chheng-khì." 12 Iâ-so͘ kā in sé kha liáu-āu, chhēng gōa-saⁿ koh tńg-lâi chē-toh, mn̄g in kóng, "Góa tùi lín só͘-chò chiah-ê tāi-chì, lín kám ū bêng-pe̍k? 13 Lín chheng-ho͘ Góa ' lāu-su' mā chheng-ho͘ Góa ' Chú, lín án-ne chheng-ho͘ bô m̄-tio̍h, in-ūi Góa chiū-sī. 14 Góa chò ' Chú', chò 『 lāu-su』 to kā lín sé kha, lín mā tio̍h hō͘-siōng sé kha. 15 Góa ū lâu bô͘-iūⁿ hō͘ lín, sī beh hō͘ lín thang chiàu Góa tùi lín só͘-chò ê khì chò. 16 Góa si̍t-chāi kā lín kóng, lô͘-po̍k bē pí chú-lâng khah tōa, hōng-chhe-phài ê mā bē pí chhe-phài I ê Hit-ūi khah tōa. 17 Lín kì-jiân bêng-pe̍k chiah-ê tāi-chì, nā chiàu án-ne khì chò, chiū chin ū hok-khì." 18 " Góa m̄-sī kóng lín tāi-ke lóng án-ne, Góa chai Góa só͘ kéng-soán ê, m̄-koh che sī beh èng-giām Sèng-keng só͘ kóng: Kah Góa chò-hóe chia̍h-pn̄g ê lâng ē pōe-ge̍k Góa.( chù: SPh 41:9) 19 Taⁿ tāi-chì iáu-bōe hoat-seng, Góa seng kā lín kóng. Kàu tāi-chì hoat-seng, hō͘ lín thang sìn Góa chiū-sī Hit-ūi. 20 Góa si̍t-chāi kā lín kóng, chiap-la̍p Góa só͘ chhe-phài ê lâng chiū-sī chiap-la̍p Góa, chiap-la̍p Góa chiū-sī chiap-la̍p chhe-phài Góa lâi ê Hit-ūi."

Iâ-so͘ Ī-giân Siū Chhut-bē (Mt 26:20-25;Mk 14:17-21;Lk 21:22-23) 21 Iâ-so͘ kóng chiah-ê ōe liáu-āu, sim-lāi chin kan-khó͘, chiū bêng kóng, "Góa si̍t-chāi kā lín kóng, lín tiong-kan ū chi̍t-ê lâng ē chhut-bē Góa." 22 Sù-tô͘ hō͘-siōng khòaⁿ-lâi khòaⁿ-khì, m̄-chai Iâ-so͘ sī teh kóng siáⁿ-lâng. 23 Sù-tô͘ tiong-kan ū chi̍t-ê sī Iâ-so͘ só͘ thiàⁿ ê, i chē tī Iâ-so͘ ê sin-piⁿ. 24 Se-bûn Pí-tek ǹg hit-ê sù-tô͘ tìm thâu kóng, "Chhiáⁿ lí mn̄g khòaⁿ Iâ-so͘ sī teh kóng siáⁿ-lâng." 25 Hit-ê sù-tô͘ chiū khò óa Iâ-so͘ ê heng-khám, mn̄g kóng, "Chú ah, sī siáⁿ-lâng?" 26 Iâ-so͘ ìn kóng, "Góa beh ùn piáⁿ the̍h hō͘ i, hit-ê lâng chiū-sī." I chiū ùn chi̍t-tè piáⁿ, the̍h hō͘ Ka-lio̍k-lâng Se-bûn ê kiáⁿ Iû-tāi. 27 Iû-tāi chi̍t-ē chiap-tio̍h hit-tè piáⁿ, Sat-tàn chiū ji̍p-khì i ê sim. Iâ-so͘ chiū kā Iû-tāi kóng, "Lí siūⁿ-beh chò ê, kóaⁿ-kín khì chò." 28 tâng chē-toh ê lâng bô chi̍t-ê chai-iáⁿ Iâ-so͘ ná-ē tùi i kóng chit-kù ōe. 29 In-ūi Iû-tāi sī teh koán chîⁿ-hāng, ū-lâng siūⁿ kóng, kám sī Iâ-so͘ teh kiò i khì bé siú-cheh só͘ su-iàu ê mi̍h-kiāⁿ, á-sī kiò i khì chín-chè sàn-chhiah lâng. 30 Iû-tāi chiap-tio̍h hit-tè piáⁿ sûi-sî chhut-khì. Hit sî sī àm-sî.

Sin ê Kài-bēng
31 Iû-tāi chhut-khì liáu-āu, Iâ-so͘ kóng, "Taⁿ Jîn-chú tit-tio̍h êng-kng, Siōng-Chú mā thong-kòe Jîn-chú tit-tio̍h êng-kng. 32 kì-jiân Siōng-Chú thong-kòe Jîn-chú tit-tio̍h êng-kng, Siōng-Chú ka-kī mā beh êng-kng Jîn-chú, koh sī beh sûi-sî hō͘ I tit-tio̍h êng-kng. 33 Sè-kiáⁿ ah, Góa kah lín chò-hóe chhun bô jōa kú à, lín ē beh chhōe Góa. Chiàu Góa bat kā Iû-thài-lâng kóng ê, taⁿ Góa kā lín kóng, ' Góa beh khì ê só͘-chāi, lín bē-tàng khì.' 34 Góa hō͘ lín chi̍t-tiâu sin ê kài-bēng, Lín tio̍h sio-thiàⁿ, chhin-chhiūⁿ Góa bat thiàⁿ lín. Lín mā tio̍h chiàu án-ne sio-thiàⁿ. 35 Lín nā sio-thiàⁿ, chèng-lâng ē tùi án-ne lâi chai, lín sī Góa ê bûn-tô͘."

Iâ-so͘ Ī-giân Pí-tek M̄-jīn Chú (Mt 26:31-35;Mk 14:27-31;Lk 22:31-34)
36 Se-bûn Pí-tek mn̄g Iâ-so͘ kóng, "Chú ah, Lí beh khì tó-ūi?" Iâ-so͘ ìn kóng, "Góa beh khì ê só͘-chāi, lí chit-má bē-tàng tòe Góa khì, m̄-koh āu-lâi lí ē tòe Góa khì." 37 Pí-tek kóng, "Chú ah, góa chit-má ná-ē bē-tàng tòe Lí khì? Góa kam-goān ūi-tio̍h Lí lâi pàng-sak sèⁿ-miā." 38 Iâ-so͘ ìn kóng, "Lí beh ūi-tio̍h Góa lâi pàng-sak sèⁿ-miā sī-bô? Góa si̍t-chāi kā lí kóng, ke iáu-bōe thî í-chêng, lí ē saⁿ pái m̄ jīn Góa."