《台灣之愛:盧俊義牧會筆記》

| | | 轉寄

一支腳ê幫贊無腳ê

這是幾年前發生tī台南縣某鄉鎮一間國校á ê真實故事。

裕熙是一個chiàⁿ腳有小兒麻痺ê gín-á。in老爸為tio̍h beh hō͘伊自立,自細漢就教伊學會曉騎鐵馬。伊mā真知影bē-sái為tio̍h家己一支腳無方便,就ài厝內ê人ta̍k工幫贊伊行出行入,總tio̍h-ài靠家己ê力量chiah好。伊chiâⁿ認真leh學,mā足緊to̍h學會曉騎鐵馬,伊án-ne tùi國小一年開始,家己每工騎車去學校。

有一工放學ê時,伊到車棚chhōe無家己ê鐵馬,心肝真艱苦,khà電話hō͘ in老爸。in老爸趕緊到學校去了解狀況,非常受氣,khǹg tī學校車棚ê鐵馬soah會hông偷牽去,ah裕熙若無鐵馬,tio̍h-ài行一chat真長ê路才有法度到厝,對腳無方便ê gín-á來講,是真痛苦ê tāi-chì。老爸了解狀況了後,親身去chhōe校長,hō͘校長知影chite5情形,校長也感覺chám-jiân抱歉。老爸再三安慰裕熙,講隨beh去買一台新ê hō͘伊,oān-nā罵he賊á thài thang chiah-nih無良心。其實,賊á若是有良心就bē做賊ah。

當in老爸騎o-to-bái,準備beh載裕熙tńg去厝ê時,裕熙soah khah-án-chóaⁿ to m̄肯上車,in老爸真奇怪,裕熙是一直m̄肯講出為siáⁿ原因,後來in老爸koh講beh載伊去買一台新鐵馬,裕熙才慢慢á kā in老爸講︰「爸,你先載阮同學良吉a tńg去了後,chiah來載我。」in老爸感覺怪奇︰「是án-chóaⁿ?良吉a ē-tàng家己tńg去,ah是叫in厝ê人來載伊ah。」裕熙án-ne kā in老爸講︰「m̄是lah,良吉a ê腳kap我仝款,bē-sái行siuⁿ遠ê路。伊比我koh-khah需要幫贊,伊雙腳lóng無法度chhun直來行。lóng是我每工騎車去in厝載伊來學校,才koh載伊tńg去。今á日車phah無去,我無châi-tiāu載伊tńg去ah,麻煩阿爸先載伊tńg去,我tī chia等。你chiah翻頭tńg來載我。」

聽裕熙講soah,做老爸ê非常感動,koh也奇怪,自來m̄-bat聽裕熙講過chit件tāi-chì。趕緊行到裕熙所講ê教室去chhōe良吉a。he是一棟三樓ê教室,每pái lóng是裕熙去hit棟大樓叫伊,伊聽tio̍h ê時chiah落來樓腳。果然,良吉a iáu-koh teh教室thèng候裕熙叫伊,仝班ê同學差不多lóng tńg去厝ah,chhun幾個á iáu tī教室mā是leh等厝內ê人來接ê。裕熙ê老爸直接走往三樓教室,chhōe-tio̍h良吉a時,看tio̍h伊雙腳lóng麻痺kiu khì,穿鐵鞋行路一拐一拐需要真用力。伊leh想︰學校明知影有chit種學生,是án-chóaⁿ koh kā chit班ê教室分配到三樓去?實在是有夠「夭壽」ê。裕熙ê老爸看bē loeh,就àⁿ落去beh āiⁿ良吉a落樓腳。無想tio̍h良吉a講︰「阿伯,m̄免lah,我ē-tàng家己落去,無問題。」裕熙ê老爸講︰「這 ài落三樓,真thiám頭。Bē使,我kā你āiⁿ。」良吉a講︰「bē lah,我家己peh-chiūⁿ、peh-lo̍h一年外ah。無啥問題ê。khah慢niâ。阿伯,你ē-tàng先落去。無要緊。」

裕熙ê爸爸知影家己ê kiáⁿ是一支腳無好勢niâ,良吉a是雙腳lóng無方便。伊一支腳殘障ê kiáⁿ iáu知beh幫贊雙腳lóng破相ê同學,做老爸ê受真大ê感動,目屎ná流,ná鼓勵良吉a ài勇敢,也感覺相當安慰kap自豪,知影家己ê gín-á雖bóng身體有殘缺,總是心真圓滿kap慈悲。

養育gín-á ê方法真chē,有人hō͘ gín-á豐富ê物質享受,無hō͘ gín-á圓滿ê心靈生活;有ê人hō͘ gín-á學真chē新ê科技智識,kap升學ê常識,m̄-koh真少教gín-á對苦難者加一份慈悲憐憫ê心。結果是豐富ê物質生活往往hō͘ gín-á學會曉cheh-thoah、討債,無法度體會sòng-hiong人生活ê艱計kap需要。雖bóng是hō͘ gín-á學tio̍h真chē新ê科技智識kap生活技能ê常識,m̄-koh往往欠缺心靈生活ê培養,對疼惜別人、替人設想ê心,年歲ná加添soah相對ná hat ná lian-pó͘,致到年歲jú大,看tio̍h苦難生命ê景象是jú來jú冷漠,終kui尾連對有養育之恩ê序大、bat照顧伊ê親友,自然的欠缺感恩kap憐憫ê心肝。

hō͘ gín-á豐富ê物質生活,較輸hō͘ gín-á有夠額敬虔ê心靈;hō͘ gín-á學多樣ê才藝較輸自細漢hō͘伊機會接觸心靈功課。豐富ê心靈需要用koh-khah chē ê時間來培養,chiah ē-tàng hō͘伊tī生命中培育kap成長。(原文刊tī自由時報2004年9月初5第15頁,轉載tī行政院僑務委員會出版「宏觀週報」2004年9月15第7頁)

盧俊義牧師的個人網站。