《賴永祥講書》

| | | 轉寄

《教會史話》(1_007) 台灣教會公報

巴克禮牧師,tī 1926年tī教會報五百期紀念特刊講:「光緒11年6月(1885年7月)創刊教會報。當初有幾項目的......報導教會消息,hō͘眾信徒週知,藉此hō͘大家同心協力為主服務......亦有論講,hō͘讀者koh-khah能明白聖經教示......創刊時tī中國大陸另有kúi-nā種教會刊物,但是hiah-ê刊物現在大部分lóng停刊,所以目前所出版ê kúi-nā千種報刊中,咱教會報是歷史siōng悠久ê。咱應該感謝上帝,伊保護咱ê刊物,tī四十gōa年中間每月lóng ē-tàng按期發刊。」

無m̄-tio̍h!教會報是台灣第一個大眾傳播工具,歷經滿清、日據到現在,是教會在台灣成長ê活見證,信徒應該感謝,治史者應該koh-khah重視。

台南教士會,發刊「台灣府城教會報」第一號,是1885年7月。由巴克禮牧師主持,使用羅馬白話字,聚珍堂(俗稱新樓書房)印刷,月刊。第一號有四面,第二號起有八面,以後數年lóng維持八面。1895年改隸日本,iáu照常發行。為tio̍h beh正式得tio̍h日本政府之許可發行,1905年5月起名稱改為「台南教會報」,同年7 月總督府核准。1913年9月(342號)起易名「台灣教會報」。1928年1月,kap北部中會發行之「芥菜子報」合刊。1932年5月,koh再合刊「教會新報」(高雄中會所辦)kap「福音報」(台中中會所屬),易名為「臺灣教會公報」,並改屬南部大會。二次大戰中,日本政府chiông án-ne命令關閉公報社,公報最後一期是1942年 3月所刊之684號。戰後高金聲牧師向南部大會申請借用公報社建築物kap其他動產,以「光復印書局」名義,復刊「台灣教會公報」,1945年12月發行號685號。伊獨立經營到1948年1月,tī第九屆南部大會,將其經營權無條件奉還大會。1957年南部大會撒消,公報社歸屬總會。公報iáu以白話字發行,到 1049、1050合併號(1969年3月)止。原為月刊,1962年1月到1969年3月間為半月刊。為配合華語推行運動,1955年3月起有副刊「瀛光」問世,到1970年1月始全部改用中文發行「臺灣教會公報」,其號數為1051號。1973年改為週刊到taⁿ。

臺灣府城教會報ê正名是Tâi-oân-hú-siâⁿ Kàu-hōe-pò,英文名是 Taiwan Prefectural City Church News。 臺灣教會公報,白話字正名是Tâi-oân Kàu-hōe Kong-pò,今使用英文名是 Taiwan Church News。
(華語原載:臺灣教會公報第1878期 主後1988年2月28日)