《台语chit条路》

 | | | 转寄

《台语chit条路》序二

作者 杨允言 2008.02.17

1、
今年，我ùi学校毕业，因为无按算koh读博士班，会使讲正式beh踏入社会。Tī chit-ê过渡ê时期，我一直the想，关系台语文运动，我会当提出啥物观念，会当做啥物代志？ 采访计画是tī chit-ê情形下所想出来--ê，感觉会使来试看māi。 老实讲，kàu taⁿ我iā m̄知，hit当阵接「学生台湾语文促进会」(STPA)ê会长，到底是对iá是m̄对，对当teh起步ê学生界台语文运动，kam有产生啥物款无好ê影响？
2、
1991年，大学毕业三冬了后，我顺利考入清华ê研究所。Hit种感觉真奇怪，那像以前做学生时所有ê 一寡特权雄雄koh转来身躯边。大学毕业hit年，研究所考无tiâu，过无gōa久koh抽着马祖签，硬将我kap台湾切断，学生时代ê热情kap理想只好暂时khǹg一边，mā不得不将家己ê观念kap态度藏起来。 马祖hia讲福州话，语言bē通，对chi̍t-ê tú开始beh舞台语文字化ê我来讲，总是感觉淡薄--á失志、淡薄--á苦闷。我趁第二冬khah有闲ê时间，将一寡华文小说翻做台语，退伍了后有整理、phah字。因为着作版权ê问题，惊去惹着一寡麻烦，所以无按算正式出版，总是一寡学校ê台语社团有印来读。 无的确是因为chit项大家看会着ê成果，koh热心teh做连线ê空课，得着一寡朋友ê肯定，所以选我出来做STAPA第一任会长。 在我看来，92年二月大家tī交大聚会，提出chi̍t-ê初步ê构想，koh五月初三STAPA顺利成立，hō͘我对chit阵朋友有chi̍t-ê印象(无的确是错误--ê)，我感觉大家lóng真有心、真拚势，真愿意做伙来做一寡代志。当初我teh想，借chi̍t-ê会，tī半年ê会长任内，应该会当交出一张真sui气ê成绩单hō͘ lán ê社会看。 但是无gōa久，随发觉幻梦破灭。一方面，大家分散各地，台湾头kàu台湾尾(实际上是台北kàu台南)lóng有，有地理条件ê制限；另外一方面，大部分ê社团，tī学校内都已经做ka艰苦死，既然校内都雾sà sà，beh哪会有khah加ê气力做伙来做代志？ Koh一项，因为我研究所以经第二冬，论文ê压力真大，koh因为《台语学生》ê发行，真chē事务性ê空课mā lóng爱来处理，实在无khah加ê气力chhōa大家做伙来冲。 《台语学生》会出chia nī捷(一个月三期)，大部分ê原因是台大hit边一寡创社元老ê坚持，一开始我teh想，假使大家矫好势，而且愿意做，我mā免了伤chē精神tī顶峘，m̄-koh hit阵已经有按算，上bái ê情形就是我爱担起来做。后来，当初话讲上大声--ê，尾也弄港，为着chit件代志，台大hit边mā有一寡不满ê声音出现。 其实，换另外chi̍t-ê角度来看，因为有出刊ê压力，所以其实有侦chē稿是逼出来--ê，可能有一寡人hō͘主编催稿催ka挡bē tiâu，姑不二衷写一下，然后chit篇就是作者chit世人第一篇台语文章(希望m̄是chit世人唯一ê一篇)。《台语学生》另外一项特色是，因为gún无认为lán有法度真紧来统一汉字ê用法，除非社会上有真chē人phah拚teh写，所以gún无 kā人改字 ，各篇文章ê用字lóng无啥一致，毕竟改用字加khah费气，有时--á koh会phah pháiⁿ作者ê感情，而且，lin本身ê用字都无一定khah高明，chit点是kap所有其他台语刊物做法无仝ê所在。 93年二月beh改选会长ê时，无人愿意出来接，可能是惊无法度应付刊物ê发行kap其他事务性ê空课。 我只好放外外，专心应付我ê毕业论文，一直kàu我毕业，无koh再是学生，自动消失会长资格。 叫学生来做台语文运动实在是先天不良koh兼后天失调，先天不良是因为chit代ê学生囡--á受全面ê北京话教育，台语程度本成就无好(我家己就是chi̍t-ê例，我tòa台北，初中时就已经bē晓讲台语，一直kàu大学三年ê时chia开始学转来)；后天失调是，基本上，学生是chi̍t-ê真无稳定ê阶级，比较teh学生khah无法度专心做一项代志，伊tú入来chi̍t-ê旷阔ê世界，对伊来讲啥物代志lóng mā真趣味真新鲜，自然啥物代志lóng想beh斗一脚耍看māi，所以chi̍t-ê台语社ê社员，伊可能同时koh去舞政治、舞学运、舞环保、舞女性主义……等等；按另外chi̍t-ê角度来看，台语文字化chit件大工程，tī大环境无配合ê情形下，观念ê建立无容易，学习ê时间mā爱有够长，尤其习惯ê建立(改用台语写物件)koh khah爱家己大ê决心kap行动，会使讲，除非伊大学四年ê时间专心teh做chit方面ê物件，若无，beh培养出chi̍t-ê勇脚ê台语文人才--- 想bong想，可能khah早困khah有眠。 但是，学生有chi̍t-ê特权，就是媒体kā伊惜命命，可能伊ê形象好，hō͘人感觉m̄是为着利益teh做代志，koh是受高等教育、学问真饱ê一阵人。 我想，这可能是假象，所有ê人lóng应该有觉悟，beh寄望学生做出啥物贡献，实在无啥实际。 其实，学生早慢mā lóng爱离开学校进入社会，所以tī我ê观念内，我真希望tī我会长任内，会当chhōa大家实实在在、恬恬--á做出一寡kàu时逞好tiām社会面头前嚣俳ê物件出来，家己ê实力若有够，才有法度讲大声话，稀罕别人ê pho̍k-á声是无路用--ê，mā无实际，因为这是teh做理想，m̄是teh做爽--ê。 基本上，我就是以chit种态度kap观念来面对各校台语社ê朋友，Chit阵做《台语学生》是án-ne，今má提出chit-ê采访计划mā是án-ne。
3、
不管是有达成iá是无达成，chit-ê采访计划ê提出，有真chē ê企图tī内底。 对学生chit边来看，主要是：
(1) 我想beh交接我kap一寡台文工作者ê人际关系，透过采访，hō͘学生kap工作者熟似。
(2) 想beh尽量招一寡各校台语社新社员，尤其是台大，希望藉采访ê过程，hō͘ 这寡新ê脚--á khah紧进入状况，来受工作者拚势ê精神感染，认真来思考台语文字化ê问题。
(3) 一寡工作者，可能因为观念ê无仝，会互相攻击，透过采访，希望学生加减听，有chi̍t-ê全面ê了解。因为这寡学生，以后可能会继续做台语，而且有可能kap目前ê工作者做伙做代志，若beh合作，总是爱对对方有初步ê了解。
(4) 上重要--ê，希望负责人会当藉chit-pái ê采访学者一寡实际ê物件，整理录音带、用台文处理chia-nih长ê文章、ùi整理ê过程加减学一寡台语词(chit寡词可能lin m̄-bat用过、讲过)、用整理好ê采访稿kap受访者建立进一步ê关系……。
对归ê台语界iá是社会ê角度来看，主要是：
(1) 藉采访来肯定工作者ê phah拚，kā工作者做精神上ê鼓励。
(2) 互相ê沟通、交流，hō͘大家koh khah知影别人teh做啥物，尽量避免人力资源ê浪费。
(3) 上重要--ê，大环境hō͘ lán ê束缚真大，一般台湾文学界，普遍ê lóng看台语文无够重，上明显ê例，in teh整理台湾文学史ê时，差不多lóng bē去讲着台语文学ê部分，虽然这chia应该是正统ê台湾文学。换另外chi̍t-ê角度来看，文字习惯ê改变，对一寡人来讲总是无hia-nih简单，既然in无beh整理台语方面ê物件 --- 可能in贫惮iá是in无chit-ê才情 --- án-ne lán家己来整理。
4、
关系gún对采访ê其他态度kap想法，会使参考chit本书ê附录。简单讲，针对受访者，采访ê时阵主要有2 ê重点，chi̍t-ê是受访者ê出身，另外chi̍t-ê是受访者对归ê台语文运动ê看法kap态度，假使chit-ê受访者有发明啥物台语表记ê方法iá是对用字应该爱按怎按怎有真chē ê意见，基本上m̄是chit-pái采访ê重点，事实上gún mā khah无趣味。另外，gún mā无希望受访者对采访稿ê用字有太chē ê意见iá是想beh主导。当然，这只是原则，因为每chi̍t-ê受访者ê态度lóng无仝，横直tio̍h是互相chhiâu策，采访视beh互相结缘互相熟似，m̄是beh phah pháiⁿ关系--ê。 其实gún所熟似ê台语文工作者mā是有限，总是今má已经起chi̍t-ê头，mā希望有趣味ê同志，会使就lin所熟似ê台文工作者来做采访，整理hō͘ khah完整--ê。 Hit阵我答应beh负责采访计划kap出《台语学生》22期(试刊1~4期 kap1~18期)ê合订本，因为经费ê问题，可能合订本暂时无法度通完成。真希望经费ê问题会当紧得着解决，我tio̍h会使免koh将chit层代志khǹg tī心肝内。 采访稿，每一篇ê用字无啥仝款，但是仝一篇内底ê用字是一致--ê。基本上，hō͘大家看着ê用字，是负责人、受访者、kap定稿ê人(我)所chhiâu策ê结果。Chit本书后壁有字词表，读者会使先参考，chia来看采访稿。 我认为，chi̍t-ê台文ê推广者，因为伊爱面对各种对台文运动无仝意见ê人，所以in应该全罗kap全汉lóng有法度，án-ne chia khah有说服力，所以chit篇序分别用全罗kap全汉来写，mā算是自我ê训练。 我khah贫惮kap侬chìⁿ，m̄-koh，对chi̍t-ê赞成全汉ê人，我会提醒伊仝chi̍t-ê汉字有真chē读法ê缺点；对chi̍t-ê主张汉罗ê人，我会提醒伊用字爱一致，m̄通仝一字liam mi用汉字liam mi用罗马字，家己写法若无一致，lin就无才调要求别人来tè lin，因为人bē看着lin ê方便，但是看着in ê乱。 罗马字部份采用教会罗马字，毕竟chit套历史khah久，用ê人mā khah chē，但是为着记泉州音，参考TLPA(台湾语言音标方案)ê用法加「r」chit-ê符号。Chit本书用Ctex排版软体来处理，tī chia爱感谢台大外文系张裕宏老师，因为罗马字标调ê符号是伊解决--ê，mā祝伊早日完成伊当teh进行ê大工程。另外，汉字部分是用BIG-5内码，为着流通性ê问题，字集无ê字lóng无采用，意思就是完全放弃造字，请读者了解chit点。 本成我koh想beh整理chit寡负责人对受访者ê评价，不管是好--ê iá是 iá是bái--ê，mā算是对台语文界提出学生立场ê看法，总是后来并无完成。 对郑良伟先生、林锦贤先生、陈义仁先生、陈明仁先生kap陈丰惠小姐，mā爱tī chia kā in讲一声失礼，gún有去采访，但是chit寡ê负责人并无将采访稿完成。我认为chit-ê采访稿有伊ê时效性，因为台语文运动当teh发展，假使chit-ê工作者一直有teh做chit方面ê空课，今年ê观点、态度kap明年可能就会小寡无仝。所以对chit寡台语界ê前辈，只有等待后chōa chhē机会重采访一遍。 上重要--ê，chit本书ê完成，爱感谢每chi̍t-ê负责人、受访者ê配合kap用心，尤其是负责人ê辛苦。 希望lán大家lóng继续phah拚，一方面mā来思考lán家己tī chit-ê台语文运动中ê地位、应该爱做啥物款ê代志、kap归ê台语文界爱按怎配合……。Tī chia，lán同齐来祝福，祝福台语文运动早日成功！