《巴克禮普世版聖經（試讀本）》

 | | | 轉寄

巴克禮普世版（試讀本） 加拉太書第三章

作者 巴克禮普世版小組 2015.08.09

Lu̍t-hoat Á-sī Sìn-sim
1 Lín chiah-ê gōng Ka-lia̍p-thài-lâng ah, Iâ-so͘ Ki-tok tèng si̍p-jī-kè í-keng tùi lín hián-bêng tī lín ê ba̍k-chiu chêng kám m̄-sī? Taⁿ lín sī khì hō͘ siáⁿ-lâng bê-khì? 2 Góa kan-taⁿ mn̄g lín chi̍t-hāng tāi-chì, lín chêng niá-siū Sèng-Sîn sī tùi siú lu̍t-hoat lâi kiâⁿ, á-sī tùi sìn só͘ thiaⁿ-tio̍h ê hok-im? 3 Lín ná-ē hiah gōng? Lín kì-jiân tùi khò Sèng-Sîn khai-sí, chit-má beh khò jio̍k-thé lâi oân-sêng sī-bô? 4 Lín siū hiah-chē kan-khó͘ kám lóng bô chhái-kang? It-tēng ū lō͘-ēng chiah tio̍h. 5 Siōng-Chú sù lín Sèng-Sîn, koh tī lín tiong-kan kiâⁿ sîn-jiah, sī in-ūi lín siú lu̍t-hoat, á-sī in-ūi lín sìn só͘ thiaⁿ-tio̍h ê hok-im? 6 Sèng-keng án-ne kóng, "A-pek-la̍h-hán sìn Siōng-Chú, Siōng-Chú chiū kā i khòaⁿ-chò gī-lâng."（chù: CSK 15:16) 7 Só͘-í lín tio̍h chai, ū sìn ê lâng chiah sī A-pek-la̍h-hán ê kiáⁿ-sun. 8 Sèng-keng tāi-seng to̍h chai, Siōng-Chú beh hō͘ Gōa-pang-lâng tùi sìn lâi kah Siōng-Chú ū hô-hó ê koan-hē, só͘-í chiong chit-ê hó siau-sit seng thoân hō͘ A-pek-la̍h-hán kóng, "Bān-bîn ē in-ūi lí lâi siū Siōng-Chú ê chiok-hok!"( chù: CSK 12:3) 9 Án-ne só͘-ū sìn ê lâng ē kah ū sìn ê A-pek-la̍h-hán chò-hóe siū chiok-hok! 10 Hiah-ê óa-khò chun-siú lu̍t-hoat ê lâng lóng oa̍h tī chiù-chó͘ ē-bīn, in-ūi Sèng-keng kì-chài: Bô chun-siú kì tī lu̍t-hoat-su só͘ kui-tēng lâi kiâⁿ ê lâng, lóng tio̍h siū Siōng-Chú chiù-chó͘.( chù: SBK 27:26) 11 Án-ne bô-lâng ē-tàng óa-khò lu̍t-hoat lâi kah Siōng-Chú kiàn-li̍p hô-hó ê koan-hē, in-ūi Sèng-keng ū kóng, "Tùi sìn lâi kah Siōng-Chú ū hô-hó koan-hē ê lâng ē tit-tio̍h oa̍h-miā."( chù: HPK 2:4) 12 M̄-koh lu̍t-hoat m̄-sī ēng sìn chò kin-kì, Sèng-keng kóng, "Chun-siú lu̍t-hoat ê lâng ē khò hiah-ê lu̍t-hoat lâi oa̍h."( chù: LBK 18:5) 13 Ki-tok í-keng siū chiù-chó͘ lâi kiù-sio̍k lán thoat-lī lu̍t-hoat ê chiù-chó͘, in-ūi Sèng-keng kì-chài: Só͘-ū tiàu tī chhâ-thâu-téng ê lâng lóng tio̍h siū Siōng-Chú ê chiù-chó͘.( chù: SBK 21:23) 14 Ki-tok án-ne chò sī beh chiong A-pek-la̍h-hán ê hok-khì, thong-kòe Ki-tok Iâ-so͘ lâi sù hō͘ Gōa-pang-lâng, mā beh hō͘ lán tùi sìn lâi niá-siū Siōng-Chú só͘ èng-ín ê Sèng-Sîn.

Lu̍t-hoat Kah Èng-ún
15 Hiaⁿ-tī chí-mōe ah, góa ēng lán ji̍t-siông seng-oa̍h chi̍t-ê lē lâi soat-bêng. Khè-iok it-tàn sêng-li̍p, chiū bē-ēng-tit kā i hùi-tû á-sī ke-thiⁿ. 16 Siōng-Chú ū tùi A-pek-la̍h-hán í-ki̍p i ê kiáⁿ-sun li̍p-iok. Sèng-keng pēng bô chí chin-chē lâng kóng, "kiáⁿ-kiáⁿ sun-sun". Sī kóng, "lí ê kiáⁿ-sun." Che sī teh chí chi̍t-ê lâng, chiū-sī Ki-tok. 17 Góa ê ì-sù sī kóng, Siōng-Chú ū kah A-pek-la̍h-hán li̍p-iok, koh tah-èng beh siú iok. Sì-pah saⁿ-cha̍p nî āu chiah chhut-hiān ê lu̍t-hoat bē-tàng hùi-tû hit-ê iok lâi hō͘ Siōng-Chú ê èng-ín kui tī khang-khang. 18 In-ūi sêng-chiap Siōng-Chú só͘ sù ê sán-gia̍p nā sī kin-kì lu̍t-hoat, chiū bô koh khò èng-ín, m̄-koh Siōng-Chú sù sán-gia̍p hō͘ A-pek-la̍h-hán sī chiàu èng-ín. 19 Án-ne lu̍t-hoat ū siáⁿ lō͘-ēng? Lu̍t-hoat sī ūi-tio̍h beh hō͘ lâng chai sím-mi̍h sī kòe-sit, iû thiⁿ-sài thong-kòe chi̍t-ê tiong-kan-lâng só͘ siat-li̍p-.ê. Ti̍t-kàu hit-ê tit-tio̍h èng-ín ê kiáⁿ-sun lâi-lîm ê sî chiū kiat-sok. 20 M̄-koh sio̍k tan-hong ê tāi-chì bô su-iàu tiong-kan-lâng, Siōng-Chú sī tan-hong teh chò chit-hāng tāi-chì.

Lu̍t-hoat ê Bo̍k-tek
21 Án-ne kóng khí-lâi, lu̍t-hoat kah Siōng-Chú ê èng-ín kám ū chhiong-tu̍t? Choa̍t-tùi bô! In-ūi nā-sī lu̍t-hoat ē hō͘ lâng tit-tio̍h oa̍h-miā, lâng chiū ē-tàng khò lu̍t-hoat lâi kah Siōng-Chú kiàn-li̍p hô-hó ê koan-hē. 22 M̄-koh Sèng-keng kóng bān-bîn lóng ûi tī chōe-ok lāi, Siōng-Chú chí-ū thong-kòe sìn Iâ-so͘ Ki-tok lâi chò niá-siū èng-ín ê kin-kì. Chiah-ê èng-ín sī beh siúⁿ-sù hō͘ hiah-ê sìn ê lâng. 23 M̄-koh chit-ê "sìn" ê sî-tāi lâi-lîm í-chêng, lán siū lu̍t-hoat kò͘-siú tiâu-teh, ti̍t-kàu "sìn" ê sî-tāi chiah hián-bêng chhut-lâi. 24 Án-ne, tī Ki-tok lâi-lîm í-chêng, lu̍t-hoat chò lán ê kàm-hō͘-jîn, chhōa lán lâi kui Ki-tok, hō͘ lán tùi "sìn" lâi kah Siōng-Chú hô-hó. 25 Chit-má "sìn" ê sî-tāi í-keng lâi-lîm, lu̍t-hoat to̍h bô koh chò lán ê kàm-hō͘-jîn. 26 Lín tāi-ke tùi sìn lâi kah Ki-tok Iâ-so͘ kiat-liân, lóng chiâⁿ-chò Siōng-Chú ê kiáⁿ-jî. 27 Lín só͘-ū niá-siū sé-lé lâi kah Ki-tok kiat-liân ê lâng, lóng ji̍p tī Ki-tok, ū I ê oa̍h-miā. 28 Án-ne bô hun Iû-thài-lâng á-sī Gōa-pang-lâng, lô͘-lē á-sī chū-iû ê lâng, cha-po͘-lâng á-sī cha-bó͘-lâng, tī Ki-tok Iâ-so͘ lāi-bīn lóng chiâⁿ-chò chi̍t-thé. 29 Lín kì-jiân sio̍k Ki-tok, chiū-sī A-pek-la̍h-hán ê kiáⁿ-sun, chiū ē-tàng sêng-siū Siōng-Chú tùi A-pek-la̍h-hán ê èng-ín.